چاگردی
رسانکدر؛ عرب اَسپرنگ ءُ BlackLivesMatterءِ زْرمبشت
پجار
بیست ءُ یکمی کرن ءَ چاگردی رسانکدر یک تاکتوریں اوزارے ءِ ھساب ءَ دیم ءَ کیت کہ اِشی ءِ کُمک ءَ جھانی پَلو ءَ توارانی سر کنگ ءُ جیڑھانی پدّر کنگ ءِ یک وسیلگے ءِ زانگ بیت۔ھمے رنگ ءَ چاگردی رسانکدر ءِ جتائیں پلیٹ فارم ھست اَنت انچوشکہ ٹویٹر،فیس بُک،انسٹاگرام ءُ یوٹیوب کہ اِشانی برورد ءَ مرچی راج ءُ نپر رَھوتداری کننت۔پدا ھمے وسیلگ اِنت کہ ایردستیں راجانی کْوھن ءُ کدیمیں رَھوتداری ءِ ترزکارانی تہ ءَ مٹّی اَتکگ کہ مرچی ءُ باند ءَ آ وتی سرا بوؤکیں زوراکیانی کسہ ءُ داستاناں گوں اَرزانیں رنگے ءَ دنیا ءَ سر کُت کننت۔چاگردی رسانکدر ھما تاکت اِنت کہ اِشی ءِ کارمرزی ءَ ھال ءُ جاور گوں تینزی ءَ دنیا ءِ ھر کُنڈ کُنڈ ءَ یکیں دمان ءَ شنگ ءُ شانگ بنت،اَبیدء راہ ءُ رَھبند ءُ مُلکانی سیِمسراں جاور ءُ ھالانی سر کنگ ءَ ایردستیں راج ءُ زوراکی ءِ دیمپانیں مردم پہ وت ھمدردی گِپت کننت ءُ اے یک اَنچیں پتّرے کہ دنیا ءِ پلو ءَ راجانی پلہ مُرزی ءِ گرگءِ راہءُ دراں پچ کنت۔اِشاں اَبید چاگردی رسانکدر ءِ ارزشت مارا اِد ءَ ھم گِندگ ءَ کیت کہ ایردستیں راج ءُ ٹولی کہ سیاسی،چاگردی،نسلی بُنیات ءَ ایردست کنگ بوتگ اَنت ءُ سکیں مزنیں بیانہ ءِ اَلگاراں چہ سانمند اَنت۔گُڑا چاگردی رسانکدر ھمے دابیں بیانیہءُ گالاں پروش دنت،مردماں چہ ساناں رکّین ایت ءُ اِشانی گِر ءُ دار کنگ ءِ واستہ کڈّن کنت۔دگنیا ءِ جتائیں چاگردی جُنزانی تہ ءَ مارا چاگردی رسانکدر ءِ مُھکمیں کامرزی ءِ درور گِندگ ءَ کا ینت۔انچوشکہ عرب اسپرنگ ءُ black lives matter ءِ جُنزانی تہ ءَ چاگردی رسانکدر ءَ پدمنتگیں تواراناں دنیا ءَ رسینگ ءِ ھمرائی ءَ ھمے جُنزانی تہ ءَ مُھکمیں مٹّی آؤرتگ ءُ میان اُستمانی تک ءَ جُنزانی پلہ مُرزی ءُ کُمک ءِ واستہ گپ ءُ تْران پاد کنگ ءِ تہ ءَ مُھمکیں کردے پیلو کُتگ۔چوناھا چاگردی رسانکدر ایردستیں راجانی سرا مجگی بُنیاد ءَ زوراک ءِ آؤرتگیں ڈسکورساں پروش ایت ءُ گَھگیری ءِ واستہ نوکیں ھیال ءُ لیکہ دیم ءَ کار ایت کہ آ بانداتی ئیں مٹّی ءِ مانزمان بنت۔
عرب اسپرنگ
