بلوچستان اور برطانوی مورخین
”بلوچستان اور برطانوی مؤرخین“ ڈاکٹر فاروق بلوچءِ کتابے کہ آ ماں 2018ءَ چہ بلوچی اکیڈمی کوئٹہءِ نیمگءَ چاپ ءُ شنگ بوتگ۔ فاروق بلوچ بُندپترنویسے ءُ بلوچستان مزن شھدربرجاہءَ بندپترءِ ڈیپارٹمنٹءَ اسسٹنٹ پروفیسریءِ اُگدہءِ سرءَ وانینگ اِنت۔ آئیءَ بلوچستانءِ بُندپترءِ سرءَ مزنیں کچےءَ کتاب نبشتہ کُتگ ءُ یک جوانیں ءُ پٹپولی دابےءَ بلوچستانءِ بُندپتر ئِے دیمءَ آؤرتگ۔ آئیءِ لہتیں کتابانی نام چو اے وڑءَ اَنت”بلوچ اور اُن کا وطن “،”بلوچ و بلوچستان قدیم مؤرخین کی نظر میں “،” بلوچ قدیم قبائل اور بلوچستان کی تاریخ “،”مکران و بلوچ اور آریائی تعلقات “ھوار اَنت۔ فاروق بلوچ ھندی (Native) لیکہءِ منوکے بزاں آ گُشیت کہ بلوچ چہ گوستءَ ھمے سرزمینءِ سرءَ نِشتگ ءُ آ اے زمین(بلوچستان)ءِ ھکّیگیں وارس اَنت۔ چوشکہ بازیں بلوچ بُندپترنویسے ھمے لیکہءِ منوک اَنت کہ بلوچ چہ دراتکگیں راجے ءُ آیاں دائم بلوچءِ سیادی گوں عرب، آرین ءُ ایدگہ راجاں گوں بستگ۔ چوشکہ اے لیکہءِ جِند دری نبشتہ کاراں دیم آؤرتگ انچوشکہ آیانی وتی مول ءُ مراد بوتگ اَنت۔ فاروق بلوچ اے لیکہءَ رد کنانءَ گُشیت کہ بلوچ اے سرزمینءِ وارس اَنت ءُ ھزاراں سالاں ھمداں نشتگ اَنت۔
ھمے داب فاروق بلوچءِ اے کتاب ھم یک جوانیں پٹپولی کتابے کہ برطانیہءِ دورءِ ھما مخبرانی سرءَ اِنت کہ آ بلوچستانءَ کاینت دانکہ آ برطانیہءَ پہ راہ ھموار بہ کن اَنت۔ فاروق بلوچ گُشیت کہ ”بلوچستانءَ برطانیہءِ دورءَ مارا سک باز کتاب ءُ مواد دست کپیت کہ اودءَ مارا ھما مُخبرانی ڈس ءُ نشان رس اَنت، بلے چوشکہ کدی اوں کسءَ اے جُہد نہ کُتگ کہ آیانی آیگءِ مول ءُ مرادانی سرءَ نبشتہ بہ کن انت کہ آیانی مول ءُ مراد چے بوتگ؟
فاروق بلوچءِ اے کتاب پنچ بھرءَ اِنت۔ بنداتی بھرءَ نبشتہ کار بلوچستانءِ زمینی ءُ ھندی راستیانی سرءَ چمشانکے دنت۔ بزانکہ بلوچستانءِ زمینی راستی چی اَنت؟ بلوچستانءِ ھد ءُ بندانی کچ ءُ کساس داں کُجا اَنت؟ ایشیءَ چہ ابید آ بلوچستانءِ گوستءِ سیاسی جاورالانی سرءَ ھم کسانیں چمشانکے دنت۔ کتابءِ دومی بھر برطانیہءِ آیگءَ ساری بلوچستانءِ سیاسی چست ءُ ایرانی سرءَ اِنت کہ آوانی آیگءَ چہ ساری اودءِ جاور چوں ءُ چے پیم بوتگ اَنت۔ سیمی بھر ھما مُخبرانی آیگ ءُ آیانی مول ءُ مرادانی سرءَ اِنت کہ آ کدی اتکگ اَنت؟ ءُ آیانی مول ءُ مراد چے بوتگ اَنت؟ ءُ آ وتی مول ءُ مرادانی پورو کنگءَ سوبین بوتگ اَنت یا ناں؟ کتابءِ چارمی بھرءَ نبشتہ کار ھما سان کہ مُخبرانی آیگءَ پد بلوچستانءِ سرءَ کپتگ اَنت، فاروق بلوچ ھمے سانانی سرءَ تران کنت۔ ءُ کتابءِ پنچمی بزاں گُڈّی بھر ھمے ترانانی آسرال (Conclusion) اِنت۔
