لمئی بولی تا جہانی دے نا رِد ئٹ 21 فروری 2024 چار شمبے نا دے بلوچ سٹوڈنٹس کونسل اسلام آباد نا پارہ غان اسہ ادبی مُچی ئس ہڈ تننّگاسس۔دا مچی نا کماشیءِ بروکا مہمان خواجہ عمران لہڑی کرے ، دا ادبی مچی نا جتا جتا انگا بشخ آتیٹ پیش کننگا ، اوفتیٹ بلوچی ادب نا زیہا اِرا نغدی پیپر ، ڈاکومینٹری ، شعر و شاعری تون اوار کچاری کماش نا ہیت و گپ آک اوارو۔
دا مچی نا بناء راجی ترانہ غان مس ، اولیکو بشخ ئٹ اسہ نغدی پیپر ئس بلوچی ادب نا زیہا خُواننگا ،داٹی ادارہ غاتا بلوچی ادب ئٹ کڑد و نزوری تیا ہیت کننگا۔اندن سنگت پارے کہ ننا ادارہ غاک بلوچی ادب نا زیہا دونو کاریم ئس کتنو کہ اراڑن بندغ اُست جم مرے۔اندن مونی نغدی پیپر ئٹ دا پاننگا کہ تینا ڈیھ و ڈغار نا رکھ ئکن بلوچ قوم ئنا لمئی بولی تے رکھنگ ام الّمی ءِ ، اسہ مُچی ئس ہڈ تننگ دا دڑد ئنا دارو اف بلکن داڑکے ننے زیات آن زیات ادارئی بنیات آتیا کاریم کروئی ءِ ، دا کاریم اسٹی ، اواری و سیوت ئٹ مرے۔
مُچی نا ارٹمیکو بشخ ئٹ بلوچ راج ئنا ارٹمیکو بھلا بولی براہوئی نا اسہ نغدی پیپر ئس خُواننگا۔اراٹی لمئی بولی نا کڑد ، راج ، فکر و جنگ ئنا بابت ہیت وگپ کننگا۔کہ نن تینا لمئی بولی تےامر رکھن؟ اسہ غلامو راج ئسے تینا گڑا تے بچفنگ کن ہر پارہ غا نت و دو خلوئی و جہد کروئی تمّک۔لمئی بولی تیٹ ادب نا ہر ہر بشخ ئٹ نوشتہ کروئی تمّک ، تانکہ زبان ءِ خُوانوکاک بھاز مریر۔ دا ذمواری ام ننے آ بریک کہ نن تینا لمئی بولی ٹی نوشتہ کین ، اوٹی ہیت کین و ہیل ایتن۔
ڈاکومینٹری دا مچی نا مسٹمیکو بشخ ئٹ اوڑدہ ئس ، اراٹی لمئی بولی تا جہانی دے نا سَوَب مروکا تدینی ارا بنگالی راج ئتون مس ، نشان تننگا، 21 فروری 1952 ئٹ بنگالی ورناک اسہ احتجاجی ریلی ئس کشّار۔ اراٹی اوفتا خواست پاکستان آن دا ئس کہ گونشت ئٹ بنگالیک زیات او تو اردو تون اوار بنگالی زبانءِ ام سرکاری درجہ تننگء۔ولے دافتا خواست آتا پورو کننگ نا جاگہ غا پاکستان نا سرکار اوفتیا سم کاری کرے و نو ورنا کسفے، اندا تدینی نا بنیات آ یونیسیکو نا جنرل اسمبلی 21 فروری ءِ لمئی بولی تا جہانی دے تخا، تانکہ دا دے ئنا یات ئٹ مخلوق تینا لمئی بولی تا مون مُستی دننگا نا کوشستءِ کیر۔
دا مُچی نا چارمیکو شعر و شاعری ئس ، اراٹی ساڑی آ خُواجہ غاک تینا شعرتے پاریر ، شعر ئنا کڑد اسہ پارہ غان غلامو راج ئسے ٹُوہنگ کن ام بنائی دے تیان غرز کننگک تانکہ مخلوق ئٹ اسہ شعور ئس شاغنگے ، ایلو پارہ غان لمئی بولی نا رکھ ئکن ام دانا کڑد بنیاتیءِ ، انتئے کہ ادب (ارا کہ زبان نا کالخواہ و مُخ مریک) نا اِرا بھلا بشخ آن اسٹ شاعریءِ، اوٹی دود ربید آتیان الیس دیہاڑ اسکان غُٹ خوندی مریرہ۔
ایسری بشخ ئٹ مچی نا کماش ہیت و گپ کرسا پارے کہ زوراور نا ڈِٹ و ڈول آک ننے ذہنی غلام کرینو ، ننے ہر بروک ، ہنوکا کاریم ءِ تینا دروشم ئٹ مٹ کرینے ، اندا سوب آن حالیت اینو دادے کہ نن تینا لمئی بولی تے بیرہ سی ایس ایس و پی سی ایس نا پرچہ ٹی سرسوب مننگ کن خواننہ ، دا ننا زبان نا دوستخواک افس ، بلکن پیسہ تون سنگتی و تاس چَٹّنگءِ رغامک ننے ، ننے تینا راج و زبان تا بابت سوچوئیءِ ، تانکہ نن اسہ ذندہ و وسم و وادان و راج ئسے نا دروشم ئٹ مونا برین ، ہر ہمو سِلاہ ارا ننے ایسر کننگ کن جوڑ کننگانے اودے بُن و بیخ آن کشّن تانکہ تینے و تینا راج و زبان آتے بچفنگ کین۔
مُچی کماش نا ہیت آن پد مُچیءِ ایسر کننگ نا پڑو کننگا۔