عرب اسپرنگ ڈیموکریسی ءِ منّوکیں زھرشانی ءُ مھلوکی سرکشی ءِ یک دْرچے کہ میانی رودراَتک(middle east) ءُ گوریچانی آپریکہ ءِ تہ ءَ 2010 ءُ 2011 ءِ زمانگاں بندات بیت۔بُن اسل ءَ عرب اسپرنگ ءَ ھمے دمگانی آمریں سرکارانی وجود ھترہ ءِ تہ ءَ آؤرتگ۔پرچاکہ زھرشانیانی دْرچ ءَ تُوسینیا ءُ عرب ءِ جتائیں ھند ءُ دمگانی زورآوریں سرکار گوں تْرندی ءَ وْلگوج کُتگ اَنت۔ھمے وڈ ءَ عرب اسپرنگ ءِ زھرشانیاں جتائیں عرب مُلکانی مھلوک پہ در آیگ ءَ لاچار کُتگ اَنت کہ آ آمریں سرکارانی ھلاپ ءَ پاد بیا اَنت ءُ یکمُشت بہ بنت۔بلے سرجمیں ھند ءُ دمگانی تہ ءَ زھرشانی سوبمند نہ بنت۔پرچاکہ مھلوک ءِ کسان کسانیں سیاسی ءُ گُزرانکی گِلگ ءُ ناچیکیانی بُنیات ءَ چست بوتگیں ھما زھرشانی آمریں ریاستانی نیمگ ءَ گوں لٹ ءُ کُٹ ءُ تشدد ءَ جواب دیگ بنت۔
جاسمین آشوب
بن علی ءِ دزکشی
جاسمین آشوب ءِ مُز
مصر ءِ 2011 ءِ سرکشی
مصر
سرکشی ءِ ڈلگ ڈلگیں وئیل
17
جنوری 2011؛ ءَ یک مصری
مردے ءَ کائیرو ءِ پارلیمان ءِ دیم ءَ وترا مُلکی سرکار ءِ زوراکیانی بگیریءَ
مانداشت۔
25
جنوری 2011 ؛ءَ لس
مھلوک ءَ کائیرو ءُ دگہ جتائیں شھرانی تہ ءَ تنگ دستی ءُ سیاسی بالادستی ءِ ھلاپ
ءَ زھرشانی کُت۔زھرشانی کنوکاں مُبارک ءِ ھلاپیں اوگام جت ءُ گوں پولُوس ءَ اَڑ
اِت اَنت۔گُڑا پولُوس ءَ رد عمل ءَ زھرشانی ءِ سرا آپ برشانت ءُ آرس کَشیں گیس
کارمرز کُت۔
28
جنوری 2011 ؛ ءَ آدینگ(جمعہ) ءِ نماز ءِ وھد ءَ
سرکار ءِ ھلاپیں زھرشانی تواندار بنت ءُ گوں پولُوس ءَ گْور ءُ گْورجیگ بنت۔گُڑا اِشی
ءِ سْوب ءَ مصر ءِ موبائل نیٹورک ءُ انٹرنیت ءِ آسراتی بند کنگ بنت دانکہ زھرشانی
کنوکیں مردمانی بیانیہ ماں رسانکدر ءَ جاہ گِپت مہ کنت۔ھمے رنگ ءَ مُبارک مُلک ءَ کرفیو
جنت ءُ آرمی یونٹاں ھر دمک ءُ دراں اوشتارین ایت دانکہ زھرشانیانی دیم دارگ بہ
بیت۔گُڑا بازیں لٹ ءُ کُٹانی سْوب ءَ ماں کائیرو ءَ این ڈی پی ءِ ھیڈکوارٹر
ماندارگ بیت۔وھدے کہ تشدد ءُ زُلم ءُ زوراکی داں شپ ءِ نِسپءَبرجم مان ایت۔گُڑا
مُبارک نیشنل چینل ءَ کیت ءُ وتی سرکار ءِ
یل کنگ ءِ جار ءَ جنت۔
29 جنوری 2011؛ 30 سال ءِ میان ءَ
مصر ءِ سدر مُبارک وتی نزیکیں ایڈوائزر عمر سلیمانءَ جنرل انٹلی جنس سروس ءِ
ڈاریکٹر گچین کنت ۔ھزارانی کچّ ءَ زھرشانی کنوکیں مردم تاھر اسکوائر ءَ نِندنتءُ
