براہوئی مَٹ: بینکنگ نظریہ تعلیم (تعلیم اور مظلوم عوام)
براہوئی مٹ: الطاف بلوچ
استاد--- شاگرد نا سیالی ارا جاگہہ اٹی ءِ، سکول نا تہٹی یا پیشن، خُڑکی اٹ تجزیہ دا سیالی نا بنیاد اٹ "بیانیہ" کڑد ءِ پاش کیک۔ دا سیالی اسہ تران کروک یعنی کاریم کروک/فاعل (استاد) ءُ سگ والا خفتوروک مروک/مفعول (شاگرد) نا ءِ۔ دا سیالی نا بنیاد چاہے اقدار آک (Values) مرے یا راستکی نا تجرباتی پہلو، بیانیہ وڈ اٹ عمل اٹی شاگرد آتے بے حس کننگ نا رجحان تخک۔ تعلیم "بیانیہ" ناجوڑی نا گواچی ءِ۔
استاد حقیقت نا ایت ءِ اندُن کیک کہ دُنکہ حقیقت سلوک/غیرمتحرک، جامد ءُ جِتا جِتا انگا ڈبہ آتہٹی ونڈ ءِ کہ وختان مُست پاننگ مریک۔ یا او اسہ دُنو موضوع نا زی آ تقریر کیک کہ اونا شاگرد آتا ساڈی انگا تجربہ آتون ہچ سیالی تخپک۔ استاد نا کاریم دا جوڑ مسونے کہ شاگرد آتے تینا بیانیہ نا گِڈا (Content) آ پُر کہ۔ گِڈاک (Content) کہ راستکی ءُ کُل آن جتاؤ۔ دُن لوز آک راستکی آن مُر، بے معنی، بیگانئی ءُ بے تعلق ءَ لوزآتون مَٹ مریرہ۔
دا بیانیہ تعلیم نا پاش انگا پہلو دا جوڑ مریک کہ لوز آک تینا مَٹ کننگ نا طاغت آ محروم مریرہ ءُ صرف توار اس جوڑ مریرہ دُنکہ "چار ضرب چارشانزدہ ءِ"۔ "پارہ نا دارالحکومت بالم ءِ"۔ شاگرد دا ایت آتا جِک و پشخار (Repeat) کیک، یاد کیک دا چاہنگ آ بغیر کہ چار ضرب چار نا حقیقت اٹ انت معنی مریک۔ یا بال نا شہر پارہ کِن امرو اہمیت تخیک۔ ءُ پارہ نا برازیل کِن انت اہمیت اسے۔
بیانیہ (دُنکہ استاد بیان کروک) نا دا نتیجہ مریک کہ شاگرد بیان مروک آ گِڈا آتے میکانکی وڈئٹ یاد کیک۔ داکان ام بدتر دا کہ دا انداز شاگرد آتے "ڈبّہ" آن مَٹ کیک کہ دادے استاد ءِ پُر کروئی ءِ۔ اخس گیشتر او دا ڈبہ آتے پُر کیک او انداخس جوانو استاد اسے۔ اخس زیات حاجزی اٹ شاگرد آک دا ڈبہ آتے پُر کننگ نا موکل/اجازت ایترہ انداخس او جوانو شاگرد آک ءُ۔
دا وڈ تعلیم فقط پُر کننگ نا عمل اس جوڑ مریک۔ دا تعلیم نا بینکنگ نظریہ ءِ کہ دافتہٹی شاگرد ءِ اگہ کاریم نا موکل ارے او فقط دادے کہ او بیان بِنے ءُ تینا خالی دماغ آتے پُر کہ۔
بینکنک تعلیمی نظام اٹ اوفک کہ علم اتیرہ تینے علم دان چارہ ءُ اوفتے کہ علم ملیک جاہل چارہ کہ دا علم اوفتان ٹیکی ئسے۔ ایلو نا زی آن مُدامی جہالت ءِ خسِنگ کہ ظلم نا آئیڈیالوجی ءِ تینٹ تعلیم ءُ علم نا ایل کننگ (جستجو) نا عمل آن انکار اسے۔ استاد اونا جہالت ءِ مدامی سمجھک ءُ تینا وجود ءِ جواز ایتک۔ شاگرد ہیگل جدلیات (Dialectics) نا غلامی نا امبار بیگانگی اٹ تینا جہالت ءِ منِک۔ او ہچ دا ایت ءِ پوہ مفسہ کہ اوفک استاد نا تربیت ءِ کننگ ءُ۔