اولی بھر:
کتابءِ اولی بھرءَ نبشتہ کار بلوچستانءِ زمینی راستیانی سرءَ نبشتہ کنانءَ گُشیت کہ ھستیں وھدءَ بلوچستان سئے بھراں بھر ءُ بانگ اِنت چوشکہ ایران، اوگانستان ءُ پاکستان۔ پاکستانءِ نیمگءَ ھم لہتیں ھند ءُ دمگ ماں پنجاب، سندھ ءُ خیبر پختونخواہءَ ھوار کنگ بوتگ اَنت۔ بزانکہ نبشتہ کارءِ ھیال ھمیش انت کہ پاکستانءَ ھم ھما پالیسیانی سرءَ کاربند اِنت چوشکہ برطانیہءِ زورگیریءِ ھمے شوربندی کار بوتگ اَنت، پمیشکا پاکستانءَ بلوچستانءِ رودراتکی بھر سئے جاگہءَ بھر کتگ۔ چوناھا بلوچستان سرجمءَ کساس 3,40,000 مربع میل اِنت کہ اودءِ زمینءِ گیشتری بھر 60% یا 70% کوہی ھند ءُ دمگ اَنت ءُ لہتیں دمگ میدانی ءُ ریگستانی اَنت ءُ یک کسانیں بھرےءَ زر (دریا) اِنت کہ اودءَ سالءِ دوازدھیں ماھاں بیپار بوت کُت کنت۔ ھمے دابءَ بلوچستان سیاسی ءُ زمینی ردءَ یک پُر ارزشتیں سرڈگارے بوتگ ءُ تنی وھدی است اِنت، چوشکہ آئیءِ زری ءُ زمینی ھد ءُ بند گوں بازیں استاناں سیادی دار اَنت۔ پمیشکا گوستءِ ھر دورءَ بلوچستانءِ یک بلاھیں کردے بوتگ۔ دیمترءَ نبشتہ کار گُشیت کہ بلوچستانءَ چہ دراتکگیں کوھنیں دمباں(آثارِ قدیمہ آں) چہ اے زاھر بیت کہ اودءِ دودمان 11000 سال کوھن اِنت کہ اے دور انسانانی زمینءِ سرءَ اولی دور گُشگ بیت۔ وھدے انسان گاراں چہ در کپیت ءُ زمینءِ سرءَ کیت۔ گُڈسرءَ نبشتہ کار نبشتہ کنت کہ بلوچستانءِ زمینءِ پُر ارزشتیءِ سبب ما گِند ایں کہ بلوچستان ھر دورءَ دری زورآورانی دیمپان بوتگ ءُ ھرزورآورےءَ اودءِ جوڈشتءِ سرءَ سان دور داتگ۔ بلے اودءِ مھلوک بِھ ھاموشیءَ نہ نشتگ اَنت آیاں دائم دری زورآورانی دیمءَ گہگیری کُتگ ءُ وتی ایردستی نہ منّ اِتگ۔ آ تُری آرینانی دور بہ بیت یا کہ آشوری ءُ ایدگہ راجانی۔ ھمے دابءَ پانزدھمی کرنءَ بلوچستانءِ سرءَ اودءِ ھندی ٹِکاں داں مزنیں ھدّےءَ گر ءُ بندے بیت ءُ ماں شانزدھمی ءُ ھبدھمی کرنءِ گُڈسرءَ آیانی یک ھکومتے بیت ءُ آیانی بنجاہ (کلات) بیت۔ بلے وھدے برطانیہءَ ھندوستانءِ زورگیریءَ چہ روسءَ پُلگءِ سما کپیت داں آ بلوچستان، سندھ ءُ اوگانستانءِ سرءَ اُرش کنت ءُ اودءِ مھلوکءَ وتی ایردست کنت۔ ھمے دابءَ بلوچستان برطانیہءِ ایردست بیت۔
دومی بھر:
دومی بھرءَ نبشتہ کار تران کنت کہ بلوچستانءِ سرءَ برطانیہءِ مُخبرانی آیگ چہ 18دھمی دھکءِ گُڈسر ءُ 19دھمی دھکءِ بنداتءَ بنا بیت۔ مُکبرانی آیگ ءَ چہ ساری بلوچستان یک آزات ءُ وتواجہیں اِستان ءِ بیت کہ اودا بلوچانی ھکومتی بیت ءُ آیانی بُنجاہ قلات بیت ۔ دیمترا آ نبشتہ کنت کہ بلوچانی ھکومتی چہ 1410 ءَ بندات بیت وھد ءِ بلوچانی کمبرانی میروانی ٹِک گوں دگہ لہتیں ٹِک اَں ھوار منگولانی سرا اُرش کن اَنت ءُ آیاں چہ بلوچستانءَ در کن اَنت۔ ھمے دابءَ آیانی ھکومتی پراہ ءُ شاھگان بوان بیت داں نوری نصیر خانءِ دورءَ آ سرجمیں بلوچاں یکجاہ کنت ءُ یک بُنجاہےءَ کاریت۔ نوری نصیر خانءِ دور بلوچانی ھکومتیءِ کامیاب تریں دور گُشگ بیت کہ آ دورءَ بلوچستان باز دیمروئی کنت۔ ملکءِ نظامءِ رکینگءَ سیاسی ءُ معاشی ادارہ جوڑ کنگ بیت، مردمانی کانودءِ پابند کنگءَ رھبند جوڑ کنگ بیت ءُ ھمے دورءَ بلوچستانءِ زمینی ھد ءُ بند گیشینگ بنت۔ بلے وھدے نوری نصیر خان 45 سال ھکوت کنگءَ رند 1795 بیران بیت گُڑا آئیءِ زھگ میر محمود خان ھکومتیءَ آرگ بیت کہ آئیءِ امر کساس 7 یا 10 سال بیت۔ ھمے دورءَ بلوچستانءِ مُھکمیں نظام کم کمءَ نزور تریت۔ گُڈسرءَ فاروق بلوچ نبشتہ کنت کہ اے ھمے دور بیت (1795) کہ برطانیہءِ مخبرانی آیگ ماں بلوچستانءَ بندات بیت۔ 1795 ءَ پد بلوچستانءِ جاورال مٹ بنت ءُ گوستءِ نظام نزور بوان بیت داں 1839ءَ برطانیہ بلوچستانءَ پوج کشی کنت ءُ مزنیں ھونریچی یےءَ پد برطانیہ اودءِ قبضہ کنگءَ سوبین بیت۔
سیمی بھر:
سیمی بھرءَ فاروق بلوچ نبشتہ کنت کہ بلوچستانءَ انگریزءِ مُخبرانی آیگ چہ 1795ءَ بندات بیت کہ انگریز غلام سرور نامی ئیں مخبرے ماں بلوچستانءَ دیم دنت کہ آ سالےءَ داں بلوچستانءَ نندیت ءُ اودءِ سیاسی، روزیگی (معاشی)، پوجی ءُ زمینی جاورانی بابتءَ سرپدی یکجاہ کنت ءُ انگریزان سر اش کنت۔ غلام سرورءِ داتگیں سرپدیاں رند برطانیہ وتی شوربندیاں جوڑ کنت ءُ پدا ماں 1809 برطانیہ وتی سئے پوجی کماندار ہنری فوٹنگر، کرسٹی ءُ گرانٹءَ بلوچستانءَ پہ مخبریءَ دیم دنت۔ ایشاں چہ ابید برطانیہءِ بازیں مخبرے ماں بلوچستانءَ کیت بلے ایشانی کِرد سرجمءَ جتا بیت۔ نبشتہ کارءِ ردءَ سئے پوجی کماندارءِ درچنگ ءُ بلوچستانءَ دیم دیگءِ سوب اے بیت کہ آ بلوچستانءِ پوجی دروشُمےءَ چار ءُ تپاسءَ بکن اَنت۔ اگاں سر زاھرءَ بچار اِت گڑا آیانی مول ءُ مراد اے بیت کہ آ بلوچستانءِ سیاسی، معاشی، پوجی ءُ زمینی جاورانی چار ءُ تپاسءَ بکن اَنت بلے ایشاں چہ ابید آیانی دگہ مستریں مول ءُ مراد ھم بنت۔ دیمترءَ نبشتہ کار گُشیت کہ برطانیہءِ مخبرانی مول ءُ مراد آیانی نبشتہ کُتگیں سفرنامگاں چہ گندگ بنت کہ آ گوں وت اودءِ جاورالاں نبشتہ کنان بنت چوشکہ یک نیمگے آ بلوچانی مھمانداری ءُ چاگردی جوڑشتءِ ستاہءَ کن اَنت بلے دومی نیمگءَ آ انگت بلوچاں جاھل، جٹ ءُ پھوال گُش اَنت۔