وتی بُنجل کنت ئے ءُ وھد وھد ءِ سر ءَ گوں پولُوس ءَ گِر ءُ چیل بنت۔
یمن ءِ 12-2011
ءِ سرکشّی
یمن ءِ مھلوک سدانی ھساب ءَ ماں یمن ءِ شھر سنّاء ءَ مُچ بوت اَنت ءُ سالح ءِ ھلاپ ءَ زھرشانی کُت اِش ءُ سڑکانی سر ءَ درکپت اَنت دانکہ سالح وتی اُگدہ ءَ چہ دزکش بہ بیت۔زھرشانی کنوکاں جمہوری ءِ اوگام جَت ءُ آیاں نیزگاریءُ سرکاری کرپشن ءِ سر ءَ ایراد گِپت۔گُڑا مصر ءُ تنسانیہءِ زھرشانی کہ یک بُنجائی رَھشونی ءِ بُنیاتءَ بوتگ اَنت بلے یمن ءِ زھرشانی ءُ جمہوری ءِ منّوگریں مردمانی سروک یمن ءِ پارلیمان ءِ ھستیں سرکار ءِ ھلاپیں ٹولیاں کُتگ اَنت۔ھمے وڈ ءَ یمن ءِ زھرشانی کنوکیں مھلوک ءُ پولُوس ءِ میان ءَ سک کم تشدد بوتگ۔گُڑا سالحءَ جاورال ءِ سازگاری ءُ زھرشانی کنوکیں مھلوک ءِ دیم ءِ دارگ ءِ ھاترا گُزرانکی ءُ روزیگی ریایت دات کہ آ انکم ٹیکس ءَ کم کنت ءُ سرکاری کاردارانی پگارءَ ودین ایت۔اِشی ءَ اَبیدسالح ءَ سوگند وارت کہ دوبر سدریءِ واستہ گچینکاریءَ بھر نہ زُور آں ءُ منی زَھگ ھم ھچبر منی تھت ءِ سرا نئیت ءُ نہ نند ایت۔بلے زھرشانی کنوکیں مھلوک سالح ءِ اے کسم ءُ سوگند ءُ ریایتاں چہ دلجم نہ بوت پرچاکہ 2006 ءِ زمانگ ءَ سالح ءَ ھمے دابیں سوگند وارتگ کہ من گچینکاری ءَ بھر نہ زُور آں بلے آ وتی داتگیں زُبان ءَ چہ پُشت کنز اِتگ۔
دگانی سرا در اَتکگیں مھلوک ءَ سالح ءِ کُتگیں ریایت ءُ سوگند ایر جت اَنت ءُ ھمک روچ زھرشانی ءُ روانک اِش کش اِت۔گُڑا ھمے روانکانی میانءَ زھرشانی ءِ مھلوک ءُ سالح ءِ پلو ءَ اوشتاتگیں مردمانی نیام ءَ اَڑ ءُ کُڑ برجم اَت ءُ زھرشانی کنوکانی سرءَ سالح ءِ دوزواھاں گوں سِنگ ءُ لٹاں اُرش کُت۔20 فروری ءَ یمن یونیورسٹی ءِ نودربر ءُ زُوتاں پارگ بوتگیں نودربراں سنّاء کیمپس ءِ دیم ءَ نندانک جت ءُ ھمے لوٹ کُت دانکہ سالح چہ وتی اُگدہءَ دزکش نہ بیت۔گُڑا ما وتی زھرشانیءُ نندانکءَ ھلاس نہ کن ایں۔گُڑا سالح ءَ اے لوٹ نہ منّ اِت ءُ ھمے گُشت کہ منی دزکشی مُلک ءِ تہ ءَ ھیّرانپوسکی ءِ جاورے پیدک کنت۔