تعلیم نا بِنا استاد-شاگر نا تضاد (Contradiction) نا حل آن بِنا مننگ لازمی ءِ۔ دا تضاد نا ارتوما کُنڈان دنو خُڑکی کہ ارتماک (استاد-شاگر) اسے وختان استاد ءُ ام شاگرد ءُ ام۔
دا حل بینکنگ نظریہ تعلیم اٹ افک (ءُ نیکہ مننگ کیک) بلکہ بینکنک نظریہ تعلیم دا تضاد ءِ نہ فقط برجم تخک بلکہ منہ رویہ ءُ عمل آتون دا تضاد ءِ زیات مھکم کیک کہ دا ظلم نا آماچ انگا چاگڑد نا نشانی ءِ۔ منہ رویہ ءُ عمل آک کہ دا تضاد ءِ مھکم کیرہ:
• استاد ایل ایتک ءُ شاگر ایل کیک۔
• استاد ہر ایت ءِ چاہک ءُ شاگرد ہچ گِڈا تپک
• استاد سوچ خلیک ءُ شاگرد نا باروٹ سوچنگ مریک۔
• استاد ایت کیک ءُ شاگرد آک بنیرہ حاجزی آتون۔
• استاد نظم ءُ ضبط ءِ جوڑ کیک ءُ شاگرد آتا نظم ءُ ضبط تخنگ مریک
• استاد گچین کیک، تینا چونڑ (Choice) ءِ شاگرد آتا زی آن خسِک ءُ شاگرد آک دا چونڑ نا حساب اٹ عمل کیرہ
• استاد عمل کیک ءُ شاگرد آک استاد نا عمل آں دا دغہ کنیرہ کہ نن ام عمل کننگ ءُ۔
• استاد تعلیم کورس (Content) ءِ گچین کیک ءُ شاگرد (اوفتیان مشورہ التنے) دادے قبول کیرہ۔
• استاد علم نا طاغت ءِ تینا پیشہ نا طاغت آتون گَڈوَڈ کیک ءُ دادے شاگرد آتا آزادی نا برخلاف تخک ءُ اُریک۔
• خواننگ نا دوران آن استاد نا کڑد کروک (فاعل) ءُ شاگرد نا کڑد فقط خفتورک (مفہول) نا حیثیت تخک
دا گُڈیفوک ءُ ایت اس اف کہ بینکنک نظریہ تعلیم انسان آتے قابو مروک ءُ گِڈا (Object) اس سمجھیک۔ اخس زیات شاگرد آک وصول مروک آ گِڈا آتے تینا تہٹی سٹور کیرہ اندا خس کم اوفک تینا تنقیدی شعور ءِ پُرشون کیرہ۔ اخس تیوی غان اوفک تینا زی آن خسنگوک مفعولی کڑد ءِ قبول کیرہ اندا خس زیات اوفک کائنات کہ امر ارے، نا مونا حقیقت نا معمولی نظریہ کہ اونا تہٹ سٹور مسونے نا مونا تینے اندا دروشم آ جوڑ کننگ نا رجحان تخرہ۔
بینکنک نظریہ تعلیم اٹ شاگرد نا تخلیقی قوت ءِ ختم کننگ یا کم کننگ ءُ اونا سادہ مزاجی ظالم آتا فائدغان کاہک کہ اوفک نئیکہ کائنات ءِ پاش کننگ خوارہ ءُ نئیکہ دادے مَٹ مننگ خوارہ۔ اندا وڈ تقریباً انسانیت نا پِنا آ تعلیم اٹ ہر ھمو تجربہ نا مخالفت کیرہ کہ او تنقیدی صلاحیت آتے پُرشون کیرہ ءُ حقیقت نا نامکمل انگا خیال آن ناخوشی نا اظہار کیرہ۔
حقیقت آن ظالم آتا فائدہ دا ایت ٹٰی ءِ دُنکہ Simon de Beauvoir پاہک:-
