باباخیربخش مری بلوچ جنز ءِ بزرگیں سرمچار (اداریہ)

 

باباخیربخش مری بلوچ جنز ءِ بزرگیں سرمچار

بابامری ایوک ءَ یک نامے نہ یے بلکیں بلوچ سیاسی راجدپتر ءِ تہ ءَ یک سرجمیں آشوبی پگرے۔ بابامریءِ سیاستءَ اگاں مہ بچار ایں گڑا بنجاہی پروگرام باباءِ نزءَ راجدوستی انت کہ بلوچءَ چہ دُژمنءَ رکینیت۔ بابامری بلوچ سیاستءِ تہءَ ہما رھشون انت کہ پہ بلوچءَ سیاست تنگ بوتگ پاکستانءَ بلوچءِ تحریک ھلاس کنگءِ جہد کُتگ بلے بابامری دُژمنءِ دیماءَ چو کوہءَ مِک بوتگ۔ بلوچ راجدوستیءَ را بابامریءَ سائنسی رنگے داتگ۔ بلوچءِ جنگءَ چہ قبائلی دورشمءَ در کنگ ءُ سرجمءَ راجدوستیءِ بنیاتءَ آرگ بابامریءِ یکشلیں جہد زانگ بیت۔ بابامری بلوچ سیاستءِ تہءَ ہما آشوبی کارست انت کہ بلوچ جنگ بلوچ راجدوستیءَ را سائنسی رنگے داتگ ئِے۔ بابامریءَ بلوچءِ راستیں راجدوستی چہ وتگڑیں راجدوستی ءُ موقع پرستیءِ سیاستءَ کشیتگ ءُ یک سیاسی پروگرام ءُ میشنےءِ دُروشمءَ دیمءَ آؤرتگ۔

بابامریءِ کرا بلوچءِ سیاسی پروگرام چی انت، بابامری راجدوستیءَ را بلوچ ءِ بقاء ءُ راجی نپانی بنیاتءَ گیشینت۔ راجدوستیءَ گوں بندوکیں سیاستءِ اندرءَ ھما راج کہ آئیءِ گورءَ یک آشوبی ءُ مزنیں پروگرامے مہ بیت گڑا آئیءِ راھشون ءُ راھدربراں پہ الؑمی انت آ مزن پگر ءُ مزن بالاد بہ بنت۔ سرسری ءُ کسانیں جیڑھاں گوں بندوکیں کار سیاست بلکیں گُشگ بہ بنت بلے اشاںءَ راجدوستیءِ سیاستءَ گوں بندوک کنگ ردی یے۔ مچانکی دورشمءَ راجدوستی ھما وھدءَ ردوم زرت کنت کہ مردمےءِ بوگ ءُ نہ بوگءِ باوست مہ بیت بلکیں کلیں مردمانی اندرءَ رستگیں پگر کار کنگ ءِ بودشت بہ داریت ءُ پہ منزلءَ سر بوگءِ ھاٹیگے وجود بہ داریت۔

وتگڑیں راجدوست یاکہ موقع پرستیءِ سیاست کنوکاں یک زمانگے ءِ بلوچ سیاستءِ تہ ءَ جاگہ کُتگ پہ درور غوث بخش ڈاکٹر مالک اختر مینگل ءُ اشاں بلوچ راجدوستیءِ داوا کُتگ گڑا بابامری راجدوستیءِ پروگرامءِ نزءَ ایوکءَ پنجاپیءِ جھگیر انت ءُ پنجاپیءِ مرزیءَ چہ سیاست کنگءَ انت بلوچ راجدوستیءِ جھگیر ہما سرمچار انت کہ وتی سراں دیگءَ انت۔ بابامری وتگڑیں راجدوستانی باروا گُشیت کہ اے ھیمش انت برے وتءَ را راجدوست گُش انت برے سوشلسٹ برے تبکانی اوگاماں جن انت۔ برے وتءَ را مسلمان گُش انت بلے راستیءَ اچ نہ انت ایوکءَ پنجاپیءِ جھگیر انت۔ بابامری گُشیت کہ یک نیمگے ءَ ھمے بوجیگاں سوار انت ءُ دومی نیمگءَ ھمے بوجیءِ ماندارگءِ گپءَ ھم کن انت بزانکہ مہلوکءِ دیمءَ وتءَ را راجدوست پیش دارنت ءُ بلوچ راجدوستیءَ را ھلاس کنگءَ ھم ھوار انت۔

بابامریءِ بلوچ جنزءِ باروا بنجاہی ھیال راجدوستی انت ءُ بلوچءِ جنگءَ چہ قبائلی تضادءَ کشگ انت، بابا گُشیت کہ اے نہ انت کہ قبائلی جیڑہءَ بلوچءِ کرا وجود نیست بلے بلوچ جنزءِ تضاد گوں قبائلاں نہ انت بلکیں بلوچءِ تضاد گوں چودریءَ انت بزانکہ گوں پنجاپیءَ انت۔ بلوچ راجدوستیءِ پروگرامءِ سرءَ تران کنگءِ وھدءَ بابا اے ھم گُشیت کہ راجدوستی بنیاتی پیزءَ انت۔ بلوچءَ نوک سرءَ وتی سر چست کُتگ پہ جنگءَ۔ءُ راجدوستیءِ راہ سک گران انت اشکراں گوں گوازی انت ءُ اشکراں گوں گوازی ارزان نہ بیت بلکیں اشیءِ یک نہادے دیگی انت۔ نو گڑا تو دُژمنءَ چہ وتی زمینءَ چہ کشگءِ لائک بئے۔ بہ گُپت واجہ تالپور راجدوستیءِ راہءَ نہادے  دیگی انت۔ ھمے نہاد بابامریءَ داتگ ءُ بلوچ راجءَ را یک مچانکی سوچےءِ دیگءَ سوبین بوتگ۔ مرچی باباءِ راجدوستیں سیاسی پروگرام راستیءَ بلوچ سیاسی ورنا ءُ سرمچاراں گوں انت ءُ وتی بانداتءَ شوھازگءَ انت۔

بلوچی زبانءِ آشوبی شاعر واجہ مبارک کازی گُشیت

جنگجاہ ءِ بزرگیں سرمچار

جی بات گریشگءِ میریں بچ

تو گوں کُنگریں بالادءَ

ریزینت زندمان سرکرزاں

پیمان بست بلوچی لبزاں

دائمءَ پہ وتن دیمءَ ئے

بابامریءِ زند سرجمءَ پہ یک بلوچےءَ درسگاہے ءُ بابامری بلوچاں ہمے کلوہءَ دنت کہ پہ زمین کار کنگءَ ھچ دل مہ جن اِت۔ ءُ بابامری بلوچءِ باروا گُشیت کہ وھدے کہ میر مہراب ھانءِ یک پُسگے ھم بہ بچیت آ گوں دُژمناں جنگ دنت۔