مارچ ءِ بنداتءَ زھرشانی ءَ نشتگیں مھلوک ءُ پولوس ءِ میان ءَ اَڑ ءُ کُڑ ءَ شُول کش اِت ءُ بازیں مردمے بیران بوت۔گُڑا سالح ءَ 10 مارچ ءَ دوبر زھرشانی کنوکیں مھلوک ءَ را بیسہ دات کہ من یک نوکیں رَھبندے کار آں کہ آ سال ءِ ھلاسیءَ پیسر مُلک ءِ تہ ءَ عمل درآمد کنگ بیت۔بلے زھرشانی کنوکاں ھچ وڈ ءَ اے گپ مان نیاؤرت ءُ ھمے لوٹ کُت کہ سالح زُوتاں زُوت چہ وتی اگُدہ ءَ دزکش بہ بیت۔
یمن ءِ سرکارءِ چیردستیءَ سکیورٹیءَ لس مھلوک گوں تْرندیءَ لَٹ ءُ شاپ کُت۔گُڑا ھمے سْوبءَ ھستیں سالحءِ سرکارءِ سرءَ آئیءِ کابینہءِ مردمانی بیسہ پُرشت۔ھمے جاورال ءِ بُنیاتءَ سالحءِ تاکت ءُ مھار نزورتر اِت۔گُڑا 18 مارچءَ سالحءِ پلو ءَ اوشتاتگیں مردماں زھرشانی کنوکیں مھلوکءِ سرا تچکاں تچک تیرگْواری کُت کہ چہ اِشی ءَ 50 مردم بیران بوت۔ھمے تشددءِ سْوب ءَ سالح ءِ سرکاری مردم کہ آیانی تہ ءَ سپارتکار،کابینہ باسک ءُ پارلیمان ءِ باسک ھوار اَت اَنتءُ آ چہ وتی زمہ واریاں دزکش بوت اَنت ءُ زھرشانی ءَ نِشت اَنت۔گُڑا 20 مارچ ءَ پوجی کماندار میجر جنرل علی مُحسن العمارءَ سرکارءِ ھلاپءَ اوشتاتگیں مردمانی کُمک ءِ جار جت ءُ ھمے واھشت پیشداشت کہ آ وتی پوج ءَ زھرشانی کنوکیں مردمانی پھازگءَپہ کارمرز کنت۔چوناھا العمار یمن ءِ تہءَ یک تاکتوریں پوجی کماندارے ءِ بستارءَ زانگ بوتگ۔گُڑا آئی ءِ ھمے عمل ءِ پُژدرءَ بازیں پوجی آپیسرے سانمند بوت ءُ آیاں ھم ھمے جار پرّینت کہ ما ھم زھرشانی کنوکیں مردماں رکّین ایں۔
22 مارچ ءَ سالح پدا چہ وتی دزکشی ءَ انکاریگ بوت ءُ ھمے گُشت ئے کہ من وتی اُگدہ ءَ چہ جنوری 2012 ءَ پارلیمانی گچینکاری ءَ پد دزکش بنت۔بلے اِشی ءَرا سرکار ءِ ھلاپ ءَ اوشتاتگیں مردماں پدا ایر جت۔گُڑا سالح ءَ را ھستیں جاورالءَ بیوار کُتگ اَت۔پمیشکہ سالح پوجی سروک،سیاسی رَھشون ءُ کُٹُمی اسپیت ریشیں مردمانی گوما نند ءُ نیاد بندات کُت دانکہ لھتیں شرتانی بُنیاتءَ وتی دزکشی ءِ پیسلہءَ بکنت۔بلے 26 مارچ ءَ اَنچیں ھال شِنگ اَت اَنت کہ سالح چہ وتی اگدہ ءِ دزکشی ءِ تیاری کنگ ءَ اِنت ءُ ھمے گُشتگ ئے کہ من تاکت ءَ مُگیمیں مردمے ءِ دست ءَ دیاں دانکہ مُلک چہ انتشار ءُ بے پاداری ءَ بہ رکّ ایت۔اے ھالانی شِنگ بوئگ ءَ اَبید 28 مارچ ءَ سالح گوں تمردی ءَ کیت ءُ گُش ایت کہ من ھچ وڈ ءَ چہ وتی اگُدہ ءَ دزکش نہ باں ءُ نئیکہ سرکار ءِ ھلاپیں مردمانی لوڈ ءَ رازیءُ بازیءِ نیمگءَ رو آں۔
