چارلس رینالڑولیم ءِ کتاب 'مری بلوچ جنگِ مزاحمت' ءِ سر ءَ چمشانکے
دنیا ءِ بُندپتر ءَ پَٹپول بہ کن ئے ءُ بچار ئے گڑا ھما راج مروچی اے دنیا ءِ دلبند ءَ زندگیں راج زانگ بنت کہ آیاں زورگیر ءِ دیم ءَ سرجھل کنگ ءِ جاہ ءَ آیانی دیم ءَ اوشتاتگ ءُ جنگ اِش داتگ۔ اے دنیا ءِ سرءَ بازیں راج بوتگ اَنت کہ مرچی آیانی نام ءُ نشان گار اَنت۔ آیانی گاری ءِ مستریں سوب دژمن ءِ یا زورگیر ءِ دیم ءَ سرجھلی اِنت ءُ آیانی منّگ اِنت۔ بلوچ ھم یک راجے کہ آھمے دنیا ءِ دلبند ءَ زندگی کنگ ءَ اِنت، آئی ءَ ہزاراں سال ءِ بُندپترے است اِنت۔ بلوچ راج ءِ زندگ بوگ ءِ درستاں مستریں سبباں چہ یکّے ہمیش اِنت کہ آئی ءَ کدی ھم دژمن ءِ دیم ءَ وتی سر جھل نہ کرتگ ءُ آئی ءَ کسّی گلامی نہ منّ اِتگ بلکیں آئی ءِ دیم ءَ گوں مہکمیں رنگے ءَ اوشتاتگ آئی ءِ دیمداری ئِے کتگ ءُ زمین ئےِ رکّینتگ۔ بلوچ ءِ بُندپتر ءَ اگاں بہ چار ئے گڑا جنگ ءَ چہ پُرّ اِنت۔ بلوچ ھما راج اِنت کہ آئی ءَ زورگیر وتی زمین ءِ سر ءَ وش اتک کنگ ءِ جاہ ءَ آئی ءَ گوں جنگ کتگ ءُ وتی سرڈگار ءَ ڈن کشّیتگ انت۔ آ تُری انگریزانی زمانگ میر مہراب خان ءِ گہگیری بہ بیت، یا زالمیں پُرتگیزانی ھلاپ ءَ حمل جیئند ءِ گہگیری بہ بیت، یا عربانی زمانگ ءَ ہمزہ لاشاری ءِ گہگیری بہ بیت۔ اے ھبراں پدّر بیت کہ کُجام ھم زمانگے ءَ کہ دری راجے بلوچ ءِ سرڈگار ءَ اتکگ گڑا بلوچ آیانی بگیری ءَ اوشتاتگ ءُ جنگ اش کتگ، آ اش وتی گلزمین ءَ چہ ڈنّ کشّیتگ اَنت۔
ڈاکٹر فاروق بلوچ وتی کتاب ءِ تہءَ جاھے گُش ایت کہ بُندپتر گواچنی ءَ بامردانی کِسّہ اَنت کہ چوں آھاں پہ وتی راج ءِ باندات ءَ وتی سر ندر کتگ اَنت ءُ وت ءَ بُندپتر ءِ تاکاں زندگ داشتگ۔ آھانی سرندری ءِ سبب اِنت کہ مروچی مئے راج ماں بُندپتر ءَ یک زندگیں راجے زانگ بیت۔
مروچی اے کتاب(مری بلوچ جنگِ مُزاحمت) ھما دور ءِ بلوچ دلیریں پُسگانی کِسّہ اَنت۔ وھدے انگریز بلوچستان ءِ دمگ کاہان ءَ زور ایردست کنگ لوٹ اَنت، بلوچ سرزمینءَ نندوکیں پُسّگ وتی سراں کُربان کن اَنت ءُ آھاں چہ وتی سرڈگار ءَ درآھگءَ لاچار کن اَنت۔ اے کتاب ءِ نبشتکار چارلس رینالڑولیم اِنت۔ اے کتاب انگریزی ءَ چہ اردو ءَ شاہ محمد مری بلوچ ءَ رجانک کتگ۔ اے کتاب (مری بلوچ جنگِ مزاحمت) مری تمن ءِ گوں انگریزانی ھلاپ ءَ ساڈت آپ ءُ نفسک ءِ جنگانی کِسّہ اَنت۔ اے کتاب کیپٹن لیوس براؤن ءِ رودپتر، الفریڑ ولیمز ءِ نمدی کہ آئی ءَ سپر ءِ وھدءَ وتی مات ءِ سر ءَ دیم داتگ اَنت۔ ایشاں گوں ھوار مسٹر فنینگ ءِ نمدی یے مان اَنت۔ چریشاں ابید ھما وھدءِ لہتیں دگہ جنگولانی نمدی ھوار اَنت۔