"مظلوم آتا شعور ءِ مَٹ کرک ولے دا ھالیت ءِ اخہ کہ دا اونا زی آن جبر کیک"۔ انتئیکہ اخس زیات مظلوم آتے ھالیت ءِ قبول کننگ کِن آمادہ کننگ مریک انداخس زیات آسانی اٹ اونا زی آن حکومت مننگ کیک۔ دا مسخت نا خاطران ظالم آک پدرانہ شفقت نا چاگڑدی عمل ءُ بینکنگ نظریہ تعلیم ءِ کاریم اٹ اتیرہ۔ مظلوم آتے اندُن کمتر پوہ مریرہ کہ اوفک "جوانو، منظم ءُ بے ریا انگا" چاگڑد نا خیال ءِ منفسہ۔ مظلوم آتے جوانو چاگڑد اٹ خرابی نا سبب چارہ ءُ دا جوانو چاگڑد نا دا زمہ واری ءِ کہ او دا "نااہل ءُ سُست" انگا بندغ آتے زہنی مَٹی تون تینا وڈ اٹ جوڑ کرے۔ دا غیر حقیقی انسان (مظلوم) آتے دا جوانو چاگڑد ٹی "مدغم ءُ شامل" کننگ نا ضرورت ءِ کہ او دا چاگڑد ءِ الانو۔
ولے راستی دادے کہ مظلوم آک کمتر انسان افس ءُ نئیکہ چاگڑد آن "پیشن" رہنگرہ۔ اوفک ہر وخت اندا چاگڑد ٹی ساڈی مسونو، اندا ڈھانچہ نا تہٹی کہ دا اوفتے "ایلو آتے وجود اس" جوڑ مسونو۔ دانا حل دا افک کہ اوفتے دا جبر نا ڈھانچہ ٹی مدغم کیر ولے ضرورت دا ڈھانچہ نا مَٹی نا ءِ تانکہ "اوفک تینکِن وجود اس" جوڑ مریر۔ ظالم شاگرد آتے تنقیدی شعور مننگ نا خطرہ ءِ تل ول (Avoid) کننگ کِن بینکنگ نظریہ تعلیم ءِ کاریم اٹ اتیک۔
مثال اس کہ تعلیمِ بالغاں (Adult Education) ٹی بینکنگ نظریہ تعلیم اسُل دا تجویز تفک کہ اوفک حقیقت نا تنقیدی جائزہ الیر۔ بجائے داکان دا نظریہ تعلیم دنُو "اہم " مسائل آتون تفوک ءِ کہ " روجر ہیٹ ءِ خَر وُسّی /بے ایتے"۔ (دا مثال ٹی پالو فرایرے بینکنک نظامِ تعلیم ءِ طنزاً تنقید کننگ ءِ)۔
ھمو بندغاک کہ اوفک شعوری یا لاشعوری اٹ (انتئیکہ منہ جوانو نیت نا بینکنگ کلرک استاد آک ام اریر کہ اوفک دا ایت ءِ تپسہ کہ اوفک راستی اٹ انسان آتے فقط پستی ٹی دِھّکہ تِننگ ءُ) بینکنک نظریہ تعلیم ءِ کاریم ئٹی ہتِنگ ءُ، دا پوہ مفسہ کہ "جمع" کروک آ گِڈاک (Content) تینٹ حقیقت نا باروٹ تضاد آن پُر ءُ۔ زوت یا اُرے آن دا تضاد آک گدرینگوکا خفتوروک شاگرد آتے تینا "ڈی یومنائز Dehumanize" نا عمل نا خلاف ءُ حقیقت ءِ ڈھکِنگ نا خلاف بَش کیرہ۔ دا شاگرد آک تینا ساڈی انگا تجربہ آتون دا دریافت کننگ کیرہ کہ اوفتا ساڈی انگا زندگی مکمل انسان مننگ نا زمہ واری تون مطابقت تخپک۔ تینا ءُ حقیقت نا سیالی آ اوفک دا ایت ءِ پوہ مریرہ کہ حقیقت دراصل اسے جاری"مرحلہ" اسہ کہ دانا تہٹی ہر وخت مَٹی مننگ ءِ۔
ولے انسان دوست، انقلابی تعلیم دان دا امکان نا راستی اٹ مَٹ مننگ نا انتظار کننگ کپک۔ اندا وجہ غان ضروری ءِ کہ بُنکی آن اوفتا کوشست دا مرے کہ شاگرد آتون اوفتا سیالی اھواری کمک اٹ مرے ءُ اوفک شاگرد آتون اھوار حقیقت ءِ پاش کننگ نا کوشست کیر۔
