بے توار ءِ توار: گمنامیں کردار(اللہ داد) بلوچ اسٹوڈنٹس کونسل، اسلام آباد (لبزانکی کمیٹی)

بے توار ءِ توار: گمنامیں کردار(اللہ داد)

بلوچ اسٹوڈنٹس کونسل، اسلام آباد (لبزانکی کمیٹی)

بنیادم ہما اِنت کہ آ وتی پجار ءَ گوں ایماندار اِنت۔ پجار اِنت کہ بنیادم ءَ زندمانے بکشائیت۔ ہما زندمان کہ بنیادم ءَ را ایدگہ ساھداراں چہ گستا کنت ءُ ہمے زندمان اِنت کہ بنیادم ءَ را دودے ءِ واہند کنت۔ بنیادم ءِ دود آئی ءَ را زند گوازینگ ءِ رَھبندے دنت۔ بنیادم ءِ مزن شانیں ءُ ازگاریں ربیدگ اِنت کہ آئی ءَ دودمانے ھدابند کنت۔ دودمان ہمک راج ءِ نصیب ءَ نہ بیت بلکیں ازگار ءُ مگیمیں راجے ءِ بہت ءُ تالہ ءَ کیت ءُ راجے ءِ جوڑشت ءِ مستریں مانزمان آئی ءِ زمین اِنت۔ ہما زمین کہ ہر وڑیں گنج ءُ مادناں بگر دانکہ ابرم ءِ تہر تہریں رنگ پہ رنگی ءَ چہ سرچکار اِنت۔ ہمے رنگ پہ رنگیں گلزمین دودمان سازگ ءِ راہ ءُ دراں مَرزان ءُ میرزان کنگ ءِ سبب بنت۔ ھمے پُرگنجیں جغرافیہ ءِ تالہ اِنت کہ راجاں شرپدار کنت۔ اے کلیں سپت کہ ھوار بنت گڑا بنیادمی دودمان ءِ ٹہشت اژدری بیت۔ ہمے دودمانی ریج ءُ ازگاری ءِ سبب اِنت بلوچ ماں دنیا ءَ یکتائیں راجے ءِ بستار ءَ زانگ ءُ پجارگ بیت۔ پمیشکہ ہمک بے دودمانیں راج ءُ الگارانی چمانی مدام بلوچ ءِ پُرگنجیں گلزمین ءِ سک اَنت۔ بلے بلوچ ءِ گلزمین ءَ ہما نکش کہ وتی پُسگانی سر ءَ اشتگ اَنت گڑا داں ابد اشی ءِ پاسپانی ءَ مدام یلیں ورنا وتی ہیسی سرانی دیمونی ءُ کربانی ءَ چک ءُ پد نہ بوتگ اَنت نئیکہ ہستیں الگار ءُ زورگیر ءِ دیم ءَ بلوچ وتی راجی ھستمان ءُ گلزمین ءِ نکشانی کروجگ ءَ سراں جہل کن انت۔

