ایکسٹرنیلٹی: بلوچ راج ءِ سر ءَ آئی ءَ سان
نبشتہ کار: ابابگر بلوچ
پجار:
اے دیدانک نیو کلاسیکل اکنامسٹ الفرڑ مارشل ءَ 1890 ءَ وتی چاپ بوتگیں کتاب principles of economics ءِ تہ ءَ دیم ءَ آؤرتگ۔ الفرڈ مارشل ءَ چہ پد آرتھر پیگو ءَ وتی کتاب The economics of welfare ءِ تہ ءَ ھم ھمے دیدانکءِ بابت ءَ نبشتہ کُتگ۔پیگو ءَ ھمے دیدانک ءِ جند ءَ را گیش گیشینتگ ءُ پراہ ءُ شاھگان کُتگ۔آئی ءَ استان ءِ کرد گیشینتگ کہ اے وھد ءَ استان ءِ چی زمہ واری بنت۔
اگاں دو مردم یا کمپنی ءِ میان ءَ یک transaction یے بہ یبت ءُ ھمے transaction سیمی مردم ءِ سر ءَ سان دور بہ دنت, سیمی مردم ءِ سرا کپتگیں سان ایکسٹرنیلٹی گُشگ بیت۔چوناھا ایکسٹرنیلٹی دو وڈ ءِ بوت کنت۔اولی ھَرابیں ایکسٹرینلٹی اِنت ءُ دومی شریں اکیسٹرنیلٹی اِنت۔پہ درور اگاں یک میتگے ءِ تہ ءَ یک کمپنی یے ھست ءُ ھمے کمپنی ءِ مشینانی دُوتاں چہ ھما میتگ ءِ مردمانی سرا ھرابیں سان کپیت ءُ مردم نادْراہ بنت۔گُڑا ایشی ءَ ھرابیں ایکسٹرنیلٹی گُش اَنت۔دومی نیمگ ءَ اگاں یک ھندے ءَ کمپنی کار کن انت۔گڑا آ ھند ءِ مردمانی واستہ نوکری ءِ موہ گیش بنت ءُ آ کمپنی چاگرد ءِ دیمروی ءَ کردے پیلو کُت کنت۔بلے اد ءَ یک چیزے یات کنگ بہ بیت کہ شریں ایکسٹرنیلٹی تھنا آزاتیں اِستانانی تہ ءَ پریکٹس کنگ بیت ءُ کالونیانی تہ ءَ مُدامی ھرابیں ایکسٹرنیلٹی پریکٹس کنگ بیت۔پرچا کہ کَبزہ کُتگیں جاگاھاں کمپنی کہ کار کن انت۔آیانی مکسد تھنا لُٹ ءُ پُل ءُ زرّ ءِ کَشّگ اِنت ءُ کبزہ گیریں ریاست ءِ مکسد ھم تھنا ھمیش انت۔ایشاناں گوں چاگرد ءِ سرا کپتگیں ساناں ھچ کار نیست کہ اُد ءَ مردم مِر انت، بیمار بنت یا مال ءُ دلوتانی سر ءَ چونیں سان کپیت۔
ایکسٹرنیلٹی ءُ استان:
اے تھیوری ءِ رد ءَ استان ءِ یک مزنیں کردے ھست انت کہ آ ایکسٹرنیلٹی ءِ دُور کنگ ءُ راجمان ءَ نپ ءُ سیِت دَیگ اِنت۔ چوناھا اے ھاتر ءَ استان دو رنگ ءِ پالیسی کارمرز کنت۔ اولی کمانڈ اینڈ کنٹرول پالیسی اِنت۔ اے پالیسی ءِ رد ءَ استان ھما کمپنی کہ ھست اَنت آیاں پابند کنت۔اگاں آیانی کاراں چہ مردماں تاوان رسیت۔ گڑا آ استان ءِ دیم ءَ جوابدہ بنت۔دومی corrective tax and subsidies اِنت کہ ایشی ءِ رد ءَ کمپنی ءِ ھرچ کارے کہ راجمان ءَ پہ سیت ءُ نپ انت۔ گڑا استان ھما کمپنی ءَ گیش subsidy دنت کہ ھما وتی کاراں گیش ءَ چہ گیش دیم ءَ بہ بارت۔ ءُ اگاں ھمے کمپنی ءَ چہ راجمان ءَ تاوان رسیت گڑا استان گیش ٹیکس جنت تاکہ کمپنی وتی کاراں کم بکنت ءُ راجمان ءَ کم ءَ چہ کم تاوان بہ رسیت۔
