اسہ باسُن دے اس 1998 ٹی، چار دے مالو پاکستان تینا کسر ئٹ ئس تینا ایٹمی تراک نا ٹیسٹ ءِ چاغی ٹی کننگ کن، مسہ بلوچ بندغ ہرافتا پنک شبیر رند، شہسوار بلوچ و صابر رند اسہ ”پی آئی اے“ جاز (554 فوکر F27) اس ہائی جیک کریر، اوفک دا خواست ءِ کریر کہ ایٹمی تراک ءِ چاغی ٹی کپّس۔ پاش وڑئٹ، نسخانی آ ایٹمی تراک آن لس مخلوق ءِ نسخان رسینگک۔ ولے اوفتے دزگیر کریسہ پاہو تننگا۔
آخر کار، پاکستان 28 مئی 1998 ٹی چاغی بلوچستان ئٹ تینا ایٹمی طاغت آتا آزموندہ ءِ کرے۔ ہرا نا سوب آن ہندی مخلوق آ بھاز آ زہم آک تمار۔ 28 مئی 1998 ءِ بلوچستان نا دیہاڑ نا اسہ بھیم بش کروک تدینی اس گوندنگا، ہراڑے اسہ ایٹمی آزموندہ اس کننگا، ہرا بلوچستان نا ضلع چاغی نا ہندی آباتی آ بھلو جانجوڑی و معاشی زہم شاغا، واہم، دا اہم ءِ۔ یاتی مرے کہ دا وڑ ئنا منصوبہ بند و آفت آک بلوچستان ئٹ ہر وخت مریرہ، ہراکہ بلوچ عوام ءِ و اوفتا ڈغار ءِ ہر ڈول ئٹ، باقاعدئی ئٹ زہمی کیرہ۔ بلوچستان ئٹ مروکا بھس کار آ تدینی تا جاچ مایوس کن ءِ، ہرا قومی و پیشن نا میڈیا غا ہر وخت خن تیان چپ مریک۔ دا ریاست نا پارہ غان بلوچ الس نا زند و دیمروی تے خن تیان چپ کننگ نا بابت سوچ اس ودی کیک۔ داڑان بیدس، ہندن لگک کہ ریاست نا پام نوآبادیاتی پالیسی تے پیوند کننگ ئٹی خلوک ءِ ہرا بلوچ قوم و اونا مڈی تے بے ایمانی ئٹ لٹ و پل کننگ ءِ۔ دا برتری بلوچ آتتون مروکا بھاز تکلیف و جنجال آتا گواچی کیک، ہرانا سوب آن بھاز جسمانی و ذہنی زہم آک ودی مریرہ۔
چاغی نا نہادی آ ڈغار آ ایٹمی تراک اسہ بے تکا و تدینی اس الو، البتہ دا بلوچ الس نا زنک ایسری نا اسہ ڈوہ اس ئسک و دا اسہ ڈول ئنا اوفتا اسہ منصوبہ اس ئسک۔ زنک ایسری نا ایجنڈا پاش ئس، ہرا نا گواہ بلوچ الس نا جانجوڑی و معاشی بہبود ءِ خن تیان چپ کننگ ئس۔ دا کاریم دا پاش کلہو ءِ ایتک کہ بلوچستان نا مڈیک ریاست کن نہادی ءُ، ولے او دا ڈغار آ رہینگوکا بندغ آتا زند ءِ ہچس ام تکپک۔
ہر سال 28 مئی ءِ پاکستان ئٹ یوم تکبیر، ہرادے یومِ عظمت ام پاننگک، او تینا اولی جوہری سلہہ نا سرسہبی و تراک نا فخر ئٹ خؤشی کیک۔ ولے بلوچستان نا ضلع چاغی نا ہندی مخلوق و تیوہ بلوچستان نا بندغ آک 28 مئی ءِ مؤن آ دے (یوم ءِ سیاہ) نا وڑ ئٹ ہُریرہ ہندی آباتی ئٹ 26 سال آن پد ہم بلوچستان نا مشی آ لڑ راسکوہ ئٹ مروکا ایٹمی تراک نا نتیجہ غاک خننگرہ۔ خطہ نا ورنا غا زنک دا تراک آتا سوب مروکا ہر وڑ ئنا ناجوڑی تا گواچی ءِ۔
ایٹمی دیہاڑ: ایٹمی سلہہ تے ہرا وخت و انتئے کاریم ئٹ ہتنگا