بینکنگ نظریہ تعلیم نا بنیاد دا مفروضہ نا زی آن ءِ کہ انسان ءُ کائنات جِتا جِتا وجود تخرہ۔ یعنی انسان کائنات "اٹی" ءِ ءُ کائنات ءُ ایلو "آتون" افک؛ انسان کائنات ٹی اُروک اسے، تخلیق کار اس افک۔ دا نظریہ تعلیم نا رِد اٹ انسان اسہ شعوری وجود Corpo Consciente اف بلکہ او شعور نا ملکیت تخوک اسے: اسے خالی "دماغ" کہ خفتوروک (مفعولی) ھالیت اٹ ملوک ءِ کہ حقیقت نا چاہنداری ءِ کائنات آن پیشن کیک۔ دا رِد اٹ استاد نا کاریم دادے کہ او شاگرد ءِ معلومات نا زخیرہ آن "پُر" کرسہ کیک کہ دادے اوفک راست انگا علم چارہ۔ دُنو نظریہ تعلیم ٹی تنقیدی طرزِ فکر نا ہچ گنجائش اف ءُ ہراتم ظالم آتا نظریہ تعلیم ءِ سوالیہ نشان جوڑ کننگ آن بجائے اگہ زیات دادے خفتوروک نا امبار قبول کین گُڈا دا پوہ مننگ مشکل اف کہ انتئہ حکمران بینکنگ نظریہ تعلیم ءِ نظریاتی رِد اٹ داخس اہم چارہ۔ انتئیکہ دا نظریہ تعلیم دُنو انسان پیدا کیک کہ او سادہ تَب (سدھایا ہوا) ءُ کہ تعلیم یافتہ بندغ سادہ تَب اسے۔
دُنکہ بینکنگ نظریہ تعلیم انسان ءِ اسہ مفعول (Passive) گڈا اس چاہک اندا وجہ غان بینکنگ نظریہ تعلیم دا پُرشونی (نشونما) ءِ کپک کہ دادے Erich Formm "زند تون مابت" Biophily نا پِن اتیک۔ بلکہ بجائے دانا دا "مرگ تون مابت" Necrophilous ءِ پیدا کیک۔ (مرگ تون مابت ‘Necrophlic’ نا مطلب دادے کہ مظلوم تینتون مروکا تادی ءُ بیدادی تے تینا نصیب سرپند مریسہ تینا مرگ ئنا چاری مریک)۔
"مرگ تون مابت کروک Necrophilous کُل ھمو گڈا آتون مابت کیک کہ اونا نشونما مفکک یعنی میکانکی گڈا آک۔ دُںو بندغ ارتقائی (Organic) ءِ غیر ارتقائی (Inorganic) اٹی مَٹ کننگ نا ھُب ءِ تخک، زندگی ءِ میکانکی انداز اٹ اُریک کہ کُل زندہ انگا بندغاک گڈا آک (things) ءُ--- تجربہ نا جاگہ غان حافظہ، مننگ نا بجائے تخنگ زیات اہم مریک--- اسہ گواڈخ یا بندغ تون ھمو وخت سیالی تخک کہ او اودے تینا ملکیت اٹی تخنگ کیک۔ دُنکہ اونا ملکیت نا خطرہ اونا زات نا خطرہ جوڑ مریک۔ او کنٹرول کننگ تون مہر کیک ءُ کنٹرول کننگ نا عمل ٹی زندگی ءِ کسفِنک کیک"
کُل تشدد--- کسفنِگ ءُ کنٹرول موت تون مہر نا نشانی ءِ۔ بینکنگ نظریہ تعلیم کہ او ظالم آتا فائدہ آن کاہک ام موت تون مہر کروک اسے کہ او شعور نا میکانکی ءُ جامد خیال اٹ دا شاگرد ءِ خفتوروک مفعول اٹ مَٹ کیک۔ دا وڈ دا نظریہ تعلیم بندغ آتا سوچ ءِ کنٹرول کننگ نا کوشست ءِ کیک تانکہ اوفتے ساڈی انگا ھالیت نا ھساب آن جوڑ کننگ مرے ءُ اوفتا تخلیقی قوت ءِ کسفنِک ءُ کنٹرول مرے۔