جنگ ءِ کِسّہ کنگ ءَ پیسر جنگ ءِ سبباں گوں بندات کنیں۔ اے زمانگ ءَ کہ اے جنگ بوتگ، اے زمانگ ءَ دنیا دو مزنیں زورگیرانی دستاں بوتگ۔ یکّے برٹش ءُ دومی روس۔ برصغیر اے وھد ءَ برٹش ءِ مستریں کالونی یے بیت ءُ دومی نیمگ ءَ روس ءِ چمّ ھم برصغیر ءِ نیمگ ءَ سک بنت پمیشکہ آ اے کَش ءُ گور ءِ مُلکاں گوں نزیکی کنگ بِنا کنت۔ وھدے 1839سر الیگزینڈر برنز برٹش ھکومت ءِ نیمگ ءَ یک میشنے کابل ءِ امیردوست محمد ءِ دربار ءَ دیم دیگ بیت گڑا ھمے وھد ءَ الیگزینڈر اے گپ ءَ دیم ءَ کاریت کہ امیردوست گوں روس ءِ نیمگ ءَ نزیکی کنگ ءِ جہدءَ اِنت۔ ھمے تُرس ءِ سبب ءَ برطانیہ اے جُہد کنت کہ امیردوست محمد ءِ جاگہ ءَ شاہ شجاع اوگانستان ءِ تہت ءِ سرءَ نِندارینگ بہ بیت۔ شاہ شجاع پیسر ءَ ھمے چیز ءَ پہ ساڑی اِنت پرچاکہ آئی ءِ دست ءَ پیسرءَ آئیءِ تہت پچ گِرگ بوتگ، نوں واتر آ پَدا وتی تہتءِ ھاترءَ ہر چیز ءِ کنگءَ چاڑکہ اِنت۔ شاہ شجاع ھم درانی سلطنت ءَ وتی دستاں آرگءَ ساڑی اِنت۔ 1839ءَ کماندار جان کین گوں وتی لشکرءِ ھمبرائیءَ دیم پہ اوگانستان دیم دیگ بیت۔ اوگانستان ءِ روگ ءَ آئیءَ بلوچستانءِ راہ ءُ دگ کارمرز کنگی اَنت۔ ڈھاڈر پَدا دیمءَ درہ بولان، کوئٹہ، درہ کوجکءِ دگ ءَ چہ قندھار ءُ قندھار ءَ چہ کابلءَ روگی اَت۔ اے لشکر اوگانستان ءِ سر بوگءَ رند وھدے شاہ شجاع ءَ تہتءِ سر ءَ نِندارینت۔ اوگانستانءَ واتر آھگءِ وھد ءَ آیانی گُمانءَ کئیت کہ کاہانءَ کبزہ بہ کن اَنت۔ 13 نومبر 1839ءَ کلاتءِ سرءَ اَرش کنگ ءُ میر مہراب خانءِ نمیران کنگءَ پد، برٹش ایردستیءَ را گیش کنگ لوٹ ایت۔
کاہانءِ کبزہ کنگءَ برٹشءَ دو رنگراہیں راھاں گوزگی اِنت، یکّے ساڑت آپ ءُ دومی درہ نفسک اِنت۔ اے سپر پہ برٹش ءِ لشکر ءَ سکّیں گرانیں سپرے، ایشی ءِ یک سببے ھمے دوئیں درہ اَنت (درہ ساڑت آپ ءُ درہ نفسک ) انت، دومی مستریں گرانی موسم اِنت کہ اے وھد ءَ اے موسم ءِ اوپار کنگ پہ برٹشءِ سپاہیگاں سکّ گران بیت۔
اے سپر 1840ءِ اپریلءِ ماہ ءَ بِندات بیت، لشکرءِ سروکیءَ لیوس براؤن کنگ ءَ بیت۔ یکّ انچیں سپرےءِ روگ کہ ایشیءِ آسر ہرچی بوت کُت کنت، بلے اے درستیں جنجالاں ابید انگریزاں اے گرانی وتی دیم ءَ نیاؤرت اَنت بس کاہانءِکبزہ کنگ وتی دلءَ داشتگ اَت۔ اے گرانیں سپر سکھرءَ چہ دیم پلجی، پدا پلجیءَ چہ دیم درّہِ ساڑت آپءُ درّہِ نفسکءَ چہ گوزانءَ داں کاہانءَ سر بیت۔
