منی اے شئیراں ہمک دیوال ءُ سِنگ ءُ ڈوکءِ سرءَ نویس اِت
کہ تا بزان اَنت راج پالیں سرانی واجہ
وتی وتن ماتءِ مہرءِ راہءَ
وتن کہ کرناں چہ آدمی ذاتءِ زندءِ آزاتیءِ نشان اِنت
شئیر تہنا لبزانی رد ءُ بند دیگ ءُ کماھگءِ نام نہ اِنت نئیکہ گالانی سمبہینگ ءُ سینگارگءِ دابے، نئیکہ تہنا ذاتی درشانءِ وسیلہے بلکیں شئیر ہما اِنت کہ آئیءِ ہمک ساچ اِتگیں گال راجمانءِ ھستیں جاورانی جہگیریءَ بہ کنت، شئیر ہما اِنت کہ آئیءِ گال ربیدگی زیبائی(Cultural aesthetics)ءَ گوں یک نہ سستگیں سیادی یے ودی بہ کنت، شئیر ہما اِنت کہ آئیءِ گالانی سیادی گوں تئی دودمان ءُ رسم ءُ رواجانی پدرائیءَ کت بہ کنت۔ شئیر ہما اِنت کہ آئیءِ گال تئی ذاتی زند ءُ عملءَ گوں ھچ پیمیں اڑاندے ودی مہ
کنت۔ انچو کہ سید گشتگ
گال اَنت کہ گپتار بنت گپتار بنت کردار
پدا ایردستیں چاگردےءَ دو ھمینچو نبشتہ کار ءُ شائرانی سرءَ پَرز بیت کہ آ دژمنءِ ھلاپءَ وتی کلمءَ توپکءِ وڑءَ کارمرز بہ کن اَنت۔ پرچا کہ تئی نہ تہنا زمین ایردست کنگ بوتگ بلکیں تئی زبان ہم ایردست اِنت، تئی پجار ءُ ربیدگ ہم ترسےءِ آماچ اَنت، تئی رسم ءُ رواج distort کنگ بوگءَ اَنت یک مُشتگیں ربیدگے (انٹرکلچرلے) پیداک کنگ بوگءَ اِنت، اے انٹرکلچر زبانءِ تب ءُ بُندپترءَ ولگوج کنگءَ اِنت، ہما زبان کہ آئیءِ اندرءَ تئی چاگردی پدکرد ھوار اَنت، ھما زبان کہ آئیءِ تہءَ تئی یادداشتانی امبار اِنت، تئی ربیدگ ءُ بامردانی بُندپتر ئِے پہریز اِتگ بلے مروچی ھمے انٹرکلچرےءِ دیمپان اِنت اے پیمیں گرانیں ساھتاں وھدے کہ تئی ھستمان مَرگءِ آماچ اِنت ءُ تو بہ نندئے جمالیات ءُ ازمءِ رکینگءِ گپءَ بہ جن ئے گڑا اے دو تل ءُ دو پوستی یے بیت۔ بلکیں اے پیمیں جمالیات ءُ ازم زورگیرءِ ھکءَ روت ءُ ھمائیءِ پلہ مرزیں ازمے جوڑ بیت ءُ ایردستءِ ھر چیزءِ ھلاپ ءَ اوشت ایت۔ ساچشتءِ Standardization ءُ شئیری پوئیٹکس داں ھما وھدءَ بے مانا اَنت وھدے کہ چاگردءِ راستیں پدکرد ءُ جاورانی پدرائیءَ مہ کنت شئیر وھدے کہ بلیک ھولے جوڑ بیت کہ اودءَ کس کسی توارءَ مہ زانت گڑا اے پوئیکٹسے نہ بیت بلکیں دروہاپیں توارے بیت، یک درامدیں گالوارے بیت کہ اِشیءَ ما بلوچءِ جہگیریں توار گشت نہ کنیں۔ بلوچی لبزانک انچیں بلیک ھولےءِ تہءَ سر جنگءَ انت کہ اودءَ تہنا درامدی ءُ بیگانگی مارا گندگءَ کیت۔ ءُ چوشیں نبشتہ کار نیستیءِ برابر اَنت کہ آ بلوچءِ ایردستیءِ جہگیریءَ بہ کننت، بلے ھمے ایردستیءِ موسماں یک انچیں شائرے ودی بیت کہ آ وتی ذاتی آسراتی ءُ آسودگیاں یکرّ کنت تہنا بلوچ ءُ بلوچ جنگءِ توار جوڑ بیت ءُ آ ایدگہ کلیں وتگڑیں تواراں ایر ترینیت۔ یک بے گزر ءُ بے لب ءُ لالچیں توارے کہ آ کسی چانوگانی چمدار نہ بیت
چار روچءِ چرپیں چانیگاں نہ بجّینتگ اے دل
زندگی ھکاں پہل کن من دگہ راہے شتاں