تیوہ بندغی دیہاڑ ٹی مُچا جہان نا راج آک بھیم بش کروکا جنگ آتون مون تسنو۔ اولیکو بھلا جہانی جنگ (1914-19) نا پن ئٹ چاہنگوکا بھلا جنگ بندغی دیہاڑ آ اسہ لَپ ئسے۔ دا جنگ آن پد یکدم جہان جنگی ویل آتے مونا تخسہ دا ردئٹ ٹَک خلسہ اسہ ہندا مُچ مریسہ پارے کہ دنیا ٹی بش مروکا ویل آتا ایسری جنگ آخہ بلکن تین پہ تین تولنگ و ہیت و گپ ئٹ مننگ کیک۔ ولے گواچن دوست آ سوچ اسیکہ وا جہان نا زی آ گڈو مننگ ئٹ سرسہب مس۔ داڑان گڈ ارٹمیکو بھلا جہانی جنگ (1939-45) بناء مس، ولدا دیہاڑ نا کل آن بھلا جنگ کمیونسٹ و سرمایہ دار تا نیام ئٹ پدین جنگ (1947-91) ریاست آتے بیوس کرے کہ اوفک سرمایہ دار یا کمیونسٹ آتا مُخ تفی ءِ کیر۔ دا ردئٹ ریاست آتے
زرگزرانی، راجی و عسکری طاغت ءِ مونا تخسہ گیشتر تینا ہم کمک ڈیہہ و واک دار آتیا ہُروئی تماکہ ہرافک اوفتا جوانو آسرہ اس ئسر۔
مون آ دا پڑا روس تینا گیشتر جوہری آزموندہ تے قطبی قازقستان نا، قازق قوم نا ڈغار آ کرے۔ دا ڈیہہ آ کم و ود 456 جوہری آزموندہ کننگا۔ دا جوہری آزموندہ تیان لکھ آتا حساب آ قازق آک ناجوڑی تا گواچی مسر۔ ایٹمی آزموندہ تا دا جاگہ جہان ٹی کل آن زیات جوہری تابکاری نا گواچی مروکا جاگہ پاننگک۔ جہانی دیہاڑ ٹی دا ردئٹ چندی ول ویچ و چیڑگنی و بدلیک برسہ کریر دا بدلی تا دور ءِ ایٹمی سلہہ تا دور پاننگا۔ ہرا ایٹمی سلہہ غاک بندغی راج و آباتی تے بھلو کچ ئسے ٹی ساہت آتیٹ ایسر کرسہ نسخان تیرہ۔ ساہت آتیٹ لکھ آ بندغ آتے کسفنگ و لکھ آتے زہمی و منڈ کننگ کیرہ دنکہ ارٹمیکو جہانی جنگ ئنا وخت آ امریکہ نا پارہ غان جاپان نا اِرا شار ہیروشما و ناگاساکی آ ایٹمی بمب آتا بٹنگ آن لکھ آتا کچ ئٹ مخلوق بیران مس آباتیک ہِس مسر۔ لکھ آ بندغ آک ٹپی و معذور مسر چندیک گنوک مرسہ آخوبتی کہ نفسیاتی ناجوڑ مسر۔ ایلو وڑئٹ دا ایٹمی سلہہ تا بھس کاری آن پد الم ہمو ملک و مخلوق کہ زرگزرانی وڑئٹ بھلو نسخان و بھس کاری ہتیک ہمو راج و مخلوق ءِ ہر وڑئٹ زرگزرانی، روزگار، تعلیم و جانجوڑی، ربیدگی، نفسیاتی وڑئٹ بھاز نسخانی و زہمی کیک۔
بلوچستان: مصیبت و مزاحمت نا ڈغار
بلوچستان نا رابطہ ءِ بند، بے بندغی و ایلو جہان آن جتا کننگاسُس۔ اسہ اندنو ڈیہہ اس ہراڑے کہ کس ام رکھوک اف چائے او زند نا امرو بشخ ئسے آن تعلق تِخک۔ دا مصیبت و مزاحمت نا ڈغار ئسے۔ ”ہر دے ڈیہہ ئٹی اسہ گڑتی اس ہتیک، وا ام تینا زور ئٹ و میڈیا نا سوب آن بلوچ و بلوچستان توں گنڈوکا حوال آک راجی چر ئٹی اوار مفسہ۔ بلوچستان اسہ آزاد ءُ ریاست اس ئس۔ برطانیہ و قلات (بلوچستان) نا نیام ئٹ جوانو تعلق تخنگ کن ہر وڑ ئنا رسمی معاہدہ نوشتہ کننگانے۔ ریاست قلات سلہہ بند جہد نا ذریعت ئٹ انگریز آتا کوزہ گیریت ءِ پِرغا و 11 اگست 1947 ئٹ اسہ آزاد ءُ ریاست ئسے نا پڑو کننگا۔ دا وخت آ ریاست قلات ءِ پاکستان اسہ مسلمان ریاست ئسے نا وڑ ئٹ تینتون اوار کننگ نا ہیت کرے، ولدا ام ریاست قلات، ہراڑتون اِرا پارلیمنٹ ہاؤس (دی ہاؤس آف لارڈز و ہاؤس آف کامنز) ئس، پاکستان تون اوار مننگ ءِ نہ من کرے۔ ایوان دا دلیل ءِ تس کہ ”اگہ مسلمان یا ہم مذہب مننگ پجار ئسے، گڑا پاکستان ءِ اسیکہ مشرق۔وسطیٰ نا مسلمان ریاست آتے وفاق نا بشخ مننگ آ راضی کننگے۔“ اوکان پد، 27 مارچ 1948 ئٹ، قلات نا ریاست ءِ، فوج ئنا ذریعت ئٹ پاکستان زوراکی ئٹ کوزہ کرے۔ پاکستانی لشکر ریاست قلات ئٹی زوراکی ئٹ پیہا و قلات نا سروک میر احمد یار خان نا اُرا غا چھاپہ خلنگا، ایسر ئٹ اونا دزگیری ءِ عمل ئٹ ایسر۔ 1948 ئٹ، پاکستانی ریاست نا نیمہ آن طاغت نا کاریم ئٹ ہتنگ آن پد یکدم بھاز آ بلوچ آتے کسفنگ و زوراکی ئٹ تینتون اوار کننگا۔
"نوری نصیر خان و بلوچ جہد ئنا میراث نا رکھ ءِ کننگ کن، خان قلات نا چنکا ایلم، آغا عبدالکریم ریاست قلات نا زوراکی ئٹ کوزہ نا برخلاف اسہ جنز ئسے نا سروکی کرے۔ داڑان پد، تحریک جوڑ مس ہرا اینو اسکان اسہ وڑ برجا ءِ: 76 سال آن زیات مننگ آن پد ہم۔ تینا سرزمین آ بلوچ آتا آجوئی نا تحریک کہ ترند مس گڑا پاکستان بلوچ نسل کُشی نا بھاز آ پالیسی تے جوڑ کرے، دُنکہ ریپ، کسفنگ، و بندغ آتے ہیلی کاپٹر آتیان پیشن خسنگ، ہرافتا مسخت بلوچ و اونا آجوئی نا تحریک ءِ لتاڑنگ ئس۔
مئی 1998ء ٹی پاکستان بلوچستان نا ضلع چاغی ٹی راسکوہ نا مش تیا پد مہ پد پنچ ایٹمی تراک کرے۔(اوکان گڈ 30 مئی آ شش) ایٹمی طاغت نا درشانی کروکا جہانی لڑ ئٹ ہفتمیکو و مسلمان ڈیھ تا اولیکو ملک جوڑ مس، پاکستانی تران دادے بھارت نا برخلاف بریبری کن مؤنا ایس۔ دا پاننگا کہ ہڑتومکا ایٹمی سلہہ غاتا المی بربادی (MAD) نا اصول نا رِد علاقائی ایمنی نا سَوب مریرہ۔ پَلاگیری کروکاک دا دلیل ءِ تسر کہ بریبری و چاگڑدی جوانی،کم ایٹمی سلہہ تون کم آن کم ڈیٹرنس ءِ برجا تخسّا، ولے وا ام دا پاننگا کہ جُوانو بھرم تتوس، ہڑتوما ملک آتا ایٹمی آزموندہ غاک جُوان متوس۔1999ء کارگل جنجال بناء مس و دفاعی بجٹ ئٹ کمی نا جاگہ غا زیاتی مس۔ اوکان گُڈ ہڑتوما ملک آک تینا کم پھڈائی گَت ئنا جتا مریسہ تینا ایٹمی طاغت ئٹ زیاتی ایسر۔ دا وختا اندا گمان کننگا کہ پاکستان بھاز ترندی ئٹ و غُٹ آن زیات فوجی سلہہ تا خواجہ ءِ۔ پاش وڑئٹ دا ایٹمی تراک آتا زہم آک بلوچ شعور آ زیات و ساندہ تخوک ءُ۔ راسکوہ نا مَشک دائسکان ویران و مُجی ءُ۔ ہرا مالو نا تہ دروشم آن تیوہ چَپ ءِ، رہینگوک آک خاہوتی و جینیٹک حالیت آتا گواچی ءُ ہرافتا سوب ایٹمی تراک آتا زہم آک ءُ، کینسر نا ناجوڑی تیٹ ودکی بسنے، و چاگڑدی زوال دِیر ئنا غرکی و زندی فرخ ئتو سنگتی کننگ ءِ، وار وار آ پاکستانی حکومت ایٹمی آزموندہ نا زہم تا مروکا جہانی و ہندی پٹ و پول ئٹ ہڑاند شاغانے، بلکن تینا جہانی حیثیت ءِ بچفنگ کن و بلوچ گلزمین و مخلوق نا قوضہ گیری لٹ و پُل نا ڈوہ تہ رد کننگ کن۔
راست وڑئٹ چاگڑدی خرابی ودی کننگ و بلوچ ڈغار آ ہزار آ زند آتے زہمی کننگ، بھرم اینو اسکان ساڑی ءِ، دا تراک آتا سوب آن کینسر، روتینک آتا بیماریک، تھلسیمیا، زردوئی، و سِل ئنا ناجوڑیک اوار ءُ۔ افسوز کروکو تدینی ئسے النگ ئٹ، بلوچ آک دادے ریاست نا اسہ نیمہ آن بلوچ زنک ایسری نا چرجوئی پالیسی ئسے نا پن ءِ تسر، داڑان بیدس اسہ بھیم بش کروک کیمیائی و حیاتیاتی سلہہ اس، ہراکہ جہانی قانود نا رد ئٹ منع ءِ، بلوچ ہندی آباتی و اونا ڈغار آ کاریم ئٹ ہتنگک۔ جوہری آزموندہ تے بلوچستان ئٹ گچین کننگ ءِ بلوچ راج دوست کڑدہ غاک پاکستان نا نوآبادیاتی سوچ نا گواہ نا رد ئٹ تعبیر کریسر: بلوچستان ءِ بلوچ مخلوق آتا ڈغار نا وڑئٹ نہ بلکہ ریاست نا لٹ و پل نا وسیلہ ئٹ ہُننگانے او قدرتی مڈی تا دوئی کننگ یا جوہری آزموندہ تے، پاکستانی ریاست نا گام تے بلوچستان نا پاش لٹ و پل سرپد مسرہ۔“
بھارت نا جوہری آزموندہ آن 17 دے پد، پاکستان چاغی 1 نا پن ئٹ جوہری تراک آتا آزموندہ ءِ کرے، 29 مئی 1998 آ چاغی ئٹ، پاکستان دا دے ءِ یومِ تکبیر نا پن ئٹ گچین کرے، او دا دے ءِ یوم تکبیر نا پن ئٹ یات تخا، بلوچ الس دا دے ءِ تینا ڈغار آ مون آ دے پارے۔ دا تراک ءِ چاغی نا مش راسکوہ ئٹ کننگا۔ پاکستان نا میڈیا و کوالخواک دا رپورٹ ءِ دلیل تسر کہ جانی نسخان ہچ ام متنے و علاقہ ءِ ٹیسٹ کننگ آن مالؤ پاش کریسر ولے راستی داڑان اسل بھاز جتا ءِ۔ ہندی بندغ آتا ردئٹ ”بندغ آک داسکان ام کینسر، پِف نا ناجوڑی، تھلیسیمیا و ہیپاٹائٹس دا وڑ ئنا ناجوڑی تا گواچی ءُ، دلیل دادے کہ علاقہ ٹی جوہری سلہہ تا تابکاری داسکان ارے۔