بینکنگ نظریہ تعلیم نا زی آ دا اعتراض آک دا خوش فہمی اٹ افس کہ غاصب حکمران دانا نتیجہ آن دا عمل ءِ الیر۔ دانا مسخت دادے کہ راست انگا انسان دوست آتا توجہ دا کنڈا آں ایتوئی کہ اوفک آزادی پٹِنگ کِن بینکنگ نظریہ تعلیم ءِ کاریم اٹ اتِنگ کپسہ۔ انتئکہ دانا بینکنگ نظریہ تعلیم آتون آزادی پٹِنگ تینٹ آزادی آن انکار اسے۔ انقلابی چاگرڈ دا طریقہ ءِ ظلم کروک آ چاگرڈ آن میراث اٹ ھم ارفنگ کپک۔ انقلابی چاگڑد کہ بینکنگ نظریہ تعلیم آن عمل کیک یا گمراہ مسونے یا انسان آتا زی آں بیسہ کپک۔ ارتُماک ھالیت اٹی اونا زی آن رجعت پسندی نا خطرہ آک اریر۔
بدقسمتی اٹ ھمو بندغاک کہ آزادی نا منفوک ءُ اوفک تینٹ دا ھالیت آن متاثر خنگرہ ءُ دادے پرشون کیرہ ءُ ہروخت دانا اصل اہمیت ءُ انسان ءِ غیر انسان کننگ نا قوت آن بے سما مریرہ۔ ولدا اوفک دا بیگانگیت پیدا کروک آ ازباب ءِ آزادی الِنگ کِن کاریم اٹ اتیرہ۔ ولے کس اس انسان آتے بیگانگیت نا شکار کرسہ آزاد کننگ کپک۔ راست انگا آزادی--- یعنی انسانی تکمیل نا عمل--- اسہ دُنو گڈا اس افک کہ اوڈے انسان آتہٹی تخوئی ءِ۔ آزادی اسہ Praxis ئسے:۔ یعنی انسان آتا کائنات ءِ مَٹ کننگ کِن کائنات نا زی آن غوروفکر نا عمل۔ ہراتم کہ راستی اٹ آزادی نا مسخت آتون تفوک ءُ اوفک نیئکہ شعور نا میکانکی نظریہ (کہ دافتہٹی شاگرد آتا دماغ آتے خالی ڈبہ نا امبار پُر کننگ اھوار ءِ) منفنگ کیرہ نیئکہ آزادی نا پِن اٹ زورانسری نا بینکنگ نظریہ تعلیم (پروپیگنڈہ، نعرہ بازی، ذخیرہ اندوزی) ءِ استعمال کیرہ۔
راست انگا انسان دوست ماہر تعلیم آتا فرض ءِ کہ اوفک بینکنگ نظریہ تعلیم ءِ تیوی غان رَد کین ءُ بیدئس دانا انسان آتا کائنات آتون سیالی ءِ مسلئہ جوڑ کرسہ پیش کننگ نا طریقہ کار ءِ استعمال کین۔ Problem-posing education”" خفتوروک (Passive) طریقہ کار ءِ رَد کیک تین پتین ارتُماتا نیام اٹ (استاد-شاگر) گپ رپ طریقہ ءِ استعمال کیک۔
آزادی بخش تعلیم تنقیدی ءُ زہنی صلاحیت آتون تفوک ءِ، معلومات تِنگ تون اف۔ دا اسہ چاہنداری نا حالیت ءِ کہ دافتہٹی گِڈا (Object) ءُ دانا اروک انسان آک ءُ--- اسہ کُنڈان استاد ءُ ارٹُمی کُنڈان شاگرد آک--- ءُ دا آزادی بخش تعلیم ارتُماتا نیام اٹ رابطہ نا کاریم ءِ کیک۔
مکالمہ آتون "شاگرد آتا استاد" ءُ "استاد نا شاگرد آک" نا سیالی کُٹیک ءُ اسہ پوسکنو ٹرم (Term) اس مونا بریک۔ شاگرد---استاد ءُ استاد---شاگرد۔ استاد داسہ او مفک کہ فقط خوانِفک بلکہ او تنیٹ شاگرد آتون تین پتین مکالمہ اٹ ایل ام کیک۔ اندا وڈ شاگرد آک کہ اوفک ایل ام ایترہ اوفک کُل اسہ کاریم نا اوڑدہی ئٹ زمہ وار مریرہ کہ دافتہٹی کُل نا پرشونی مریک۔ داسہ کس کسے ایل تِفک ءُ نئیکہ کس اس تینٹ ایل کیک بلکہ انسان رابطہ نا کاریم کروک آ کائنات ءُ گِڈا (Object) آتون اسٹ ایلو ءِ ایل ایترہ۔