لشکر وھدے کاہانءَ سر بیت گڑا اودءَ ھچ وڑیں گہگیری چہ بلوچانی نیمگ ءَ گِندگ نئیت اِنت، کاہان ءِ کلاتءَ مردمے اوں گواہ نہ کنت، درستاں کاہان یلہ داتگ ءُ اودءِ کِشت ءُ کِشار مانداشتگ اَنت ءُ وت کوہ ءُ اگاراں دیم اِش داتگ۔ برٹشءِ سپاہی چرے چیزءَ گلے چن اَنت ءُ رو اَنت کاہانءِ کلات ءِ سرءَ کبزہ کن انت بلے اے چیزءَ شموشکار بنت کہ بلوچ ماں کوہءَ جنگ ءِ چن ءُ لانچ ءَ اَنت۔ اے وھد ءَ برٹش سپاہیانی کِرءَ کیپٹن لیوس براؤن ءَ ابید دگہ سئے مزنیں کماندار ھم گون بیت چوشکہ گرنیڈئیرز بمبئی رجمنٹ لیفٹینٹ وال پال کلارک، بمبئی آرٹلری ارسکائن، ایشاں ھوار میڈیکل کارمستر ڈاکٹر گلاس ھم گون بیت۔ لشکر ءِ توشگانی کم بوگءِ سبب ءَ آیاں چہ یکّے واتر سکھر ءَ توشگ ءِ گِپت ءُ گیرءَ ساڑی بیت۔ گڑا پریشیگی کلارک 156 پیادگیں سپاہیاں 40 اسپ سواریں سپاہی ءُ 600 بے لڈ ءُ باریں اُشتراں گوں توشگءِ رندءَ دیم دیگ بنت۔ وھدے کلارک نیمراہ ءِ سپر ءِ بُرّگ ءَ پد دوراں داں گہگیری کنگ ءَ کس نہ گندیت گڑا وتی 76 پیادگیں سپاہی واتر کاہانءِ کلاتءَ دیم دنت۔ کلارک وھدے ساڑت آپءَ سر بیت گڑا مری جنگول آھانی سرءَ اُرش کن اَنت۔ اُرش ءِ آسرءَ کلارک گوں وتی سرجمیں سپاہیاں جنَگ بیت، بس یکّ سپاہیگے پش کپ ایت ءُ آ واترکاہانءَ دیم دیگ بیت۔ وھدے اے ھال کیپٹن لیوس ءَ رسیت گڑا آ اے گپ ءَ شریں وڑےءَ سر پد بیت کہ نوں من گوں وتی لشکرءَ سکّیں نگیگیں گپچلےءَ کپتگ آں۔
کلارکءِ ویل پد کلات ءِ جاورال سک نگیگ بنت۔ یکّے ورگءِ کمّی ءُ دومی مریانی گوریلہ بوئگ۔ اے درستیں چیزاں کیپٹن لیوس شریں وڑےءَ پوہ بوئگ ءَ بیت کہ نوں اِدءَ درآھگ مرگءِ برابر اِنت۔ آ اے گپ ءَ ھم زانت کہ اے جاورالاں کُمک بس گپے بوت کُت کنت۔
اے ویلءِ لہتیں روچ ءَ پد کیپٹن لیوس براؤن ءَ اے ھال یک نمدی یے وسیلہءَ دیگ بیت کہ آئیءَ پہ سکھرءَ چہ یک لشکرے کُمک ءَ دیم دیگ بوئگ ءَ انت۔ بس نوں کیپٹن لیوس براؤن ءُ آئی ءِ لشکر ءَ پہ گڈّی اوست، ھمے سکھر ءِ لشکر اِنت کہ پہ آھانی کُمک ءَ پیداک اِنت۔
اے کسّہ ءِ تہءَ یک نوکیں نامے اتکگ کہ آئیءِ نام الفریڑ ولیمز اِنت کہ آ نبشتکارءِ کستریں بَرات اِنت۔ آ ھم اے جنگ ءِ کارستاں چہ یکّے۔ الفریڑ ولیمزجنگ ءَ ھوار بوئگ ءَ پد لہتیں نمدی وتی مات ءَ نبشتہ کنت کہ آ ھم کتاب ءِ تہءَ مان انت گوں۔