گوست ءَ بگر داں ھست ءَ بلوچ ءِ ماتانی شکماں انچیں پُسگ پیداک بوتگ اَنت کہ آیاں بلوچ ءِ ھستمان ءِ پاہازگ ءَ وتی بہرشت ھوار گیتکگ اَنت دانکہ بلوچ راج وتی سرسوبی ءِ مِنزلاں سر بہ بیت۔ اے بہرشت بلوچ زندمان ءِ ہمک پڑ ءَ گندگ ءَ کیت۔ پرچا کہ زندمان روانی ءُ ریچ ءَ گوں بندوک اِنت، اے ریچ ءُ روانی داں ہما وھد ءَ برجاہ مان اَنت وہدے کہ بنیادم ءِ زندمان پراہ ءُ شاہگان بہ بیت۔ اے پراہ ءُ شاہگانی ہما وہد ءَ ودی بیت وہدے کہ اشی ءِ اندر ءَ جدت بئیت، دیمروئی ءِ راہ ءُ دراں گوں ہمزیل بہ بیت، بلے اردیں کہ زندمان کوہنکدگی ءِ آماچ بوت گڑا زندمان نہ مانیت بلکیں کوہندگی زندمان ءِ چپ اِنت، بزانکہ ویرندانی ھوپ سر ءَ ساھیل بنت۔ پمیشکہ ویراندانی ءِ یک ءُ تہنائیں ھَند مانشجاہ اِنت یا کہ آکوٹ اِنت۔ پمیشکہ بے شاہگانیں زند ءُ  پدمنتگیں راج تہنا دور دیگ ءِ کار ءَ کیت اشی ءَ ابید دگہ آئی ءِ تاجے سر ءَ دیگ بیت نہ کنت۔ بلے بلوچ ءِ پُسگاں ہجبر وتی راجی زندمان بدجلواہ نہ کرتگ بلکیں مدام جُہد ہمیش بوتگ کہ اِشی ءِ اندر ءَ پراہ ءُ شاہگانی بئیت اِنت۔ زندمان روانی ءُ ریچ ءِ ہمسپر بہ بیت۔ پمیشکہ بلوچ زیک ہم سرپد بوتگ ءُ مرچی ہم باسما اِنت کہ آئی ءَ زندمان ءِ ہمک پڑ ءَ وتی بہرشت دیگی اِنت۔ پرچا کہ اگاں بلوچ ءَ وتی دودمان ءِ وارسی کنگی اِنت گڑا آئی ءَ وتی ہزار سالیں مہرگڑھ ءِ پاسپانی کنگی اِنت بلے مہرگڑھ ءِ درجنگ ءَ پیسر بلوچ ءَ را یکبرے وتی گلزمین چہ الگار ءُ زورگیراں رکینگی اِنت۔ اگاں لکھاں گونڈلیں ورنا زورگیر ءُ الگار ءِ تیراں وتی سینگاں جاہ بہ دینت گڑا  پدا ہم کم اِنت پرچا کہ اے گلزمین سک باز کرزیت۔ پمیشکہ بلوچ وتی گلزمین ءَ پہ چو تُکشوک اِنت، ہزار مرادیں واھگانی پیلو کنگ ءَ سر ءُ چیر اِنت۔ ہمے واھگانی پیلو کنگ ءَ ماتانی شکم کدی ہم بلوچ ءِ سولیں پُسگانی پیداک کنگ ءَ سَنٹ نہ بوتگ۔

بیست ءُ یکمی کرن ءَ بلوچ یک انچیں بد جوپیں دژمنے ءَ گوں چیر ءُ سر اِنت کہ آ بلوچ ءِ سرمایہ ءُ مڈیانی کشت ءُ کوش ءَ بگر بلوچ ءِ پجار ءَ ھلاس کنگ ءِ پندل ءَ سازگ اِنت۔ پمیشکہ آ وتی ھواری ءَ ایدگہ سرمایہ کارانی دستاں بلوچ ءِ پجار ءِ لیلام کنگ ءُ گار ءُ بیگواہ کنگ ءَ چک ءُ پد نہ بوگ ءَ انت۔ بلے بلوچ ءَ وتی زندمان ءِ روانی ءِ مرگ تنی وہدی انگت نہ منّ اتگ ات۔ اے گپ ءَ ہچ شک نیست اِنت کہ بلوچ نازرکیں اھدے ءَ چہ گوزگ ءَ اِنت بلے اے نازرکیں اھد ءَ بلوچ ماتاں انچیں بلوچیں پُسگ پیداک کرتگ کہ آ زندمان ءِ روانی ءَ اوشت آماچی ءَ ھجبر نئیل اَنت۔ ہمے پُسگانی میان ءَ اللہ داد بلوچ ہما بلوچیں زانتکار ات کہ آئی ءَ بے تواری ءِ جہلانکیں زر ءَ انچیں دُلّاب ءُ توپانے چست کرتگ کہ اے دُلّاب ءَ استان ءِ ہمک مُہریں دیوال جکسینت اَنت۔

