بیستءُ یک فروری ماتی زبانانی روچءِ درگتءَ یک مراگشے برجم دارگ بِیت۔ بی ایس سی، اسلام آباد

جار

بی ایس اسلام آبادءِ جارکشّءَ رسانکدرءَ شنگ کُتگیں بیانءِ تہءَگُشتگ کہ زبان زندگیں راجانی نِشانی اِنت ءُ دگنیاءِ تہءَ ھما راجانءَ راجی پجّارے ھَست ھماواں کہ وتی زبان ءُ پجّار رکّینتگ اَنت۔ زبان تھنا گپءُ گالءِ وسیلہ ئے نہ اِنت بلکیں راجانی پجّار، زانِشت، بندپتر، راجی سما ، لبزانک ، ءُ گیدی کّسو کُل زبانءِ تہءَاَنت ۔ زبان کہ یکّیں وھدءَ گپءُ گال ءُ ربیدگءِ دیمروئی دیوک اِنت ۔ ھما ربیدگ کہ کرناں چہ مئے پِت ءُ پیرکاں رکّینگ ءُ ھما زانِشت کہ مروچی ئیں دؤر ءَ مئے زانشتءُ سما ءِ بھر اِنت زبان ءَ مارا آؤرتگ ءُ سر کُتگ۔ زبان راجانی پجّار اِنت ءُ وتی زبانانی رکّینگ ءُ آوانی تہءَ نبشتہ، گپ ءُ لبزانک ودی کَنگ مستریں زمہ واریاں چہ یکّے ، زبانءِ گوما نزّیکی زمینءِ گوما مھرءِ درانگازی ءَ کَنت چیاکہ ھمک زبانءِ تب ھما راجءَ وتی زمینءَ گوں مھر پرمائیت ۔ زُبان کہ ھزاراں سال گوستءِ بندپتر ءَ مئے دیمءَ کار اِیت ءُ مارا وتی راجی سنچ ءُ زانتءَ سر کَنت۔ چہ کرناں مارا وتی فوک وزڈم کہ سر بُوتگ شائری ءِ دروشمءَ آ زبانءِ برکتءَ سر بُوتگ زبانءِ گیرامی ءُ پراموشی وتی سرجمیں راجی سما ءُ زانتءِپراموشی اِنت۔

بی ایس سی ، اسلام آباد وتی بنھشت ءِ اولی روچءَ چہ ہمے جُھدءَاِنت کہ آ وتی راجی زباناں بہ رکیّنیت ءُ ھمے جُھدءُ جپاءَبُوتگ ءُ وتی وسءُ واکءِتہءَ اسلام آبادءِ بلوچ نودربرانءَ چہ وتی راجی زبانءَ آژنا کنگءَ بیھال نہ بُوتگ بلکیں یک مستریں راجی ڈبہّ ئے لیک اِتگ ئِے۔ مُدام ھمے جُھد بُوتگ کہ بلوچ نودربر وتی راجی زباناں بوان اَنت، نبشتہ بہ کن اَنت ءُ وتی زباناں در بہ بَر اَنت۔ زبانءَلبزانک زندگ دار اِیت ءُ ادءِ نودربرانءَ وتی راجی زباناں نبشتہ بُوتگیں لبزانک مُدام سرکنگ ءِ جُھد ئِےکُتگ ءُ دیمترءَھم اَنچیں گامگیج زُوریت دانکہ ما وتی زبانءَیل مہ کن ایں ءُ پراموش مہ بہ ایں۔ 

بِیستءُ یک فروری ھما روچ اِنت وھدے زوراکیں اِستان بنگالی آنی ہمے واستہ کُشت ءُ کوْشءَ کَنت وھدے آ ہمے لوٹءَ کن اَنت کہ مئے راجی زبان بنگالی اِنت۔ءُ بنگالی زبان ،بنگالی راجدوستی ءِ بنیات جوڑ بِیتءُ ھَست اِنت۔ ہمے روچءِ نسبتءَ یونیسکو 17 نومبر 1999 ءَ 21 یک فروری ءَ ماتی زبانانی روچ نامینیت ءُ کُلیّں دگنیاءَ اے روچ ھما بندپتری پژدرءِ سوبءَ ماتی زبانءِ روچ زانگ بِیت۔ 

بی ایس سی، اسلام آباد، اسلام آباد ءِ جھمنندیں درستیں بلوچ نودربرانءَ ھمے سکینءَ دَنت کہ آ وتی راجی زباناں بوان اَنت ءُ نِبشتہ بہ کن اَنت دانکہ ما وتی زباناں وت مہ وانیں ءُ نبشتہ مہ کن ایں دگہ کس مئے زباناں نہ وانیت ءُ دیمءَ نہ بارت چیاکہ سرکارءَ ہچ وڑیں راہ پَشت نہ گیتکگ کہ مئے زبان سر بیا اَنت اے مئے راجی زمہ واریاں چہ یکّے کہ ما وتی زباناں وتی بہ کن اِیں ءُ زبانءَ آئیءِ گپ جَنوک ءُ نبشتہ کنوک زندگ دار اَنت۔ وتی راجی زانشتی مڈّی ءِ رکیّنگ مئے راجی ڈبّہ اِنت چمیشکہ بی ایس سی ، اسلام آباد باندءَ ہمے سرھالءِسرا مراگشے اڈ دَنت شمئے آیگ ءُ ساڑی بوگ مارا شر بکَشیت۔

بلوچ سٹوڈنٹ کونسل (اسلام آباد)