رَسانکدر: آئی سان ءُ کرد: بلو چ راجمانءَ چوں ایشی ءَ چہ سان زُرتگ
رَسانکدر راجمانے ءِ تہءَ مزنیں فورس بزاں کہ تاگتےزانگ بیت۔ اے تاگت مھلوک ءِ سرءَسان دَور دئیگ ءِ کار ءَ کنت۔ رَسانکدرمھلوکءِ ھیالاں چوں پہ یک کارے ءَ بدل کنت؟ اے جیڑہءِ سرءَ بازیں رسانکءِ لیکہ سازاں پٹ ءُ پول کُتگ۔ آھانی تہءَ مِک کومبز ءُ ڈونالڈ شؤ (1972) ھواراَنت کہ اِیشاں رَسانکدرءِ سانانی سرءَ ایجنڈا سیٹنگ تھیوری (Agenda Setting Theory)دیمءَآؤرتگ۔ اے پٹ ءُ پولی نبشتانک وتی ابرمی دروشمءَ کوالی ٹیٹب (Qualitative) نبشتانکے۔ سرجمیں مواد دُگیجی ڈیٹا (Secondary data) ءِ کمک ءَ زُورگ بُوتگ اَنت۔ نکان سئے جاھاں بھر کنگ بُوتگ۔ اولی رَسانکدر جیڑھانی سرءَ مھلوک ءِ ھیالاں چوں بدل کنت؟ دومی بھر اے شوہاز اِیت کہ رَسانکدر ءِ ایجنڈاھاں کئے ایر کنت؟ سیمی اے پٹ ءُ پول ءَ کنت کہ بلوچ راجمان ءِ سرءَ دری رَسانکدر ءَ چوں سان دَور داتگ ءُ دئیگ ءَ اِنت۔
گچین لبز: رَسانکدر، رَسانکدرءِ سان، ایجنڈا سیٹنگ تھیوری، بلوچ،
بلوچ راجمان
پجار
1986ءَ بگردانکہ 1989 ءَ امریکہ ءِ تہ ءَ ڈرگ بزاں کہ نشہ ءِ جیڑہ
مستریں جیڑہ جوڑکنگ بوت۔ ھمے سال ءَ امریکہ ءِ ھوراجی سرکار (Federal Government)ءَ وار آن ڈرگ کیمپئن (War on Drug
Campaign) ءِ جار رَسانکدر ءِ کارمرزی ءَ دیمءَآؤرت۔
مھلوک ءِ ذہن ءَ اے چیز ایر کنگ بوت کہ ملک ءِ مستریں جیڑہ ھمیش اِنت۔ چریشی ءَ چہ
مھلوک ءِ نشہ کنگ ءِ تہ ءَ باز کمی اَتک۔
آھاں اسلءَ اے باور کنگ بندات کُرت کہ اے مزنیں جیڑہ یے، پرچا کہ اے جیڑہ مھلوک ءِ
تہ ءَ رَسانکدرءِ ایجنڈا سیٹنگ فنکشن (Agenda Setting Function) ءِ عمل ءِ
کاربندی ءَ ایر کنگ بوت۔ ایجنڈاسیٹنگ فنکشن رَسانکدرءِ تہ ءَ ھما عمل ءَ گوشنت کہ
رَسانکدر ءِ کُمک ءَ ھالے یا کہ جیڑہ یے مھلوک ءِ دیما ساھت پہ ساھت ءِ سرءَ آرگ
بہ بیت ءُاےباور کنائینگ بہ بیت کہ جیڑہ المی اِنت ءُ ارزشت داریت۔ رَسانکدر ءِ
کار ھم ھمے وڑ ءَ جُنز اَنت، بزاں رَسانکدر اد ءَ جیڑھاں بُرز بارت ءُ راستی ءِ
دروشم ءَ دنت۔ انچو کہ دومی جھانی جنگ ءِ
نیام ءَ نازی پروپیگنڈا ءِ مستر جوسپ گیوبلز رَسانکدر ءَ جرمن پروپیگنڈ ءِ مستریں
آسراتی سرپد بیت بزاں کہ رَسانکدر ءِ کارمزی ءَ آ ردیں کاراں شر پیشداشت کنت۔ جوسپ
گیوبلز ھما مردم اِنت کہ دومی جھانی جنگ ءِ نیام ءَ اڈولف ھٹلر ءِ ھیال ءُ لیکہ ءِ
مھکم دارگ ءَ پروپیگنڈا ٹھینیت۔آ پہ اے پروپیگنڈاھاں دیم ءَ برگ ءَرَسانکدر ءَ گچین
کنت، چوشکہ تامُر سازی۔ گیوبلز ھٹلر ءِ پروپیگنڈا منسٹر گوشگ بیت۔ رَسانکدرءِ ایجنڈا
مھلوک ءِ سرءَ سان ھمے ایجنڈا سیٹنگ فنکشن ءِ عمل ءِ کُمک ءَ دَور دینت، بزاں کہ