بینکنک نظریہ تعلیم (ہر گِڈا ءِ بشخ اٹ جتا کننگ نا رجحان آتون) استاد کِن اِرا مرحلہ جوڑ کیک۔ اولی مرحلہ ٹی استاد گِڈا (Object) نا شعور ءِ حاصل کیک ءُ تینا خواننگ کوٹھی یا لیبارٹری اٹٰی تینا لیکچر ءِ تیار کیک۔ ارٹُمی مرحلہ ٹی او دا گِڈا (Object) نا باروٹ شاگرد آتے پاہک۔ شاگرد آن دا خواست/طلب کپک کہ اوفک "چاہوک جوڑ مرے" بلکہ اوفتے دا حکم اتیرہ کہ ھمو گڈا آتے یاد کبو کہ استاد پارینے۔ ءُ نئیکہ شاگرد آک زہنی صلاحیت ءِ کاریم اٹ اتیرہ انتئیکہ ھمو گڈا کہ او علم و آگہی نا زریعہ مننگ کرور او بطور Mediate وجود تِفک کہ او استاد ءُ شاگرد ارتماتا تنقیدی ءُ زہینی صلاحیت ءِ پرشون کیک ولے او استاد نا ملکیت ءِ۔ اندا وڈ کلچر ءُ علم نا رکھنگ نا پِن آن نن تون اسہ دنُو تعلیمی نظام اس ارے کہ دافتہٹی نا باوری ءُ علم ءُ نئیکہ راست انگا کلچر ملیک۔
(بینکنگ نظریہ تعلیم نا مَٹ “Problem-Based Education” تھیوری ءِ۔ دا محکوم راج آتا نظام ءِ تعلیم ءِ۔ ہراٹی مظلوم راج تینتو بیدادی ءِ اسہ ویل اسے نا وڈ اٹ مونا اتِنگک)۔
Problem-Based Educationاٹی استاد شاگرد آتا کاریم ءِ بشخ اٹ جِتا اِرا مرحلہ اٹ اُرپک۔ استاد اسہ کُنڈان مادی طور ئٹ ایل کروک Cognitive)) ءُ ارٹمی کُنڈآن بیان کروک افک ۔ دافتہٹی او ہروخت مادی طور پر ایل کروک (Cognitive) ءِ، اگہ پروجیکٹ اس تیار کننگ ءِ یا شاگرد آتون گپ رپ اٹی گَٹ ءِ۔ او ایل تروک گڈا Cognizable object ءِ تینا ملکیت سجمھپک بلکہ تینا ءُ شاگرد آتا غوروفکر نا مرکز چاہک۔ اندا وڈ Problem-Based Education ءِ استعمال کروک آ استاد شاگرد آتا غوروفکر نا نتیجہ اٹ ہروخت تینا غوروفکر ءِ وا ترتیب اتیک۔ شاگرد آک داسہ فرمانبردار خفتووروک متؤ بلکہ استاد تون مکالمہ آ تنقیدی باہمی محقق جوڑ مسُر۔
بینکنگ نظریہ تعلیم بے حس کیک ءُ تخلیقی قوت آتے تورِک، دانا برعکس Problem-Based Education دائمی اٹ حقیقت ءِ پاش کیک۔ بینکنکگ نظریہ تعلیم شعور ءِ "غرق" کروک آ حیثیت ءِ تورنگ نا کوشست ءِ کیک ءُ Problem-Based Education شعور نا "بیدار" مننگ ءُ راستی اٹ "تنقیدی مداخلت" کننگ نا کوشست ءِ کیک۔
تعلیم بطورِ آزادی نا عمل دا بیانیہ کہ کائنات بغیر انسان آن ءُ انسان آک بغیر کائنات آن انکار کیک ءُ دا چاہک انسان آتا سیالی کائنات تون ارے۔ دا سیالی ٹی شعور ءُ کائنات بہ یک وخت اریر، شعور نہ کائنات آ مُست ارے نئیکہ کائنات آ پد۔ اندُن سارتر پاہک:۔ "شعور ءُ کائنات اھوار وجود تخرہ۔ کائنات تینا خاصیت (آثار) آتا شعور تون سیالی اٹ بہ یک وخت داکان جِتا ءُ داتون اھوار ام ارے"۔
