رَمس21 اُستپان 2024 ءَ بی ایس سی اسلام آباد ءِ چیردستی ءَ میان اُستمانی ماتی زُبانانی روچ ءِ دَرگت ءَ یک لَبزانکی مراگشے برجم دارگ بوتگ۔

رَمس21 اُستپان 2024 ءَ بی ایس سی اسلام آباد ءِ چیردستی ءَ میان اُستمانی ماتی زُبانانی روچ ءِ دَرگت ءَ یک لَبزانکی مراگشے برجم دارگ بوتگ۔ اے مراگش ءِ پاگواجہ ءُ گیچینی مھمان واجہ عمران لھڑی اَت۔ لبزانکی دیوان ءِ چندے بَھر بوتگ اَنت۔ اَنچشکہ بلوچی لبزانک ءِ سرا دو نَگدی پیپر ، ڈاکومینٹری، شئیر وانی ءُ پاگواجہ ءِ تْران۔

مراگش راجی سوت ءَ گوں بُنگیج بوت۔ بنداتی بَھر ءَ یک نَگدی پیپرے بلوچی لبزانک ءِ سرا وانگ بوت۔اِدارگی ءُ نَپری جَتہ بلوچی لبزانک ءِ سرا کارانی بابت ءَ چنکس کہ سوبمندی ءُ نزوری ھست اَنت۔ سنگت ءَ تْران کناناں ءَ گُشت کہ مئے اِدارگاں زُبان ءِ سرا کار کنگ ءَ پہ دلجمیں کارے نہ کُرتگ کہ ما ایکیم بہ بہ ایں۔ نَپری تَک ءَ بلوچی زُبان ءِ کْواساں وتی کَچ ءِ بستار ءَ مئے زُبان رکینتگ۔ بلے آرت ءِ تھا واد ءِ برابر ءَ اِنت۔دیمترا ھمے گپ دیم ءَ ایر کُرت ئے کہ زُبان راجی پجار ءِ مانزمان اَنت۔ وھدیکہ زُبان ءَ ویلے بہ گیپت راج زندگ نہ مان اَنت۔مارا بلوچ راج ءِ ماتی زُبانانی زندگ دارگ ءِ واستہ گیش کار کنگی اِنت۔سال ءِ سرا یک روچے یکجاہ بوھگ ءُ مراگشے اَڈ دئیگ مئے درد ءِ دوا نہ اِنت۔ مارا اِدارگی جَتہ گیشاں چہ گیش کار کنگی ءُ یکمُشت بوھگی اِنت۔

 
مراگش ءِ دومی بَھر بلوچ راج ءِ دومی مستریں زُبان براھوئی ءِ یک پیپرے اَت۔ ایشی ءِ تھا بلوچ راج ءِ ماتی زُبانانی سرا پگر جَنگ ءُ مئے زمہ واریانی بابت ءَ اَت کہ ما وتی زُباناں چوں بہ پھاز ایں؟۔ گلامیں راجے ءِ بستار ءَ مارا وتی ماتی زُبان ءِ ھر پِڑ در جنگ کپ ایت۔ لبزانک زُبان ءِ دُراھیں تَھرانی سرا نویسگ لوٹ ایت۔دانکہ مئے زُبان گیشتر واناک بہ بیت۔ اے اوں مئے سرا پَرز بیت کہ ما وتی ماتی زُبان ءَ بہ وان ایں، گپ بکن ایں ءُ بہ نویس ایں۔
 

ڈاکومینٹری مراگش ءِ سیمی بَھر اَت۔ میان اُستمانی ماتی زُبانانی روچ ءِ پُشدر ءَ بنگالی راج ءِ کُربانی  پیشدارگ بوت کہ 21 اُستپان 1952 ءَ بنگالی راج ءِ نودربر یک روانکے کَش اَنت۔ گوں پاکستان ءَ ھمے لوٹ ءَ کن اَنت کہ آبادی ءِ بستار ءَ مئے راج مستر اِنت۔ بائد اِنت اردو ءَ سرا مُشگ ءَ ابید مئے راجی زُبان بنگالی بہ بیت۔ بلے پاکستان آیانی لوٹ ءَ ھچ کمار نہ کنت ءُ روانک ءِ سرا تیرگُواری کنت ءُ نوہ نودربر کُش ایت۔ ھمے ھونریچی ءِ سوْب ءَ یو این او ءِ یونیسکو ءُ جنرل اسمبلی21 اُستپان ءَ میان اُستمانی ماتی زُبانانی روچ ایر کنت۔ اے روچ ءِ درگت ءَ گیدی ءِ کُلیں راج شاتکامی کن اَنت ءُ زُبان ءِ پلگارگ ءَ پہ کول ءُ کرار کن اَنت۔
 

چارُمی بَھر شئیر ءُ شائری اَت کہ سنگتاں وتی شئیر مراگش ءَ ونت اَنت۔ گُڈی ءُ پنچُمی بَھر پاگواجہ ءِ تْران اَت۔ واجہ ءَ تْران کناناں ءَ گُشت کہ بالادست ءِ ھُنر ءُ پندلاں مارا مجگی گُلام جوڑ کُرتگ۔ مئے روشت اِستان ءَ وتی داب ءَ جوڑ کُرتگ اَنت۔ مرچی ما ھمنکس ءَ زوراک وتی تھا جاہ دات ءَ کہ ما وتی ماتی زُبان بلوچی ءُ براھوئی ءَ ایوک ءَ پہ سی ایس ایس ءُ پی سی ایس ءِ پیپر ءِ کَشگ ءَ وان اَنت۔اے مئے زُبان ءَ نہ چَھڑ ءَ ایت۔ مارا زر دوستی ءُ کاسگ چٹی یکر کنگ لوٹ اَنت ۔ایوک ءَ زُبان ءُ پہ راج ءَ جیڑگی اِنت۔ گچینی مہمان ءِ تراں َ پد دیوان ءِ ھلاسی ءِ جار جَنگ بوت