3 جون ءَ سالح بمبے ءِ زد ءَ کیت ءُ ٹپی بیت۔گُڑا دومی روچ ءَ آ سعودی ءَ پہ اِلاج ءِ واستہ برگ بیت۔گُڑا آ وتی کمک کارمستر(وائس پریزیڈنٹ) منصور ھادیءَ وتی ساڑی نہ بوئگ ءِ بُنیاتءَ ایکٹنگ سدر ءِ ھساب ءَ سرجمیں زمہ واریاں دنت۔یمن ءِ سرکار ھمے بُنیات ءَ جارے پرّین ایت کہ سالح زُوتاں واتر بیت ءُ وتی کاراں پدا بندات کنت۔بلے سرکار ءِ ھلاپیں مردماں ھمے موہ پہ وتی پائدگانی واستہ کارمرز کُت کہ آ یک اَنچیں منگ نامگے ءِ نیمگ ءَ برونت دانکہ چہ اِشی ءَ آ سالح ءَ چہ تاکت ءَ دزکش کُت بکننت۔
بلے سالح ءِ اِد ءَ نہ بوئگ ءَ اَبید ھم سرکار ءِ ھلاپیں مردمانی منّگ نامگ ءُ واھشت ناسرجم بوت اَنت۔ھمے سال ءِ ستمبر ءِ ماہ ءَ سالح ءِ دوزواھیں مردم ءُ زھرشانی کنوکیں مھلوک ءِ میان ءَ جنگ بنا بوت۔گُڑا اے مردمانی وت ماں وتی جنگے ءِ نیمگ ءَ روگ ءِ تُرس ءِ سْوب ءَ سالح 23 ستمبر ءَ واتر یمن ءَ اَت۔
نومبر
23 ءَ بازیں گند ءُ ننداں چہ پد سالح ھمے منّگ نامگ ءِ سرا دزرند جَت کہ آ تاکت ءَ
مُلکءِ کمک کارمسترھادی ءِ دست ءَ بدنت۔گُڑا ھادی 25 فروری 2012 ءَ اولی رند ءَ
سوگند وارت ءُ سدری ءِ اُگدہ ءِ سرا نِشت۔
یمن سرکشّی 12-2011 ءِ ڈلگیں وئیل
20
مارچ 2011 ؛ گُڑا سالح ھاشِد کُٹُم ءِ سروک صادق العمارءَ چہ وتی کابینہءَ
کشّ ایت۔
23
مئی 2011؛ گُڑا سالح ءُ صادق
العمار ءِ مردمانی میان ءَ یک لس جنگے بنا
بیت۔
29
مئی 2011 ؛ اسلامی باگی زنجبار میتگ ءَ اَنگیر کن اَنت ءُ
ھمیشی ءِ سْوب ءَ سرکاری ءُ زَنجبار ءِ مھلوک وتی لوگ ءُ جاگھاں یل کننت ءُ
رونت۔گُڑا مردماناں ھمے تُرس بیت کہ اے اَنگیر
ءُ یمن ءِ انتشار وڈے نہ وڈے ءَ عربیئن پننسولہ ءِ تہ ءَ القادہ ءَ پائدگ
دات کنت۔
Black
Lives Matter
بی ایل ایم ءِ جُھدکاراں آمریکہ ءِ جتائیں شھرءُ میاں اُستمانی پلو ءَ مزن ءُ سانمندیں زھرشانی اَڈ داتگ۔اے یک بُنجائی رَھشونی ءَ اَبید ھما زْرمبشت اِنت کہ آ جتا جتائیں لس ٹولیانی ھواری ءَ جُنزینگ بوتگ۔ھمک لس ٹولی گوں بی ایل ایم ءَ بندوک بوتگ کہ آ را سرجمی ءَ یک جھانی نیٹورکے ءِ بستار ءَ یک لس اُگبالانی گلے ءِ جھتءَ رُدوم داتگ اِش کہ آئی ءَ آمریکہ،کینیڈا ءُ یوکےءَ آرگنائزڑیں دابے ءَ وتی سُر ءُ پُر برجم داشتگ اَنت۔