ھالاں ساھت پہ ساھت ءِ سرءَ المی کنگ ءُ پیشدارگ ءِوزمءِ کارمرزی ءُ مھلوک
رَسانکدر ءِ نکان یا کہ مواداں باور کنگ بندات کن اَنت۔
انچوش گیوبلز درّائینیت، اگاں دْروگ ساھت پہ ساھت گُشگ بہ بیت گڑا آ راستی ءِ دروشم ءَ گیپت ءُ مھلوک آئی ءِسرءَ
باور کنگ ھم بِندات کنت۔ مھلوک سرپد بیت کہ ھرچی
رَسانکدر ءِ تہ ءَ گُشگ، پیشدارگ ءُ نویسگ بوھگ ءَ اِنت راستی ءُ مستریں جیڑہ
ھم ھمیش اَنت۔ [2]رَسانکدر کسانیں سرھالاں ٹُوھیں جیڑہ جوڑ کنت ءُ مھلوک ءِ دیماایر
کنت۔
اے رِدءَ امریکی اھوالکار لنکولن اسٹیفن (1931) وتی کتابے ءِ تہ ءَ
نبشتہ کنت کہ من وھدے نیویارکی رسانکدر ایوننگ پوسٹ (The Evening Post) ءَ کار ءَ بوتگاں، گڑا جُرمانی سرءَ بازیں جیڑہ
بوتگ اَنت کہ آ رسانکدراں شِنگ نہ بوتگ انت۔ یک روچے من اے پیسلہ کُرت کہ ھمے جیڑھاں
چہ یکے رپورٹ کن آں۔ وھدے رپورٹ شنگ بوت گڑا، رِیس نامیں اھوالکارے کہ نیویورکی رسانکدر ایوننگ سن
(The Evening Sun) ءَ
کار ءَ اَت، آ رسانکدر ءِ نیمگ ءَگُشگ بوت کہ جُرمانی سرءَھال بہ پٹیت۔ ھمے
رنگ ءَ نیویورک ءِ سرجمیں رسانکدر چہ جُرم ءِ ھالاں پُر بوت اَنت۔ مھلوک ءِ ذہن ءَ
اے چیز نشت کہ جیڑہ ھمیش اِنت، بزاں کہ ھمے جُرم ءِ جیڑہ اِنت، ایش گیش ءُ گیوار
کنگ بہ بیت۔ جوسپ ایشی ءَ کرائم ویوب (Crime wave) ءِ
نام ءَ دنت۔ [3]
اسٹیفن ءِ درور ءِ تہ ءَ ما اے زانت کنیں کہ رَسانکدرءِ نکان یا
مواداں تاگت است کہ یک جیڑہ یےءِ سرءَمھلوک ءِ ھیالاں بدل کُرت کنگ ءَ اِنت۔ کوھن
(1963) ءِ ردءَ، اسل ءَ رَسانکدر تھنا اے نہ گُشیت کہ چے جیڑگی اِنت، بلکیں یک جیڑہ
یے ءِ سرءَچوں جیڑگی اِنت، رَسانکدرءِ کار ھمیش اِنت۔ [4]بزاں رَسانکدر ءِ مواد
مھلوک ءَ انچو مجبور کن اَنت کہ ھرچی آئی تہءَ گوشگ، پیشدارگ ءُ نویسگ بوھگ ءَ
اِنت ھما وڑجیڑگ ءُ عمل کنگ بہ بیت۔ رَسانکدر ءِ ایجنڈا سیٹنگ تھیوری ھمے گُشگ بیت۔
[5]
رَسانکدر یک جیڑہ یےءِ مزن ءُ المی پیشدارگ ءَ بازیں جیڑہ سرگوز کنت
ءُ ھما جیڑہ رَسانکدر ءَ وتی واستہ کہ گچین کُتگ اَنت، ھما جیڑھاں رنگ کنت ءُ
پلگاریت۔ [6] آئنگر ءُ کنڑر (1987) ءِ رِدءَ، ھمے ھالانی یکجاہ کنگ ءُ ٹھینگ
پرائمنگ (Priming)گوشگ بیت، ایشی درور اِیش اِنت کہ دُنیا
ءِ تہ ءَ ھمک روچ ھزاراں سیاسی، راجمانی ءُ معاشی چِست ءُ ایر بنت بَلے چہ ایشاں
تھنا لھتیں رَسانکدرءِ تہ ءَ جاگہ کُرت کنت۔ کجام جیڑہ زورگ بہ بیت کجام اِنّا،
پرائمنگ ھمے جیڑھاں ٹھینیت۔ انچو کہ ھرمن ءُ نوم چومسکی ءِ پروپیگنڈا ماڈل (1988)
ھم ھمےوڑیں لیکہ یے دیم ءَ کاریت کہ رَسانکدرءِ ھال گیچن (فلٹر) کنگ بنت ءُ
رَسانکدر ءَ جاگہ دئیگ بنت۔ رَسانکدرءِ ٹھینتگیں جیڑہ مھلوک ءِ ذہن ءَ نندنت ءُ