ایکسٹرنیلٹی ماں جھان ءَ:
2007 ءَ چاپ ءُ شنگ بیتگیں Journal of economic literature ءِ رد ءَ یورپ ءِ بازیں مُلکاں پٹرول ءِ سرا ٹیکس جَت دانکہ مردم کم ءَ چہ کم گاڑی کارمرز بکن اَنت۔ پرچاکہ ھمے گاڑیانی سْوب ءَ ھمود ءِ راجمان تاوان بار بیت۔2005 ءَ ھمے ٹیکس ریٹ 2.28 اَت ءُ پدا ھمے ٹیکس ریٹ داں 2.95 ءَ بَرَگ بوت۔ چہ اے کار ءَ یورپی ریاستاں وتی مھلوک چہ دو ھرابیں ایکسٹرنیلٹی ءَ رکینت اَنت۔اولی ھما وھد ءَ کہ پٹرول ارزان اَت۔ ملک ءِ مردماں گاڑی باز کارمرز کُت ءُ ھمے واستہ دگ سک رش بوت انت۔ھمک روچ دَگ ءَ سپر کنگ مزنیں جیڑھے اَت۔دومی گندگی وھدے پٹرول ءِ سرا ٹیکس لگ اِت۔ گُڑا مردماں گاڑی ءِ کارمرز کم کُت ءُ راجمان ءَ استان ءِ اے کار ءَ چہ سیت ءُ نپ رست۔
بلوچ راج ءُ ایکسٹرنیلٹی:
بلوچستان ھرچ رنگیں مڈّیاں چہ سرچکاریں سرڈگارے۔چوشکہ پاکستانی استان ءَ جھان ءِ جتائیں ریاستانی کمپنیاناں داوت دات کہ آ بیا اَنت۔بلوچستان ءَ سرمایہ کاری بہ کن انت۔ما گِند ایں کہ بلوچستان ءِ بازیں جاھاں ڈنی کمپنی اَتکگ اَنت۔بلوچستان ءِ مال ءُ مڈیانی لٹُ ءُ پُل ءَ کنگ ءَ انت۔آ توری سی پیک ءِ نام ءَ چین ءِ نام نھادیں سرمایہ کاری بہ بیت، ریکوڈک ءَ بیرک گولڈ یا سیندک ءَ ایم سی سی۔ھمے وڈ ءَ ھب چوکی ءَ گیٹرون ءُ سریا ءِ کمپنی ھست انت۔اے کمپنیانی لوٹ بس وتی سیِتاں گیش کنگ اِنت۔ ایشاں گوں مھلوک ءِ ھمک روچی ئیں زند ءِ اَڑ ءُ جنجالاں ھچ دست ءُ داوا نیست۔سی پیک ءِ سرمایہ کاریں پروجیکٹ ءِ سرا 2015 ءَ دزرند جَنَگ بیت۔گُڑا ایشی ءَ رند ھما ھندی مھلوک کہ آیانی کار دریاوْردی اِنت۔آ چہ دریا ءِ روْگ ءَ مکن کنگ بوتگ اَنت۔آیانی روزگار ءِ سرا بندش جَنَگ بوتگ۔اُد ءِ مردمانی ھمک روچ لَٹ ءُ کُٹ، کُشگ ءُ گار ءُ بیگواہ کنگ بندات بوتگ۔بالی پٹءِ جوڑ کنگ ءِ نام ءَ ھندی مردمانی پت ءُ پیروکی زمین چہ آیاں پُلَگ بوتگ اَنت۔ھرچ لوگے کہ سی پیک دگ ءِ نزیک ءُ گْوراں بوتگ انت۔اُد ءِ سرجمیں لوگ ڈرینگ ءُ زور لَڈینگ بوتگ اَنت۔سی پیک ءِ نام ءَ جوڈ بوتگیں میرین ڈرائب روڈ بہ بیت یانکہ بُرز بَستگیں پورٹ کہ گوادر ءِ جند نوں یک کَنڈے ءِ تہ ءَ اِنت۔کسانُکیں ھور چو توپان ءَ تبائی کنگ ءَ انت۔ ایشی ءِ درور ھمے سال ءِ بنداتی ماہانی ھور انت کہ سرجمیں گوادر ءِ لوگ ءُ دیوال ئے سانمند کت انت۔ ھب چوکی ءَ گیٹرون کمپنی کہ ھست انت آ کارمرز بوتگیں بوتلاں زور ایت recycle کنت۔ پدا ھمیشاں چہ پُچ ءُ پوشاک جوڑ کنت ءُ ھمے کیمیکل ءِ آپ کہ ھست اَنت۔