لشکر12 اگست 1840ءَ وھدے سکھر ءَ چہ کیپٹن لیوس ءِ کُمکءَ در کپ ایت، گڑا آھانی سروکیءَ میجر کلبرون کنگ ءَ انت۔ اے جنگءِ میان ءَ دگہ یکّ سپاھیگےءِ نمدیاں شمئے دیم ءَ ایر کناں گوں۔ اے ھما سپاھیگ انت کہ وت ھم جنگءَ گون انت گوں۔ لشکر 29 اگستءَ وھدے ساڑت آپ ءَ دگہ جاھے ءَ گوں بلوچاں ڈیک وارت، گڑا بلوچ اے لشکرءِ 5 کارمستر ءَ ھوار 190 سپاہیءَ چہ گیش کُش ایت ءُ جنگ داں دیرءَ جُنزیت بلے آسر ءَ برٹش سپاہی تچگ ءَ لاچار بنت۔ ھمے پش کپتگیں سپاہی وتارا سکھر ءَ سر کن اَنت ءُ وتی ساہ ءَ رکین اَنت۔
جنگ ءِ ھال وھدے کیپٹن لیوس براؤن ءَ سر بیت گڑا آ گیشتر دلپروش بیت۔ آ نوں زانت کہ آئیءَ پہ نوں سک گران اِنت کہ کاہان ءِ کلات ءَ نِشت کُت بہ کنت۔ پمیشکہ نوں آئی ءَ پہ بس گڈّی راہ بلوچاں گوں نِندگ ءُ تران پش کپ ایت۔ گڑا کیپٹن لیوس براؤن مری سردار میر دودا ءَ گوں گپّ ءُ تران کنگ ءِ پیسلہ ءَ کنت۔ دودا سُہل ءُ تران ءِ منّگ ءَ رازیگ بیت، لیوس براؤن ءِ لوٹ ہمے بیت کہ منءَ سلامتی ءَ بس وتی ھلک ءَ چہ درآھگ ءِ اجازت دیگ بہ بیت، آ گوش ایت کہ من کاہان ءِ کلات ءَ یلہ دیان ءُ ادءَ چہ رواں۔ 5 ماہ ءَ پیسر اتکگیں برٹش لشکر گڈسر ءَ بس پہ وتی جان ءِ رکینگءَ کاہان ءَ چہ درآھگءَ ساڈی بیت۔ اے اولی رند بیت کہ برٹشءَ سرجمیں ھلکءِ تہءَ گہگیری گِندگءَ کیئت اِنت، اولی رند بیت کہ جنگءَ چہ کسّےءَ برٹش ءَ باج بُرتگ ءُ وتی زمینءَ گلینگءَ لاچار کتگ۔ بلوچءِ بُندپتر چوشیں جنگانی کِسّہءَ پُرّ انت۔
اے کتاب پہ اے ھاترءَ ارزشت دار ایت کہ بلوچ وانوکاں ھما زمانگ ءِ بلوچ گہگیری ءِ بابت ءَ سرپدی دنت۔ بلوچ کُجام ھم جاورھال ءِ تہءَ بوتگ اَنت بلے آئی ءَ دری مردم وتی زمینءِ سرا پہ وش ءُ وشدلیءَ نِندگ ءَ نئیشتگ اَنت۔ ءُ پہ وتی آؤکیں پُسگان دُرستاں چے جوانتریں چیز ھمے بُوتگ کہ بلوچ ءَ گہگیری ءِ راہ کدی ھم یل کنگی نہ اِنت۔ وتی بُندپترءَ چہ بےسُدّیں راج کدی وتی راجی بامردانی فلسفہءَ زُرت نہ کن اَنت ءُ دیم ءَ شُت نہ کن اَنت۔ اے بُندپتر نویسانی برورد اِنت کہ مارا چہ وتی راجدپتر ءَ بے سُدّی ءَ نئیل اَنت ءُ مارا مئے گوست ءِ بامردانی کِسّہاں کارنت ءُ سر کن اَنت۔ بائد اِنت کہ اے گپءَ ھر بلوچ پُسّگ سرپد بِہ بیت کہ من کئے آں ءُ منی گوستانک چے بوتگ۔ وتی گوستانکءَ ھوار وتی بامردانی فلسفہءَ بزوریت ءُ دیمءَ بروت چیاکہ مروچی ھم بلوچ ءِ ڈگار ایردست اِنت۔
اے نبشتانکءِ تہءَ درشان کُتگیں ھیالءُ لیکہ نبشتہ کارءِ وتیگ اَنت ہژدری نہ اِنت کہ بی ایس سی اسلام آباد آئیءِ ھیالءُ لیکہاں گوں منوگر بہ بیت۔