بی ایل ایم 2013 ءَ ماں لس چاگردی رسانکدر ءَ گوں (Black Lives Matter) ءِ ھش ٹیگ ءِ کارمرزی ءَ یک آونلائن پروگرامے ءِ بُنیات ءَ سے مردمانی چیردستی ءَ( Patrisse Khan Cullors،Alicia Garza ءُ Opal Tometi )ءَ دیمءَ آرگ بوتگ۔گُڑا آیاں جورج زیمرمن(آمریکی جاھمنند)ءِ یک دست گوشیں سیاہ پوستیں مردمے ءِ سر ءَ تیرگْواری کنگ ءِ بُنیات ءَ بی ایل ایم وجود ءَ آؤرت۔وھدےکہ زیمرمن ءَ سیاہ پوستیں مارٹن ھما کالونی ءِ کمپان ءِ تہ ءَ گرد ءُ چرّ ءَ دیست۔گُڑا زیمرمن آئی ءِ سرا شکیگ بوت ءُ آئی ءَ پولُوسءَ را پون کُت۔بلے پولُوس ءِ نیمگ ءَ زیمرمن ءَ ھمے گوشگ بوت کہ تو ھچ مکن۔بلے اِشی ءَ اَبید ھم زیمرمن مارٹن ءِ دُمب ءَ کپت ءُ گوں آئی دپ جنگی ئے کُت ءُ پدا مارٹن ءَ تیر ئے جت ءُ کُشت ئے۔وھدےکہ پولُوس رست گُڑا زیمرمن ءَ گُشت کہ منی سرا مارٹن ءَ اُرش کُتگ۔پمیشکہ من وتی رکّینگ ءِ ھاترا آئی ءِ سرا تیرگواری کُتگ۔
اے وئیلءَ پد ھم زیمرمن گوں آزادی ءَ تْرگ ءَ اَت۔بلے مارٹن ءِ کوش ءَ لس مھلوک ءِ دلگوش وتی نیمگ ءَ آرت۔گُڑا آمریکہ ءِ جتائیں ھند ءُ دمگاں زھرشانیانی یک دْرچے بنا بوت کہ اِشانی لوٹ زیمرمن ءِ گرپتاری اَت۔گُڑا 2012 ءَ زیمرمن کوش ءِ کیس ءَ گرپتار کنگ بوت۔سالے ءِ چارءُ بچار ءَ پد ھم زیمرمن ءَ ھمے گُشت کہ وتی رکّینگ ءِ ھاترا آئی ءَ مارٹن ءِ سرا تیرگْواری کُتگ۔ھمے وڈ ءَ پولُوس ءِ دستاں چہ دو دست ءُ گوشیں سیاہ پوست( Eric Garnerءُ Michael Brown )کُشگ بنت۔گُڑا ھمے مستریں سْوب اَت کہ بی ایل ایم سرجمیں جھان ءَ شنگ ءُ تالان بیت۔گارنر اسٹیٹ آئیلینڈ بیران بیت وھدےکہ یک اسپیت پوستیں پولُوسے گارنرءَ لوپ کنت ءُ کُش ایت۔گُڑا گارنر ءِ کوش ءِ وئیل تامُر کنگ بیت ءُ ھمے تامُر چاگردی رسانکدرءَ بلائیں جاھے گِپت۔ھمے داب ءَ براؤن کسان سالیں سیاہ پوستیں مردمے کہ آئی ءِ سرا یک اسپیت پوستیں پولُوسے تیِرگواری کنت ءُ کُش ایت ئے۔اِشانی کوشاں سرجمیں ھندی ءُ میاں اُستمانی پلو ءَ یک مُھکمیں دلگوشے گِپت۔گُڑا ھمے دلگوش ءِ بُنیات ءَ بی ایل ایم ءَ گوں مزنیں آبادی ءَ زھرشانی ءُ روانک مُھکماں مُھکمتر کُت اَنت ءُ آیاں پولُوس ءِ دست ءَ بندیگیں سیاہ پوستیں مردمانی یلہ کنگ ءِ ھم لوٹ کُت۔