ننا کلچرل اسٹڈی سرکل ٹی کلچر نا بشریات Anthropological نظریہ نا زی آ بحث اس اسک۔ بحث اٹی اسہ بزغر کہ او بینکنگ نظریہ تعلیم نا رِد اٹ اسُل جاہل اس اسک، پارے، "داسا کنے سمجھ اٹ بریک کہ بیدئس انسان آن کائنات ءِ ہچ وجود افک"۔ وختس تعلیم دان جواب تِس: "اگہ دلیل کِن دا پانا کہ دنیا ٹی کُل انسان آک فنا مسُر ءُ فقط کائنات بچا، درخت، چُک، حیوان، دریا، سمندر، اِستار آتا اھوار دا کائنات مفکک؟"
"اوہ اخہ" بزغر زوٹ جواب تِس: "کس اس بچفک کہ پاننک کرے کہ دا کائنات اسے"۔
بزغر دا خیال ءِ پاش کننگ خوائس کہ کائنات نا شعور گوئنکک ءُ دانا لازمی دا معنی مریک کہ شعور نا کائنات--- "ای I" نا وجود مننگ کپک "بیدئس ای" Not-I نا بغیر۔ دانا برعکس "بیدئس کنے" نا دارومدار "وجود یا ای I" تون ءِ۔ او کائنات کہ او شعور ءِ وجود اٹ اتیک دا شعور "نا" دنیا جوڑ مریک۔ دُن سارتر نا مہلو آ پاروک آ خیال جائز مریک کہ "شعور ءُ کائنات اھوار وجود تخرہ"۔
تعلیم نا اِرا جتاؤ نظریہ آن بینکنگ نظریہ تعلیم ءُ Problem-Based Education نظریہ تعلیم دائمی اسٹ ایلو آن برخلاف ننا مونا بریرہ۔ بینکنگ نظریہ تعلیم (پاش وجہ نا بنیاد اٹ) حقیقت ءِ خیالی عقیدہ آتا مَٹ کننگ نا کوشست کرسہ ھمو حقیقت آتے ڈھکِنگ خواہک کہ او انسان آتا کائنات اٹی وجود تخنگ نا انداز نا پاشی کیرہ۔ Problem-Based Education نا تعلیم تینا زی آن دا زمہ واری تخک کہ خیالی عقیدہ آتے پرغگفے۔ بینکنگ نظریہ تعلیم مکالمہ نا خلاف ءِ ولے Problem-Based Education مکالمہ ءِ چاہنداری نا عمل کِن (کہ او حقیقت ءِ پاش کیک) لازمی سمجِھک ءُ شاگرد ءِ تنقیدی مفکر جوڑ کیک۔ بینکنگ نظریہ تعلیم تخلیقی اپروچ آ منع کیک ءُ شاگرد آتا شعور ءِ (وا ھم تیوی غان تباہ کننگ کپک) ایسر کننگ نا کاریم ءِ کیک۔ او دا کاریم ءِ شعور ءِ کائنات آ جِتا کننگ آتون کیک ءُ دُن انسان آتے اوفتا مکمل انسان جوڑ مننگ نا تاریخی فرض ءِ پیلو کننگ آن محروم کیک۔ Problem-Based Education نا بنیاد تخلیقی قوت آتون تفوک ءِ۔ ءُ راستی اٹ راست انگا غوروفکر ءُ عمل ءِ پرشون کرسہ مکمل انسان جوڑ مننگ نا تاریخی زمہ واری نا جواب ءِ دُن اتیک کہ انسان فقط ھمو وخت آ شرف دار انگا مخلوق مریک ہراتم اوفک تحقیق ءُ پٹ ءُ پول اٹ تینا تخلیقی مَٹی آتون گَٹ مرے۔
گونڈ داکہ (مختصراً(:۔ بینکنگ تعلیم ءُ عمل سلوک (جامد) انگا قوت آتون انسان آتا تاریخی وجود آ انکار کیک ولے Problem-Based Education نا تعلیم ءُ عمل انسان آتا تاریخی کڑد ءِ اونا بُنکی نقطہ سمجھک۔