اے ھمے توار اِنت کہ ذاتی زند ءُ آسودگیاں لگتے گون کنت، اے ہمے توار اِنت کہ زورگیرءِ چانوگرے نہ بیت بلکیں یک سرجمیں گہگیریں توارے بیت ءُ وتی کلمءَ دُژمنءِ ھلاپءَ توپکءِ وڑءَ کارمرز کنت۔ اے توارءِ بامرد مبارک قاضی بیت کہ بنداتی روچاں بگر دانکہ وتی نمیرانیءِ روچاں بلوچستانءِ جاوراں چہ انچو سانمند بیت کہ بلوچءِ ایردستی ءُ گُلامیءِ درد ءُ تورشت آئیءِ رگ ءُ ھوناں تچ اَنت ءُ نگیگیں جاوراں انچوش ھوار کپ اَنت کہ آ ازم ءُ جمالیاتءَ را وتی پرائمری ڈُبہ سرپد نہ بیت چوشکہ ایدگہ نبشتہ کار ءُ شائر ازم ءُ جمالیاتءَ اولی ءُ گڈی ڈبہ سرپد بنت۔ آوانی گورءَ بلکیں ازم ابرمءِ ڈولداریں ندارگاں گوں بندوک اِنت، آوانی ازم زیبائیں ڈیل ءُ بالاد، زلپ ءُ پنءِ سینگارگءَ گوں ھمگرنچ اِنت بلے آ(ایدگہ نبشتہ کار ءُ شائر) اے چیزءَ نہ مار اَنت کہ زورگیری وت یک مزنیں تباہی یے کہ اے نہ تہنا تئی چاگردءَ تباہ کنت بلکیں تئی زمینءَ بگر داں ابرمءِ ڈولداری ءُ جنکانی زلپ ءَ ھم گلامیءِ سانکلاں گوں بندیت۔ پمیشکہ مبارک قاضی اے کلیں وتگڑیں جمالیاتءَ جنگءِ پوشاکے گورءَ دنت۔ جنگ وت یک Destructive ایں عملے، گڑا مبارک پرچا مناپکی بہ کنت ءُ بلوچءَ را یک وتگڑیں چاگردءِ اکسے پیش بہ داریت کہ آئیءَ گوں بلوچءَ ھچ کار نیست پمیشکہ آ بلوچءِ راستیں جاورانی جہگیریءَ کنت۔ آئیءِ کلم آئیءِ توپک بیت آئیءِ لبز گونڈلیں تیر بنت ءُ دژمنءِ سرءَ آس گْوار اَنت۔
ھُدوکیں پُلانی مانزمان ئے، منی زبانءِ تبءَ نہ کپتگ
سْرپوکیں تیرانی مانزمان ئے ھمے زبانءَ ھبر کناں من
قاضیءِ لبز تیر اَت انت ءُ آئیءِ کلم توپک پمیشکہ آئیءِ شائری وتگڑیں جمالیاتءِ جہگیر نہ اَت، نئیکہ آئیءَ وت زبان انچوش پہمیان ءُ اندیم کتگ اَت کہ آئیءِ زبانءَ کس سرپد مہ بیت، بلکیں آئیءَ وتی زبان انچوش ارزان کتگ ات کہ آئیءِ آشوبیں گالوارءَ کلیں بلوچ سرپد بوت اَنت آ توری رہدربرے بہ بیت یا شوانگ ءُ دریاوردے یا کہ ساربان ءُ گوّالے، ہر کس ءُ ناکس آئیءِ شئیراں سرپد بیت ءُ ہر کسی باھند اولی بندءِ اشکنگءَ گوں چست بنت۔ پرچا کہ لبز وھدے تیر بہ بنت گڑا مردمءَ جہہ سرّین اَنت، مردم پچ لرزیت۔ اے پچ لرزوکیں زبانءِ واھند قاضی اَت کہ آئیءِ لبزانی پدگوانک داں ھما وھدءَ مانیت کہ بلوچ اے سرڈگارءِ سرءَ ھست اِنت۔ بی ایس سی نہ تہنا شائرء آشوبءِ اولی سالروچءَ پہ ستا شانی ندر کنت بلکیں ما وتءَ را قاضیءِ وارس سرپد بئیں ءُ آئیءِ Legacyءَ زور ایں ءُ دیمءَ رو ایں ءُ ما ایدگہ کلیں بلوچ نودربراں بگر داں نبشتہ کاراں ھمے سکینءَ دئیں کہ وتگڑیں جمالیاتءِ دُمبءَ مہ کپ اَنت بلکیں وتی کلمءَ دژمنءِ ھلاپءَ توپکءِ وڑءَ کارمرز بہ کن اَت پرچا کہ اے نگیگیں ساھتاں کہ بلوچءِ ھستمان مَرگءِ دیمپان اِنت گڑا وتی وجودءِ رکینگءِ ھمک در ءُ وسیلہ گوں دلیریءَ دژمنءِ ھلاپءَ کارمرز کنگ بہ بنت دانکہ ما زورگیرءِ دیمداریءَ اوشتات
بہ کنیں۔
شائرء آشوبءِ اولی سالروچ کلیں بلوچاں پہ یک ناوشیں روچے پرچا کہ 16 ستمبر 2023 ہما روچ اِنت کہ ما یک پُرآشوبیں توارےءَ چہ زبہر بوتیں پمیشکہ ما بی ایس سیءِ کلیں باسکاں کڈّن کن اِیں کہ اے روچءَ وتی ادارہءِ کلیں کاراں داں یک روچےءَ مہتل بہ دار اَنت۔