دیمترءَ فاروق بلوچ نبشتہ کنت کہ انگریز مخبرانی مستریں کار اے بنت کہ آ بلوچاں راجی، ٹکی، ھندی ءُ زبانی ردءَ جتا بکن اَنت ءُ آیاں نزور بکن اَنت دانکہ آیانی قبضہ کنگءِ ھاترءَ راہ پچ بہ بنت۔ پہ درور ہنری پوٹنگر بلوچی ءُ براھوی ھبر کنوکاں دو جتائیں ٹک لیک اِیت ءُ آیاں جُتا کنگءِ جہدءَ کنت ءُ آ وتی اے پندلءَ سوبین بیت پمیشکہ داں روچء مرچی ھم اے سان مارا مئے چاگردءَ گندگءَ کاینت۔ ھمے دابءَ آ بلوچانی تَمنی(قبائلی) جوڑشتءَ ھم تاوانبار کن اَنت ءُ وتی مرضی ءُ منشاءءَ تَمنی نظامے کار انت۔ آ سرداراں زر ءُ مالءِ لب ءُ لالچءَ دینت ءُ وتی مول ءُ مرادانی واستہ کارمرز اش کن اَنت۔ آ بلوچستانءِ بُندپترءَ ھم مسخ کن اَنت ءُ وتی دابءَ بلوچستانءِ بُندپترءَ نویس اَنت۔ چوشکہ آ بلوچاں باز براں عرب ءُ باز رنداں آرینانی شاہ ءُ بہرے لیک اَنت۔
گڈسرءَ فاروق بلوچ نبشتہ کنت کہ مُدام یک زورآوریں راجے وتءَ چہ نزورتریں راجےءِ سرءَ قبضہ کنگءِ واستہ دائم ھمے وڑیں پندل سازیت۔ آیاں وتءَ چہ کمتر لیک ایت، آیانی بُندپترءَ مسخ کنت، آیاں وت ماں وتی جیڑھاں گوں مان گیشینیت دانکہ آ وتی راستیں جیڑہءَ سرپد مہ بنت ءُ گہگیری مہ کن اَنت۔
چارُمی بھر:
کتابءِ چارُمی بھرءَ فاروق بلوچ نبشتہ کنت کہ برطانیہءِ جاسوسانی آیگ ءُ رندءَ بلوچستانءِ سرءَ زوریں قبضہ کنگءَ بلوچستانءِ راجی، سیاسی، نسلی، قبائلی، لبزانکی ءُ زمینی چاگرد سک تاوانبار کُتگ۔ آ تاوان تُری بلوچءِ نسلی بھر ءُ بانگے بہ بیت یا بلوچءِ زمینی بھر ءُ بانگ کنگ، آیاں وڑ وڑیں پندل ساز اِتگ بلوچءِ نزور کنگءِ واستہ ءُ ھمے پندلانی سان داں روچء مروچی ھم مارا گندگءَ کاینت۔ چوشکہ آیانی مستریں پندلاں چہ یکے بلوچانی بھر ءُ بانگ کنگءِ بوتگ بزانکہ بہر ءُ بانگی پالیسیءِ بنیاتءَ بلوچ راجءَ ایردست بہ کن۔ پہ درور آیاں بلوچی ءُ براھوی ھبر کنوکاں دو جتائیں نسل لیک اِتگ ءُ آیانی میانءَ ناتپاکی ءُ راجدوستیءِ سنچ ھلاس کُتگ۔ ھمے دابءَ آیاں بلوچانی زمین ماں سئے استاناں بھر کُتگ دانکہ آ یک تاکتے جوڑ مہ بیت ءُ آیانی تاکت بھر بہ بیت۔ دیمترءَ فاروق نبشتہ کنت کہ آیاں بلوچانی قبائلی نظام ھم تاوان داتگ۔ بزانکہ آیاں بلوچانی راستیں قبائلی نظامءِ رنگ ءُ دروشم مٹ کُتگ ءُ یک نوکیں وتی مرضیءِ قبائلی نظامے دیمءَ آؤرتگ۔ آیاں قبائلی سردار زر ءُ مالءِ لالچ داتگ اَنت ءُ وتی مفادانی واستہ کارمرز کُتگ اَنت۔
