بی ایس سی، اسلام آباد ءِ دومی سالانہ لبزانکی ءُ وانگی میڑہ ابّا مُبارک قاضیؔ ءِ یات ءَ گوں سوبمندی ءَ برجم دارگ بُوت۔

پریس  ریلیز

بی ایس سی، اسلام آباد ءِ دومی سالانہ میڑہ واجہ مُبارک قاضیؔ ءِ یات ءَ برجم دارگ بوت۔ اے مراگش ءَ ڈاکومنٹری، گُشتانک، کسمانک، ٹیبلو، شائری ، پینل ڈسکشن ، بلوچی چاپ، بُک اسٹال، کلچرل اسٹال ، آرٹ ایگزیبیشنءُ پولکاری بھر ہوار اِتنت۔ اے مراگشءَ جتا جتائیں سرھالانی سر ءَ جِتائیں پِڑانی زانتکار ، لبزانکار ، بندپتر نویس ، شاعر، زبانزانت ءُ زانوگراں وتی ھیال درشان کُتنت۔ ابّا مُبارک قاضیؔ ءِ پینل ءَ ترانکاراں گُشت کہ مُبارک قاضیؔ راجی ءُ اے اھد ءِ شائر اِنت ۔ ءُ قاضیؔ کدی چہ گیدی شائری ءَ نہ سستگ مُدام وتی ساچشتانی تہ ءَ راجی درد ءُ مارشت ءِ درانگازی کُتگ ئِے ۔ قاضیؔ ءِ ساچشتانی وانگ ءَ پد وانوک ءَ را سما بیت کہ آ بلوچ زمین ءِ سرءِجھمنندیں ساچشتکارے ءُ وتی زمین نندوکیں مھلوک ءِ درد ءُ اندوھاں مارگ ءَ اِنت ءُ چرے جاوراں وت ءَ گِستا دارگ ءَ نہ اِنت ۔ اے بھرءَترانکارانی گُشگ اَت کہ قاضیؔ بلوچ ءِ ھمک اھد ءِ جھگیری ءَ کنت ۔

 دیمتر ءَ ڈاکٹر فاروق کہ نامداریں بندپتر نویس ءُ زانتکارے آئیءِگُشگ اَت کہ بلوچ چہ کرناں ءُ بُن ءُ بیھ ءَ ہمے زمین ءِ نندوک اِنت ءُ دری نِبشتہ کاراں مُدام ہمے کوشِست کُتگ کہ وتی نبشتانک ءُ نکانانی تہ ءَ بلوچ ءَ اے زمین ءِ وارس مہ لیک اَنت ءُ آئی ءَ درامد پیش بدار اَنت ۔ فاروق بلوچ ءِ ردا بلوچ ہمد ءِ نندوک اِنت ءُ اے برتانیہ ءُ دگہ دری نبشتہ کارانی ڈسکورس بُوتگ کہ چوں یک زمینے ءِ سر ءِ نندوکیں مردمے ءَ درامد پیش بہ داریں ۔ فاروق بلوچ ڈنّی سرجمیں ڈسکورساں نہ منّیت ءُ ہمے گُشیت کہ بائدیں بلوچ وت ءَ وتی چمّاں بہ چاریت ءُ زمین ءِ ارزشت ءَ سرپد بہ بیت۔ ءُ نودربراناں ہمے سوج ءُ سکین ئِے دات کہ آ بوان اَنت ءُ  وتی گیشیں وھد ءَ گوں وانگ ءَ بہ گوازیننت ۔ چوکہ پروگرام ءَ بازیں بھرے ہوار اَت آوانی تہ ءَ ٹیبلو ءُ کسمانک ھم مان اَت ۔