پارلیمنٹ نا باسک آک بلوچستان نا علاقہ چاغی ٹی مروکا ایٹمی تراک جلہو ءِ گچین تکار ولے ہراڑان کیہی جانی نسخان و ایلو ناجوڑیک اینو اسکان ودی مننگ ءُ۔ ”بلوچستان نا ہمو وخت ئنا وزیر اعلی سردار اختر مینگل ءِ ہمو وخت ئنا وزیراعظم نواز شریف ءِ ہمو جاگہ اسکان سر کننگ کن گاڑی ءِ چلیفنگ نا کاریم تننگاسس ہراڑے کہ ایٹمی تراک آتا آزموندہ غاتے کننگاکہ۔“ میڈیا نا حوال آتا ردئٹ سردار اختر مینگل اسہ درشان ئسے ٹی پارے، ”ایٹمی تراک آتا آزموندہ غا ننے گمر ءِ و تراک آک ننا دشمن بھارت ءِ تُغ تیان بٹینو و ایٹمی تراک آتیکن بلوچستان نا ڈغار ءِ گچین کرسا ننے آ بیرہ باور آخہ بلکن دا معاملہ ننکہ اسہ بھلو شرف ئسے آن کم اف۔ پاکستان نا مسکوہی وزیر اعظم نواز شریف میڈیا تو ہیت کرسا دا قول کرے کہ چاغی و ایب کیب ئنا خلق آ تیٹی کینسر نا ہسپتال، جانجوڑی نا خیالداری کن خذمت و خوانندہ جاہ جوڑ کرون ولے افسوز کہ ہچس ہم جوڑ متو۔ اندا ردئٹ پاکستان و پارلیمنٹ باسک آک مدام بلوچ آتے دھوکہ تسنو ۔ تراک آتیان پد ناجوڑیک جون آتے ہرفرہ ہرا تیٹی گیشتر فریشانی، دماغ نا ناجوڑیک و جون ئنا ویل آک ودی مریرہ، ہرا بیرہ پیر انگا آتے آخا بلکن ورنا نسل و پاڷ اُڑوکا چنکا چناتے ہم ہرفرہ۔ داسہ نا احوال آ تیٹی اندنو چنکو چنا اریر ہرا اندا ناجوڑی تا گواچی مسنو ہرا داکان مالو اوفتا خاہوت ئٹ وختس ہم کس ءِ متنو۔
”چاغی آ ایٹمی تراک آتا زہم آک“ عبدالرزاق نا اسہ ماسٹر مقالہ اس، پاکستان نا حکومت نا بشخ جوڑ مروکا، سردار اختر مینگل و نواز شریف نا قول آتیٹی پین تضاد مونا ہتیک، ہرا ڈغاری گواچن ءُ۔ حکومت دعوی کرے کہ تراک نا ہند آن خڑک بیرہ دہ اُرا ئسر و اوفتے تراک آن مست رکھوک آ ہند آتیا سر کننگا ولے داڑان چپ، عبدالرزاق نا ردئٹ تراک آتیان چار ہزار خاہوت زہمی و بے اُرا مسر یا تو باہوٹ ہلنگ آ بیوس مسر، اوفتے ہچو آسراتی اس تننگتو و کس ءِ دا ہم سما متو کہ دا خاہوت آک ہرانگ ہنار۔ خوانندہ گل آتون اوار کیہی سیاسی و چاگڑدی باسک آک ایٹمی تراک آتا مذمت ءِ کریر۔
گچین آ بلوچ موہکش صبا دشتیاری بی ایس او آذاد نا پارہ غان بلوچستان یونیورسٹی تی اڈ تروک اسہ دیوان اسیٹی سوج اس کرے کہ ”ریاست تینا ایٹمی تراک آتیکن چاغی نا ڈغار ءِ انتئے گچین کرے؟ گواچن دادے، چاغی نا مخلوق ہڑدے تکلیف ہرفرہ۔
پاکستان پارلیمنٹ نا بلوچ باسک آک: پاکستان نا دتک آک
بلوچستان نا خاخر ”ایٹمی آزموندہ غاتا زہم آک“ تابکاری و ایمٹی مادہ غاتیان ودی مروکا نسخان آک نوشتوک و جہانی پِڑا منفوک ءُ۔ جانجوڑی نا جہانی ادارہ تابکاری تا نشان تننگ آ سخت انگا گام آتا پابند ءِ۔ دنکہ، دا سَلاہ تننگک کہ ہرا ساہدار تا تابکاری آن زہمی مننگ نا شک ءِ، اوتے مونا پین مُد نا خرابی آن رکھنگ کن زوت اس ایتھانائز کننگے، اندن غٹ ساہدار درخت آتون اوار ہرا تابکار مادہ غاتے جذب کرینو اوفتے ایسر کننگے۔ زہمی مفروکا ساہدار آتا پیہنگ ءِ توننگ آ کم آن کم یا ہچ تابکاری مفروکا علاقہ غاتے ہلنگ ءِ۔ دا رہنما خطہ آک جوہری و تابکاری نا نسخان نا چکنگ ءِ پاش کیرہ۔ 11 مارچ 2011 آن پد، چاہنداراک پارینو کہ تابکاری و جوہری تابکاری آن زہمی مروکا بندغ آتے دہ سال اسکان جوان دارو دوا آن گدریفنگے۔ جوہری تابکاری جانجوڑی کن بھلو نسخان ودی کیک، دا اسہ خوردبین گولی ئس نا وڑئٹ کاریم کیک، ڈی این اے آ جلہو کیک ہرا موروثی ناجوڑی و کینسر، ساہ ئنا ناجوڑی و ایلو ناجوڑی تا سوب مننگ کیرہ۔ دون انگا زہم آک زند ئنا بنیاتی آسراتی تیان نمن خننگانو ہرا کہ گمان آن ہم پیشن ءُ۔
بلوچستان نا علاقہ چاغی ٹی جانجوڑی نا زہم آک گیشتر و گڑتی آن پُر ءُ۔ علاقہ غان بروکا حوال آتیٹی جانجوڑی نا دا حالیت آتا بھلو کچ ئسے ٹی مونا بننگ زیات گواچی مننگ نا شاہدی ایتک۔ ہرافتیٹی پِف، جغر و دتر نا ناسور انگا ناجوڑی تون اوار سِل ئنا ناجوڑیک، زردوئی، دماغی ناجوڑی، بلڈ پریشر، خن و گُٹ ئنا ناجوڑیک اوار ءُ۔ دا حالیت نا دے پہ دے آن ودنگ ءِ کاغدی دروشم تننگانے، بروکا پولکار آتے ہندی مخلوق نا نا امیتی آن ہچو فرق اس تمپک، ہرا گیشتر زردوئی نا دارو درمان ئنا بابت سوج کیرہ۔ اسہ گمان ئسے نا ردئٹ چاغی ٹی مروکا مرگ آتیٹی مسٹ آن اسٹ تو کینسر نا سوب آن مرگ ئنا گواچی مننگ ءِ۔ پاکستان نا جوہری حکمت عملی ٹی بلوچستان نا کڑد جاچ آن پیشن ءِ۔ دا ملک ئنا جوہری سلہہ تے مُچ کننگ نا ہند جوڑ مسنے۔ حوال آتیٹی کیرتھر نا مش ئنا تہٹی اسہ بیلسٹک میزائل اڈہ و سندھ و بلوچستان نا سیم آ ڈغار نا کیرہ غان جوہری سلہہ تے مُچ تخنگ نا آسراتی ناجوڑی کن صلہ تننگانے۔ دا آسراتی ءِ اولیکو وار 2016 ٹی امریکہ نا سائنسدان آتا فیڈریشن نا ہنس کرسٹینسن مونا ایسوسس و پد آن سائنس نا ادارہ و جہانی سلامتی آ ہیت و گپ کننگاس۔ جوہری سلہہ تے مُچ کننگ نا ہند آک تینا جنگی اہمیت نا سوب آن فوجی کارندہ غاتا اختئی تیٹی بھلو ہدف مریرہ، ہراڑان دا خلیس مریک کہ ڈغار نا تہٹی کمپلیکس آ جلہو مننگ کیک، ہرا نا ردئٹ بلوچستان بھاز زہمی مریک۔ جنگی وڑئٹ پاکستان نا جہانی سیم آتیان مُر جوڑ مروک مش تا تہٹی دا کمپلیکس آک رکھوک ہند آتیا جوڑ ءُ۔ 2004 و 2010 نا نیام ئٹ جوڑ مروک آ ہند آتیٹی ہندا گمان ارے کہ ٹرانسپورٹر ایریکٹر لانچر آک ہم ساڑی ءُ۔ داٹی بجلی نا سر کننگ ہم اوار ءِ و دا دے مسہ جتا سرنگ آ تیان سر کننگنگ ءِ۔