دیمترءَ نبشتہ کار گُشیت کہ برطانیہءِ مُخبر ءُ کارندگاں مستریں سان ماں بلوچانی بُندپترءِ سرءَ دور داتگ۔ بزانکہ برطانیہءِ کارندگانی یک ٹولی یے بوتگ کہ آیاں بلوچانی بُندپتر نبشتہ کُتگ۔ ءُ آیاں دائم بلوچانی بُندتر رد نبشتہ کُتگ دانکہ آ وتی پجّارءَ آشنا مہ بنت۔ فاروق بلوچءِ ردءَ ھمے برطانیہءِ کارندگاں کہ بلوچانی بُندپتر نویستگ گڑا آ گیشتر پوجی بیتگ اَنت کہ آیاں دپترنویسیءِ ھچ علم نہ بوتگ۔ دیمءَ آ نبشتہ کنت کہ ھمے پندلاں چہ لہتیں بلوچ راجءَ جوان ھم بوتگ اَنت۔ چوشکہ انگریزاں چہ ساری بلوچانی کرّءَ نبشتہ کنگءِ رواج نہ بوتگ ءُ بلوچانی بُندپتر نبشتہ کُتگیں دابےءَ نہ بوتگ۔ بلے برطانیہءِ آیگءَ پد دپترنویسی رواج گیپت ءُ برطانیہ نبشتہ کُتگیں مواداں چہ مارا بازیں سرپدی دست کپیت۔
پنچُمی بھر:
کتابءِ پنچُمی بھر فاروق بلوچ نبشتہ کنت کہ اے تراناں چہ ما اے سرپد بوتیں کہ کدی ھم برطانیہءِ وڑیں قبضہ گیریں اِستانے وتءَ چہ نزورتریں راجےءِ واستہ ھمدردی نہ داریت ءُ آیانی سرءَ نئیت وتی زر مال ءُ زانتءَ ھرچ نہ کنت بلکیں آیانی وتی مفاد بنت کہ آیانی پیلو کنگءِ واستہ وڑ وڑیں مکربازی ءُ پندل سازی کن اَنت چوشکہ پوٹنگر، کرسٹی ءُ ایدگہ برطانیہ مخبراں ماں بلوچستانءَ کُتگ انت۔ ایشاں چہ ساری بلوچ چاگردءَ اے وڑیں نسلی ءُ زبانی پرک ءُ پیر، ناتپاکی ءُ ایدگہ گندگ کاریانی وجود نہ بوتگ بزانکہ اے سرجمیں برطانیہ یے آؤرتگین اَنت۔
گُڈسرءَ نبشتہ کار گُشیت کہ نُوں زلورت ءُ المی ھمیش اِنت کہ ما وتی بُندپترءَ بہ وان ایں ءُ اے وڑیں دری سازش ءُ پندلانی پجّارءَ بہ کنیں ءُ دیمءَ بیاریں۔
اے کتاب ھر ھما بلوچ نودربر ءِ واستہ اِنت کہ آ وتی گوست ءَ زانگ لوٹیت ءُ ھر ھما پندلاں کہ آ دری مردُماں آؤرتگ اَنت کہ آیانی سان مرچی ھم گندگ ءَ کاینت ءُ مرچی ھم آیانی گیش کنگ ءِ واستہ کار کنگ بوھگ ءَ اِنت ۔ اے ھمک بلوچ نودربر ءِ ذمہ واری بیت کہ آیان بوان اِیت پجّا بیار اِیت ءُ وتی مھلوک ءِ دیم ءَ بیار اِیت ئِے۔
____________________
اے نبشتانکءِ تہءَ درشان کُتگیں ھیالءُ لیکہ نبشتہ کارءِ وتیگ اَنت ہژدری نہ اِنت کہ بی ایس سی اسلام آباد آئیءِ ھیالءُ لیکہاں گوں منوگر بہ بیت۔