اللہ داد بلوچ کندیل سباہ ءِ پدگیرے ات۔ آئی ءَ کندیل سباہ ہما وہد ءَ وتی شکم ءُ اندر ءَ جاہ دات وہدے کہ اولی رند ءَ کندیل سباہ ءَ وتی کدم تربت ءِ دلبند ءَ دور دات اَنت۔ اے ہما دور ات کہ سباہ بلوچ استاداں یکجاہ کنگ ءَ ات، آیاں بلوچ، بلوچی ءُ بلوچستان ءِ بندپتری راستی ءِ بابت ءَ آشنا کنگ ءَ ات۔ آئی ءَ بلوچی بنگیجی کورس ٹہینتگ ات، آ ہمک زری وانگجاہاں دورہ کنگ ءَ ات۔ وھدے کہ آ ڈیلٹا ءَ اتک گڑا گشتانک ءِ بندات کنگ ءَ گوں نشتگیں نودربرانی میان ءَ اللہ داد ءَ وتی ھیالانی واگ ترینت اَنت۔ آئی ءِ گپ ءُ تران انچو زوراک ات انت کہ چریشی ءِ سبب ءَ پلگدیں ورناہے ءَ ہم رک ات نہ کت۔ ہمداں چہ اللہ داد ءِ چمانی اندر ءَ رژنے ودی بوت۔ وھدے کہ ڈیلٹا ءَ بنگیجی کورس وانینگ بندات کت گڑا آئی ءَ انگریزی وانگ ءِ ہمبرائی ءَ بلوچی ءَ ہم ڈپلومہ کت۔ آ ھاموش تبیں انسانے ات، بلے مدام بلوچ ءِ راجدپتر، بلوچی ءِ دیمروئی ءَ واھگدار ات۔ آ اینچو نودربرانی کلکت ءِ اندر ءَ ایوک ءُ تہنا ات، آ بے توار ات بلے آئی ءِ بیتواری ءِ پشت ءَ ناہاریں دُلّاب ءُ توپانے چیر ات۔ انچوش کہ بلوچاں گشتگ دریا وہدے کہ ھاموش بیت گڑا بزاں آئی ءَ مزنیں توپانے دل ءَ انت۔ پمیشکہ اللہ داد ءِ بیتواری ہم توپانے ات۔ آ چو ایدگہ روایتی ءُ وتگڑیں بلوچ شائر ءُ لبزانتانی پیم ءَ نہ ات۔ بلکیں آ ایوک ءُ تہنا کندیل سباہ ءِ پدگیرے ات، پمیشکہ آئی ءَ بلوچ ءِ درگیجگ ءِ سپر ءَ تہنا وتی زات ءَ ھوار گیجگ ءَ نہ ات بلکیں بُندپتر ءِ وانگ ءَ وھدے ماں کراچی ءَ شت گڑا آئی ءِ اندر ءَ بلوچ ءِ چیر اتگیں ءُ ایردست کرتگیں بندپتر ءِ پد جنگ ءِ واھگ دو سری گیش بوت اَنت ءُ ہمیشی ءِ ہمبرائی ءَ آ وتی نزیکیں نودربراں ہم یکجاہ کنان ات، ہما نودربر کہ بلوچ، بلوچی ءُ بلوچستان ءِ درگیجگ، آئی ءِ پاہازگ ءَ ھدوناک ات انت گڑا آیاں پہ یک پترے دیگ ءِ بنھشتکار اللہ داد ات۔