Problem-Based Education نا تعلیم ھمو تحریک آتون تینا شناخت ءِ کیک ہرافتہٹی انسان تینا نامکمل مننگ نا احساس آ سما ءِ۔ دا تحریک نا بُنکی نقطہ تینٹ انسان آتہٹ وجود تِخک دُنکہ انسان کائنات ءُ حقیقت آن جِتا وجود تخپک اندا وجہ غان تحریک ءِ انسان---کائنات نا سیالی آ بِنا کروئی۔ دُن بُنکی نقطہ مدام انسان آتون "داڑے" ءُ "داسا" اٹ مریک۔ "داڈے" ءُ "داسا" دا ھالیت نا تشکیل ءِ کیک کہ دافتہٹی انسان آک تموک ءُ، ءُ داکان اوفک خنگرہ ءُ دافتا اوفک تنقیدی مداخلت کیرہ۔ دا ھالیت---دا انسان آتا زہنی صلاحیت نا تعین کیک---آن بِنا کننگ آتون مونا دننگ کیرہ۔ دا کاریم ایجکامی اٹ کننگ کن ضروری ءِ کہ انسان تینا ساڈی ھالیت نا چاہنداری ءِ قسمت نا لکھوک ءُ بیانیہ نا رِد اٹ الپ ءُ دادے مَٹ مفوک (غیر متبدل) پوہ مف ولے فقط محدود کروک---ءُ اندا خاطران چیلینج کروک آ ھالیت سمجھبو۔
تینا ھالیت نا گہرا شعور انسان آتا دا ھالیت ءِ تاریخی حقیقت نا رِد اٹ سمجھنگ کِن راہشونی کیک کہ دا مَٹ مننگ کیک۔ اندُن کائنات اٹی تینا مقام ءِ منفنِگ نا بجائے ھالیت ءِ مَٹ کننگ نا ھُب ءُ جستجو جاگہ الیک۔ ہر ھمو ھالیت ہرافتہٹ منہ بندغ آک ایلو آتے تحقیق ءُ جستجو نا کاریم اٹ اھوار مننگ آن توریرہ راستی اٹ اسہ تشدد نا ھالیت ءِ بیدئس دانا کہ ہرا طریقہ آک کاریم اٹ ایسنو۔ انتئیکہ انسان آتے تینا فیصلہ ءِ تینٹ کننگ آ تورنگ اوفتے گِڈا (Object) آ مَٹ کننگ نا برابر ءِ۔
تحقیق ءُ جستجو نا دا کاریم کِن ضروری ءِ دانا رُخ (انسانیت آتا تکمیل---کہ دا انسانیت نا تاریخی فرض ءِ) نا کُنڈان مرے۔ ولے مکمل انسانیت آن رسنگنگ نا جہد جِتائی یا انفرادیت پسندی اٹ مننگ کپک بلکہ فقط خؑڑکی ءُ اھواری اٹ مریک۔ اندا وجہ غان دا جہد ءِ ظالم ءُ مظلوم آتا تضاداتی سیالی اٹ مفکک۔
Problem-Based Educationنا تعلیم ظالم آتا مفادات آتے ہچ فائدہ تفک ءُ نئیکہ تننگ کیک۔ ہرا ھم جبر نا نظام مظلوم آتے دا موکل تفک کہ اوفک دا سوال کننگ نا بِنا کیر---انتئہ---؟ اسہ انقلابی چاگڑد اس دا تعلیم اٹ باقائدہ عمل کننگ کیک ولے دانا دا معنی اسُل دا افک کہ انقلابی عمل اٹی انقلابی رہشون آک جُزوختی (عارضی طورپر) بینکنگ نظریہ تعلیم ءِ استعمال کننگ کیرہ دا جواز تون کہ داسا ایمنی (مُصلحتاً) کِن دُن کننگ کیک۔ انقلابی رہشون آتے انقلابی مننگ لازمی ءِ مطلب کہ اوفتا شروع آن مکالماتی مننگ۔
__________________________
دا نبشتانک ئٹی درشان مروکا غٹ خیال و لیکہ آک نبشتہ کار نا جند ئنا ءُ۔ المی اف کہ بی ایس سی اسلام آباد اونا خیال و لیکہ نا منوک مرے۔