مئی 2020 ءَ George Floyd یک سیاہ پوستیں مردمے کہ آئی ءِکوش اسپیت پوستیں پولُوس Derek Chuvine ءِ دستاں بیت۔ڈیریک وتی لگت ءَ فلوئِڈ ءِ گردن ءِ سرءَ داں 9 ملٹ ءَ گیش ایر کنت۔گُڑا فلوئِڈ کُوکار کنت کہ منی ساہ پُر بوئگ ءَ نہ اِنت۔ھمے میان ءَ اے عمل ریکاٹ کنگ ءُ چاگردی رسانکدر ءِ تہ ءَ شِنگ ءُ تالان کنگ بیت ۔فلوئڈ ءِ اے کوش مزنیں زھرشانی ءِ دْرچے آمریکہ ءُ دُنیا ءِ جتائیں ھند ءُ دمگاں بندات کنگ ءِ سْوب زانگ بیت۔اے کوشانی وئیلاں آمریکہ ءِ مھلوک ءِ مجگ ژڈامبینت ءُ دُنیا ءِ ھیال ءُ لیکہ مٹ کُت اَنت کہ چہ آئی ءَ سیاہ پوستانی زْرمبشت ءَ را گیشاں گیش پلہ مُرزی جھانی پلوءَ رَست ءُ آمریکہ ءُ چاگردءَ نسل پرستی ءِ بیماری پدّر کُت۔گُڈسر ءَ 2021 ءَ ڈیریک ،فلوئڈ ءِ کوش ءِ پاداشت ءَ دزگیر کنگ بوت۔
بی ایل ایم ءِ زْرمبشت ءُ چاگردی رسانکدر ءِ کرد
بی ایل ایم ءِ تہ ءَ چاگردی رسانکدرءَ مزنیں کردے پیلو کُتگ
کہ اِشی ءِ کُمک ءَ سرجمیں دُنیا ءَ ھوار ھاس آمریکہ ءِ تہ ءَ نسل پرستی ءُ
زھرشانیانی آرگنائز کنگ ءِ بابت ءَ مھلوک ءَ را سرپدی داتگ۔بُن اَسل ءَ اے زْرمبشت
ءِ جند یک ھش ٹیگے" black lives matter "ءِ کارمرزی ءَ
گوں سرجمیں دُنیا ءِ کُنڈ کُنڈ ءَ سیاہ پوستیں آمریکہءَ آپریکیانی کوش ءِ بُنیات
ءَ شِنگ ءُ تالان بوتگ۔اے ھیش ٹیگ سادگ بلے سکیں تاکتوریں گالردے بوتگ کہ اِشی ءِ
کُمک ءَ دُنیا ءُ جھان ءِ لس مھلوک ءِ تہ ءَ اے درگت ءَ سما یے آؤرتگ ئے کہ آ
زھرشانی ءُ روانکانی چست بوئگ ءِ مانزمان
بوتگ۔چاگردی رسانککدر ءِ وسیلگ ءَ اے بیانیہ گوں تْرندی ءَ شِنگ ءُ تالان بوتگ کہ
اِشی ءَ بی ایل ایم ءَ را ڈی سنٹرالائزڈ ءُ جھانی زْرمبشتے جوڑ کُتگ۔
چاگردی رسانکدر ءِ چم گِندی ھاسیت ءَ پولُوس ءِ تشدد دیم ءَ
آؤرتگ اَنت۔اگاں چاگردی رسانکدر ءِ اے ھاسیت مہ بوتیں گُڑا بگند ئے بی ایل ایم ءَ
اینکسیں نامداری یے نہ کٹّ اِتگ اَتءُ بوت
کنت کہ سیاہ پوستانی کوش ءِ وئیل ڈالچار کنگ بوتگ اَت اَنت۔ھمے وڈ ءَ چاگردی
رسانکدرءَ زھرشانیاناں کوریج داتگ۔انچوشکہ فلوئِڈ ءِ کوش ءَ ماں دُنیا ءَ نسلی
نابروری ءِ گُپتمان دیم ءَ آؤرتگ اَت۔وھدےکہ فلوئڈ ءِ گردن ءِ سرا اسپیت پوستیں
پولُوس ءِ لگت ایریں اَکس ءُ تامُر شِنگ بیت کہ آئی ءِ تہ ءَ فلوئِڈ ءِ گُڈی دانک