اللہ داد نودربرانی مچی ءِ میان ءَ گمنام ات، شائر ءُ لبزانتانی بٹاک بازی ءِ میان ءَ چپ ات، آئی ءِ ھیال ہمیش ات اگاں ما وتگڑیں شائر ءُ لبزانتاں یکرّ کنگ لوٹ ایں گڑا مارا آیانی چپ ءَ کار کنگی اِنت، آیانی بگیری ءِ انچیں لبزانک ودی کنگی اِنت کہ آ تہنا بلوچ ءِ راستیں بُندپتر ءُ ہستیں بلوچ جہد ءِ جہگیری ءَ بہ کن اَنت۔ کراچی ءِ زمانگ ءَ آئی ءَ نوکاپ لبزانکی گل ءَ ھوار بوت۔ ہمے میان ءَ آئی ءَ”راجدپتر “ءِ نام ءَ تاکے ہم کش ات۔ بلے آئی ءِ ہمبراہ کاری مردم نہ ات انت گڑا آئی ءَ دگہ نیمگے ءَ دست ءُ پاد کنگ بندات کت۔ آ کدی ہم بلوچ ءِ دمبردگی ءُ اوشت آماچی، کم مارشتی ءُ بے کمنٹمنٹی ءِ سبب ءَ دلپروش نہ ات۔ بلکیں آئی ءَ بلوچ، بلوچی ءُ بلوچستان ءِ شوہازگ ءِ سپر گیشاں گیش مہکم کنگ ءَ جتائیں شوربندی ءُ توان ءِ پٹگ ءَ گوں گلائیش ات۔ ہمے میان ءَ آ”راجمان سیریز “ءِ Backdoor ءَ کار کنگ ءَ ات۔ یکے دیمے بندپتری نکاناں رجانک کنگ ءَ ات گڑا دومی دیم ءَ آئی ءَ وتی پبلکیشنزے”دودمان “  ءِ نام ءَ دیم ءَ آورت۔آئی ءَ نہ چار ات کہ آئی ءِ پبلیکیشنز ءَ سرکاری سرپرستی نیست اِنت، مالی کمک نیست اے رد ءَ آئی ءَ ہجبر کوکار ءُ واہی نہ کت۔ بلکیں آئی ءِ گور ءَ کاراں مانا داشت، کار کہ بیت زر ءُ مالی جیڑہانی گیش ءُ گیوار چوشیں مزنیں جیڑہے نہ یے۔ آئی ءَ دودمان پبلیکیشنز ءِ وسیلہ ءَ بازیں راجدپتری ءُ لبزانکی کتاب چاپ ءُ شنگ کت۔  ”دودمان “آئی ءِ انچیں وابے ات کہ اشی ءِ وسیلہ ءَ آ جتائیں پڑ ءِ مردماں یکجاہ کنان ات۔ کسے اگاں سائنسے مردم ات گڑا آئی ءَ سائنس ءِ سرھال ءِ بابت ءَ مواد دیگ ءَ ات، کسے اگاں بندپتر ءِ مردم ات گڑا آئی ءَ بندپتر ءِ بارہ ءَ نکان دیگ ءَ ات، کسے اگاں پوسٹ کالونیل اسٹڈی ءِ بابت ءَ کسان مزنیں علم ءُ زانشتے داشتگ ات گڑا آئی ءَ ہمے پڑ ءَ مواد دیگ ءَ ات۔ اے کلیں کاراں آ گمنامی ءَ کنگ ءَ ات، آئی ءَ نامداری ءِ ہچ پیمیں ھب ءُ ھدوناکی  نیست ات بلکیں آئی ءِ گشگ ءَ ات کہ من بلوچی ءِ کسانیں ھذمتگارے آں۔ نام ئِے نہ لوٹ ات بلکیں بلوچی ءَ پہ کار ئِے لوٹ ات۔ پمیشکہ آئی ءَ وت ءَ را اندیم کرتگ۔ جتائیں ناماں بلوچ راجدپتر ءِ بابت ءَ پٹپولی نبشتانک نویسگءَ ات۔ کجام ہم نزیکیں سرکلے ءِ مردمے ءَ آئی ءَ میار پر ترینت کہ مئے تاک ءِ بابت ءَ بندپتر ءِ اے سرھال ءِ باروا نبشتہ بہ کن گڑا آئی ءَ لبیک کت بلے اردیں کہ آئی ءَ وتی کار سرجم کت گڑا گڈسر ءَ گشت ئِے کہ منی نام ءَ مہ دے ات۔

وھدے آ اسلام آباد ءَ اتک گڑا وتی ایم فل ڈگری کنگءِ وھد ءَ ہم بلوچی ءَ پہ تگ ءُ تاچ کنگ ءَ ات۔ چوشکہ بی ایس سی ءِ سنگتاں مار ات کہ مارا گوہر کیمتی یے رستگ گڑا ادارہ ءِ سنگتاں آئیءِ کاربندگ ءُ آئی ءِ بودناکیانی کارمرزی زانت، پمیشکہ سائیٹ ءِ گیشتریں تھیورٹیکل تران ءُ باوستانی دیم ءَ آرگ ءِ مستریں دست اللہ داد ئیگ ات۔ بلے آئی ءَ ھجبر نمود ءُ نمائش ءَ گوں کار نیست نئیکہ آئی ءَ پہ نام ءَ چوشیں ارزشتے ہست ات پمیشکہ آ بے تواری ءِ میان ءَ تواری سازگ لوٹگءَ ات، پمیشکہ آ گمنامی ءِ میان ءَ پہ وت کردارے سازگ لوٹگ ءَ ات۔ داد پہ بلوچاں دادے ات، سوگاتے ات بلے اِستان ءَ اچ ما اے داد ءُ سوگات پچ گپت۔ ما آئی ءِ پچگرگ ءُ مرگ ءَ بژنیگ نئیں پرچا کہ اے مئے ایمان اِنت کہ زورگیریں استان ءَ اللہ داد مارا چہ پچ نہ گپتگ ءُ نئیکہ نوہ مَن ھاک ءِ چیر ءَ اللہ داد ءِ جَسد ئِے کل کرتگ بلکیں استان ءَ اے تابوت ءِ اندر ءَ وتی میت کل کرتگ۔

بی ایس سی ستک شانی درشان کنان ءَ اے ایمان ءُ واھگ ءَ پدر کنت کہ اللہ دادءِ دیستگیں واب ءُ ہزار مرادیں واھگانی پیلو کنگ ءَ ہمک رنگیں گامگیج زورگ ءَ جاڑیگ اِنت ءُ اے وابانی پیلو بلوچ، بلوچی ءُ بلوچستان ءِ رکینگ ءُ وشھالیں زند ءَ گوں بندوک اِنت۔