آ کور ءِ توک ءَ تَچگ ءَ اَنت۔ھمے کور کہ ھست اِنت شھر ءِ آبادی ءِ کش ءُ کرّاں گْوزیت۔گُڑا ھندی مردم چہ ھمے کیمیکلانی سان ءَ ھمک روچ نادْراہ انت۔انچشکہ ھندی مردمانی گُشگ اِنت کہ ھمے کیمیکلانی سْوب ءَ مئے پَس ءُ مال مِر اَنت۔ھمے رنگ ءَ کوہ ءِ سلیمان ءَ چہ یورینیم کشّگ بوئگ ءَ اِنت۔ءُ ھرچی کہ ناکارَھیں یورینیم ھست اَنت۔ھمد ءَ دور دَیگ بوئگ ءَ اَنت۔ ھمیشانی سْوب ءَ اِد ءِ جَھمنندیں مردم کینسر ءِ آماچ بوئگ ءَ انت۔ ءُ اے دابیں نادْراھی ھمک روچ وْدان اَنت۔
ھمے پیمءَ ریکوڈک، سیندک ءُ سوئی ءِ مردم ھم ھمے وڑیں جیڑھانی آماچ اَنت۔ انچوشکہ economics ءِ تھیوری ءِ رِد ءَ ھمک کمپنی یے کہ سرمایہ کاری کنت۔ اگاں آ کمپنی externality پیداک کنت۔گڑا اے استان ءِ زمہ واری انت کہ ایشانی گر ءُ دار ءَ بکنت۔جھان ءَ ھم ھمے وڑ بیت بلے چوشکہ بلوچستان پاکستان ءِ یک کالونی یے ءُ دُگنیا ءِ تہ ءَ ھمک کالونی ءَ گوں ایردست ءَ ھمے وڈیں روشتے بوتگ۔انچوشکہ کالونائزر ءَ گوں ھندی مردم ءُ آیانی زند ءُ جیڑہ ءُ جنجالاں گوں ھچ دست ءُ داوا نیست۔ آ بس ھما زمین ءَ لوٹیت ءُ ھما زمین ءِ مال ءُ مڑّیاں لوٹیت۔
آسر:
زورگیرانی دو مستریں مکسد مُدام لٹ ءُ پُل ءُ ھندی مردمانی چکچینی انت پمیشکہ بلوچستان ءِ وڈیں زور کبزہ کُتگیں ھنداں استان ءَ وتی پالیسی انچو ٹھینتگ انت کہ بلوچستان ءِ مال ءُ مڑیاں لُٹ ءُ پُل بکنت ءُ ایشی ءِ ھواری ءَ بلوچ ءِ چکچینی ءَ بکنت۔ گندگ بیت کہ استان ءَ زانتء وت کمپنیاں رزا داتگ کہ چیچنو گیش بلوچ راجمان ءَ سانمند کُت کن انت بکن انت ئے۔ بلوچستان ءِ تہ ءَ بلکیں اے کمپنیانی ھرابیں سان نہ انت بلکیں ھاسیں شوربندی انت کہ بلوچ ءِ زمین ءَ پہ بلوچ ءَ تنگ بکنت ءُ بلوچ ءَ بُکشیت چُش کہ حب ءِ تہ ءَ اگاں سرجمیں فیکٹری شھر ءِ تہ ءَ انت اے ڈن ءَ ھم بوت کُت انت بلے وت شھر ءِ نیام ءَ کُتگ انت داں اے شھر سانمند بہ بیت۔ ھمے داب ءَ پاکستان ءِ تہ ءَ ھُشکیں جاگاہ باز انت بلے ایٹمی تراک راسکوہ ءِ ڈولیں آبادیں جاگاہے ءَ چکاسیتگ انت ھمے داب ءَ گوادر ءِ پورٹ ءُ میریں ڈرائب انچیں رنگے ءَ جوڈ کتگ انت کہ گوادر کنڈے ءِ تہ ءَ بہ بیت۔
Refrence:
# N. Gregory Mankiw principles of economics
# سی پیک ءُ بلوچستان Booklet
# ریکوڈک منگ نامگ ءُ بلوچستان ءِ مڈیانی لُٹ ءُ پُل Booklet
اے نبشتانکءِ تہءَ درشان کُتگیں ھیالءُ لیکہ نبشتہ کارءِ وتیگ اَنت ہژدری نہ اِنت کہ بی ایس سی اسلام آباد آئیءِ ھیالءُ لیکہ گوں منوگر بہ بیت۔