راسکوہ آن تعلق تخوک القادر مالدین اسہ درشان ئسے ٹی دا گڑا نا شاہدی تس کہ دا تراک آتیان پد خن تا بھاز انگا ناجوڑیک ودانو ہرافتیٹی شب کوری نا ناجوڑی لس مسنے و دا وخت اسکان ننا علاقہ نا بھاز آ بندغ آک دا نا گواچی مسنو۔ سوچ بچار کروک آتا پاننگ ءِ کہ پاکستان نا جوہری سلہہ تا رکھنگ و گُرج اکن کمپلیکس نا مسخت بھلو سرسہبی ئسے، ہندوستان نا سیم آن مُری نا سوب آن دا ہند ءِ زیات رکھوک سرپند مننگک۔ تراک آتا آزموندہ نا سوب آن تابکاری زہم آتیان پف، جغر دتر نا کینسر، سل ئنا ناجوڑیک، ہڈ ئنا ہِڷ، زردوئی تون اوار بلڈ پریشر و خن تا زی آ بھاز زہم شاغنگ ءُ۔ زردوئی و دتر نا کمبتی نا ناجوڑی ٹی بندغ آتا بھلو کچ اس گواچی ءِ۔ ذہنی ناجوڑی نا کیس آتا گیشتری ئٹ ودنگ ءِ اندا نا امیتی تون گوندنگک ہرادے ہندی مخلوق مارشت کننگ کیک انتئے کہ اوفتے دا ایسر مفروکا ناجوڑی تیتون مون تروئی مریک ہرا کہ 28 مئی 1998 آن پد علاقہ ٹی تالان مسنو۔ بلوچستان ئٹی جوہری آزموندہ ءِ کننگ آن پد پیشتموکا تابکاری ہندی مخلوق نا جانجوڑی آ زیم شاغا ہراڑان موروثی ناجوڑیک ودی مسر۔ شَل چنا تا ودی مننگ ئٹ ودکی بس و بلوچستان ئٹ کینسر و سل ئنا ایلو ناجوڑی تیٹی گیشتر ودکی بس۔ پاکستان درو پنچ ایٹمی تراک کرے ہرافتیٹی چار تراک اسٹ آن الیس اِرا سیر ٹن ئسرہ۔ راسکوہ نا مش آ ایٹمی تراک 40 کلومیٹر اسکان سر مس۔ بلوچستان ئٹی دا بھس کاری کروکا تراک آتیان بندغ آتے بھاز افسوز ئسے ٹی شاغا، راسکوہ نا مٙونا مش ءِ اسہ جن اس پیہنی ٹی بدل کرے۔ جہانی لشکر جوہری آزموندہ ءِ اسہ گڑتی ئسے نا وڑئٹ ہُرک، انتئے کہ داڑان بیرہ ماحول آ زہم تمپک بلکن بھلو کچ اسیٹی بندغ آتا زند آ ہم زہم تمک۔ پاکستان نا فوج ئنا بلوچستان ئٹ جوہری سلہہ تا آزموندہ کننگ نا فیصلہ جہانی پڑا قوم ئنا عزم اکن شک آتے ودی کیک۔ راسکوہ مش ئنا دامان ئنا ہندی بندغ نور محمد پارے کہ دا تراک آتیان پد ای نوشکی آ ہمپنگ آ بیوس مسٹ، او پارے تراک آک مسر تو ننا علاقہ ٹی چشمہ غاک وہارہ ہرا سد آ سال تیان ننا رزق ئنا سوب ئسر، او تیٹی مٙونو ذرہ ساڑی ئسرہ۔ اندا دیرتے نوش کننگ آن ننا باہ غان دتر نا پڑیک بسرہ و اندا سوب آن نن اوکان ہمپنگ آ بیوس مسن، دا تراک آتیان مالو ننا نیاڑیک چنا خننگ نا وخت آ ہسپتال آتیا ہچ انتوسر و ہچو تکلیف ئسے تون مون تتویسر، تراک آتیان پد بھاز آ نیاڑیک چنا خننگ نا وختا مرگ ئنا گواچی مسر۔