 ٹیبلو ءِ بنگپ تُرس ءُ مروچی ئیں دؤر ءِ بلوچ نودربرانی وتی زمین ءُ جاوراں چہ سندگ ءِ سر ءَ اَت ءُ گیش نپری زندگی ( انفرادی زندگی ) ءِ سرءَ اَت کہ بلوچ نودربراں پہ المّی اِنت کہ گوں وتی راجی جیڑہ ءُ راجی درد ءَ بندوک بہ بنت ۔ مروچی باند ءَ ہما آزاد ھیالی ءِ چاگرد کہ وتی سرا چِست کنان اِنت ءُ تیزی ءَ گوں بلوچ نودربراں وتی آماچ کنگ ءَ اِنت ۔ اے جاور کہ مروچی جوڑ بُوتگ اَنت کہ بازیں نودربرے ھمے ماریت مارا اے جیڑہ ءُ جنجالاں گوں کار نیست ءُ جیڑہ مئے نہ اَنت ۔ اے بیانیہ ءِ جِند زوراک ءِ  بیانیہ اِنت کہ بلوچ نودربر چہ وتی راجی جیڑہ ءُ جنجالاں چہ بے سما ءُ گیر سیاسی بہ بنت دانکہ آوانی بودناکی ھلاس بہ بیت ءُ آ ہچ ھساب ءَ جیڑ اِت مہ کن اَنت۔ کسمانک ھم اَنچیں تبکہ ئے ءِ سرا اَت کہ گندگ ءُ زاہر ءَ وت ءَ بلوچ ءِ دوزواہ پیش دار اَنت بلئے گواچن ءَ اے بلوچءِمستریں دژمن اَنت ۔ دیمتری دوئیں پینل کہ یکّے پَٹ ءُ پول ءِ ارزشت ءُ بلوچ لبزانک ءِ سر ءَ اَت ایشی ءِ تہ ءَ پولکار ءُ زانوگرانی ہمے ہیال اَت کہ زورگیر ءِ جوڑ کُتگیں اِلم کہ مئے ہمک روچی ئیں زند ءُ گیش المی پِڑاں سانمند کنگ ءَ اَنت ۔ 

اے سرھال ءِ بنگپ ہمیش اَت کہ پولکاری ءِ مزنیں ارزشتے ءُ اوپار ءُ سگّے لوٹیت ۔ اے اَنچیں کارے کہ سالانی سال پولکار ءَ درکار بیت کہ آ نکان جم بہ کنت ءُ گوں دلجمی ءَکار بہ کنت ۔ سیمی پینل نوک آباتی ذہنیت ءُ بلوچ چاگرد ءِ سر ءَ ایشی ءِ اسرانی سر ءَ اَت ۔ نوک آبات ءَ بلوچ چاگرد ءِ مچّانکی تب سرجم ءَ مَٹ کُتگ ءُ اَنچیں جاور پیداک کُتگ کہ ہمک مردم ہمے ماریت کہ اے جیڑہ منی نہ اِنت ءُ نپری تب گیش ودّتگ ۔ نوک آبات ءِ مُدام کوشست ہمیش اِنت کہ جھمنند ءِ مجگ ءَ وتی چنگلانی تہ ءَ بہ کنت ءُ آئی ءَ وتی ھساب ءَ جیڑگ ءَ لاچار بہ کنت ۔ ڈاکٹر ماہ رنگ ءَ گُشتانک دیان ءَ گُشت کہ پہ بلوچ نودربراں اے وھد ءَ ہژدری اِنت کہ گیش تِپاک ءُ یکجاہ بہ بنت ءُ وتی راجی عمل ءِ بھر بہ بنت ۔ مروچی ہمے نودربر کہ وانگ ءَ اَنت باندا وانگءِسرجم کنگ ءَ پد پہ آواں ہژدری اِنت وتی چاگرد ءَ بُرونت ءُ ہمودا وتی عملاں برجم بِدار اَنت۔ بلوچ مروچی اَنچیں جاوراں گوں دُوچار اِنت کہ ایشی ءِ تہ ءَ مستریں زمہ واری بلوچ نودربر ءُ ورناھانی اِنت کہ راجی بار ءَ وتی کوپگاں بُزور اَنت ءُوتءَچاگرد ءِ زمہ واریں بھرے بہ لیکنت۔ 

مراگِش ءِ گُڈی بھر ابّا مبارک قازیؔ ءِ بابت ءَ ڈاکومنٹری اَت کہ دیوان ءِ تہ ءَ نندوکیں مردماناں پیش دارگ بُوت۔ اے مراگشءَ جِتا جِتائیں جاگھانی نودربر ءُ جِتائیں پڑانی مردماں بھر زُرت ءُ سوبمندی ءَ گوں اے مراگش آسر بُوت۔

بلوچ   سٹوڈنٹس  کونسل (اسلام آباد)