ھمے بنت کہ "منی ساہ پُر بوئگ ءَ نہ اِنت"۔گُڑا ھمے وئیل نسل پرستی ءِ یک
چیدگے جوڑ بیت ءُ لس زھرشانیانی ودینگ ءِ بُنکی سْوب زانگ بیت۔
چاگردی رسانکدر ءَ جُھدکاراناں ھمے کِشک ءِ شون دات کہ آیاں
ھمے پلیٹ فارم ءِ کارمرزی ءَ گوں تچکاں تچک ھما وئیلانی اَکسکاری کُت کہ چہ اِشی
ءَ مین اسٹریم میڈیا ءِ آؤرتگیں وتگڑیں گُپتمان ءُ بیانیہ رَد کُت اَنت۔انچوشکہ"
SayHerName "ءِ ھیش ٹیگ ءَ سیاہ پوستیں زالبولے ءِ کیس دیمءَ آؤرت کہ آ اسپیت پوستیں
پولُوسے ءِ تشدد ءِ زَد ءَ اَتکگیں زالبولے بوتگ۔دومی اِش اِنت کہ" BlackOutTuesday "یک چاگردی رسانکدر ءِ بلیک آؤٹے کہ اِشی ءِ مکسد دنیا ءَ را نسلی
نابروبری ءِ بابت ءَ سرپدی دیگ۔ھمے رنگ ءَ چاگردی رسانکدر ءَ بی ایل ایم ءِ
زْرمبشت ءَ را جھانی پلوءَ سر کنگ ءِ ھاترا بُنجائی تاکتے بکشاتگ۔
آسر
چاگردی رسانکدرءِ سائنسی دیمرویءَ بیستءُ یکمی کرنءِ سیاسیءُ راجمانی ایکٹیوازمءِلینڈاسکیپءِتہءَ مزنیں مٹّی آؤرتگ۔انچوشکہ چہ" عرب اسپرنگ"ءُ " BlackLivesMatter"ءِ رسانکدری زْرمبشتانی سببءَ پاد اَتکگیں اُلسی زھرشانیاں ھمک مردماناں موہ دات کہ آ ڈیجیٹل پتّرانی کُمکءَ آمریں ءُ زوراکیں سرکارانی شِنگینگ،دمتوسیں تواراناں زِند شکسایگءُ جھانی تَکءَ پہ وت پلہ مُرزیءِ گِرگءَ سانمندیں کردے پیلو بکننت۔اے ھما کار بوتگ اَنت کہ زیکیں وھدءَ اِشانی ھیال کنگ ھم نہ بوتگیں گپے بوتگ۔ عرب مُلکانی تہءَ چاگردی رسانکدرءَ پہ مھلوکءِ چِنگءُ نزّارگ،ناروائیانی دیمءَ آرگءُ میان اُستمانی پلوءَ دلگوشے گِرگءِ واستہ بلائیں کردے پیلو کُتگ۔ھمے وڈءَ آمریکہءِ چاگردءَ بلیک لائیبز میٹرءِ زْرمبشتءَ ھیش ٹیگ،تامُرءُ اَکسانی شِنگءُ تالانیءَ چہ نسل پرستیءِ بیماری شریں رنگےءَ پدّر کُتگءُ پہ زھرشانیاں بلائیں مھلوکے مُچ کنگءَ سوبین بوتگ۔اے زْرمبشتاں چہ ھمے زاھر بیت کہ ایوکءَ چاگردی رسانکدر یک راجمانی مٹّی یے آؤرت نہ کنت بلکیں اے یک پُھلےءِ رنگءَ مردماناں گوں یک ءُ دومیءَ نزیک کنت۔چاگردی رسانکدر زْرمبشتانی کُمک کنت کہ آ شِنگءُ تالان بہ بنتءُریاستانی گرپتءِ بیانیہءَ آجو کنگءِ ھواریءَ یک مُچانکی سما یے آرگءَ چاگردی رسانکدر وتی تہءَ مزنیں تاکتے داریت۔