کینسر: ایٹمی آزموندہی تا بھاز بھلو زہم اس، کینسر نا بھیم بلوچستان ئٹ تالان مننگ ءِ، ڈغار نا دا بشخ جوہری کوڑ کننگ و آزموندہی اِڑز آتا گواچی ءِ، بھلو کچ ئسے ٹی ریڈیشن، مرغنا آ ڈُکال آک، کینسر نا ودکی، دِیر ئنا چُٹفنگ ئٹ اوار ءُ۔ ہرافتا سوب آن خرسی و ساہدار تا پاش کاختی ودی مننگ ءِ۔ جوہری سلہہ و یورینیم نا کانڑ آتیا کشّنگ آن خُڑک ئنا خلق آتیٹ کینسر نا گیشتر مروکا بھیم آتا گواچی ءُ، مون مُستی دا کہ کیمیائی سلہہ تا زوالی آن چاگڑد ئٹ کینسر ودی کروکو مرکب آک تالان مریرہ، دافک جانجوڑی کن اسہ بھلو اڑز ئسے ءُ۔ چاغی و نوشکے ٹی 1998 آن کینسر و سِل ئنا ناجوڑی تیٹ پاش گیشتری بسنے۔ اڑزی ودشتی معذوری دنکہ ادرنگ، پوسکن ودی مروک آ چناتا رپورٹ مسنو۔ خضدار ئٹ ام کینسر نا کچ ئٹ گیشتری بسنے۔ ہرا جوہری و کیمیائی سلہہ غاتا خڑک کوڑ تا سوب آن ءُ۔
شال ئنا بولان میڈیکل کالج ئٹ کینسر ڈیپارٹمنٹ نا سروک ڈاکٹر زاہد محمود پارینے، سال 2015 ٹی 3500 بندغ و 2016 ٹی بی ایم سی ٹی 500 بندغ آ کینسر نا ناجوڑی پاش مسنے، ہرافتیان اِرٹ روتینک آتا کینسر نا گواچی ئسرہ۔ دا ناجوڑ آک چاغی، خاران، پنجگور، و گوادر نا ہندی مسنو۔ بلوچستان ئٹ کینسر آن مروکا مرگ آک ہڑدے نا ویل ءُ، ہرافک نرینہ غاتا بھلو کچ ئسے ٹی تھیلسیمیا ءِ پاش کننگ ئٹی ءُ۔
سینہ نا کینسر نا زہمیک
بلوچستان نا بھلا ہسپتال آتیکن کینسر نا علاج کن اخس کہ زر تننگانے اوفک بھاز کم ءُ۔ 2017ء ٹی وائس آف امریکہ نا اسہ رپورٹ ئسے ٹی پاننگا کہ بلوچستان نا جتا جتا انگا ہسپتال آتیٹ اِرا سال ئٹ 4000 آن زیات کینسر نا کیس رپورٹ مسر۔ ہرافتا بھلو کچ اس چُنا تا ئسکہ۔ بلوچ اُلس مدام ہرسال 28 مئی ءِ مون ءُ دے ئسے نا مثل ئٹ ہُرانے۔ تدوکا سال بھاز آ تنظیم آتے برانز کننگ آ ام خننگاسس و جہانی ادارہ و جہانی طاغت آتیان چاغی ٹی کروکا ایٹمی آزموندہی نا برخلاف کاروائی کن ام سوج ہرفسہ خننگاسس۔ ہرا کہ دنیا کن بھیم بش کروک و علاقائی و جہانی سلامتی کن بھیم ئسے۔ ایٹمی تراک آتیان پد دا لڑ برجا ءِ و چاغی نا مخلوق ءِ کینسر ہسپتال ئسے نا بھاز زیات خواست ءِ۔ تھلیسیمیا، زڑدوئی و کینسر آنبار انگا ناجوڑیک چاغی ٹی لس ءُ۔ بلوچستان نا مخلوق ہڑدے تینا جان ءِ رکھنگ نا جنگ ءِ کیک۔
جنیوا کنونشن 1949 نا آرٹیکل 3 ئٹ پاش وڑ پاننگانے کہ ”ہندی مخلوق تون بندغ تا وڑ مروئی ءِ ،اوفتیتون لٹ و کُٹ، کسفنگ یا ظالمی کروئی اف۔“ اگہ کہ دا قانود آک اِرا جہانی جنگ آتا و بھازا پین جنگ آتا وخت ئٹ ام ئسرہ۔ آزموندہی آن گُڈ پاکستان نا ہمو وخت نا وزیراعظم نواز شریف پڑو کرے کہ ”نن بھارت آن گو ءِ درین، ای اللہ نا شکرے ادا کیوہ“ ولے بلوچستان نا اُست ئٹ شش ایٹمی تراک آتیان گڈ اسہ نیم پورو میراث اس ہِلنگا۔ نواز شریف بلوچستان نا جانجوڑی، خوانندہ کاری، روڈ و انفراسٹرکچر کن سرمایہ خلنگ نا وعدہ کرے ولے اوفک اینو اسکا پورہ متوس