مھلوک ھما رنگ ءَ جیڑگ ءُ عمل کنگ ھم بندات کنت۔ سوَب چی اِنت کہ مھلوک بازیں جیڑہ
باور کنت ءُ بازیں اِنا؟ اد ءَ اے چیز پرز کنگ بہ بیت ھما جیڑہ کہ منگ بوھگ ءَ
اَنت، آھانی تہ ءَ رَسانکدرءِ دست مان اِنت۔ پہ درور، پاکستانی رَسانکدرءِ تہ ءَ
سُھب ءِ مراگشے ءَ بلوچ زالبولی گُد ءُ پُچانی ساڑایگ بہ بیت، بَلے بلوچ زالبولانی
شال (کوئٹہ) پریس کلب ءِ دیمءِ زہرشانی ءِ ھچ وڑیں ھال مہ بیت گڑا رَسانکدرءِ ھال
زالبولانی تب یا کہ جیڑھاں پُچ ءُ پوشاک ءِ نیمگءَ چکرینیت نہ کہ آجو تبی ءُ
زہرشانی ءِ۔
رَسانکدرءِ مواد ءُ راستی یک ءُ دومی ءَ چہ سک دُور اَنت، 1973 ءَ جی
رے فنک ہاؤسر نامیں پولکارے اے جیڑہءِ پٹ ءُ پول ءَ بندات کنت کہ رَسانکدرءِ تہءَ
ھرچی گُشگ، پیشدارگ ءُ نویسگ بوھگ ءَ اِنت آجیڑھاں راستی ءَ گوں سیادی است یا
اِنّا؟ آ گُڈسر ءَ اے جاہ ءَ کئیت ءُ سر بیت کہ رَسانکدر ءِ نکانانی ءُ راستی ءِ نیام
ءَ ھاسیں سیادی نیست۔ آ اے درور ءَ دنت کہ ویتنام ءِ جنگ ءِ (1975-1955) ھال ھما
وھد ءَ امریکی رَسانکدرءِ تہءَ جاگہ دیگ بنت کہ جنگ گُڈسر ءَ سر بیت ءُ ھلاسی ءِ نیمگ
ءَ روَگ ءَ بیت۔ امریکی رَسانکدر انچو پیشداریت کہ جنگ ءَ نوک سر چِست کُتگ، بزاں
کہ رَسانکدرءِ ھالاں گوں بُنکی راستی ءَ ھچ وڑیں سیادی نیست اَت۔ راستی ءُ
رَسانکدرءِ ھالانی تہ ءَ تپاوت است اَت۔[7]رَسانکدر وَ اے دعویٰ ءَ کنت کہ راجمان
ءِ تہ ءَ ھرچ چِست ءُ ایرے بوھگ ءَ اِنت آئی ءِمھلوک ءِ دیما آرگ رَسانکدرءِ کار
اِنت، بَلے فنک ھاؤسر ءُ زوکر (1978) اے
گوشنت کہ رَسانکدر اسل دروشم ءَ ھالاں دیمانیاریت۔ ھمے رنگ ءَ، ساجد حُسین گوشیت،
رَسانکدر ھما ھال ءَ گِچین کنت کہ مھلوک ءَ بہ گُڑینیت، پدا ھمے ھال انچیں کسمانکی
رنگے ءَ پیشدارگ یا نویسگ بنت کہ ایشانی اَسَل دروشم پشت مہ کپیت۔
ایشیءِ دگہ درورے بلوچستان اِنت۔
پاکستانی رَسانکدر ءِ تہءَ بلوچستان ءِ سیاسی جاورانی ھچ ھال نیست، [8] یا
آھاں دگہ رنگ دیگ بوتگ کہ آ راستی ءَ گوں ھِچ سیادی نہ کن اَنت۔ دومی نیمگءَ، 2012 ءَ قطری رَسانکدر الجزیرہ "بلوچستان: پاکستان ءِ دگہ جنگے" ءِ
نام ءَ ڈاکومنٹری یے جوڑ کنت۔[9]ادءَ اے پدر بیت کہ بلوچستان ءِ سرءَ رَسانکدرءِ
راستی جتا جتا اَنت بزاں کہ بلوچستان ءِ ھوالہ ءَ رَسانکدر وتی ایجنڈاھاں ایر کنگ
ءَ اِنت نہ کہ بلوچستان ءِ ھکی ایں ءُبُنکی راستی ءَ۔
رَسانکدرءِ ایجنڈاھاں کئے ایر کنت؟
رَسانکدر گوستانک ءِ تہءَ سک باز کارمز کنگ بُوتگ، بزاں کہ 1440 ءَ
پرنٹنگ پریس ءِ دیم ءَ آھگ ءَ رند،[10] ھرکس ءَ پہ وت رَسانکدر ءِ کارمرزی لوٹ
اتگ۔ ساجد حُسین ءِ ردءَ، رَسانکدرءِ تہ ءَ لوبیئنگ سک باز اِنت۔ آ گوشیت ھما
مردم، ٹولی یا کہ گل کہ آئی ءَ سان ءُ دزرس گیشتر اِنت، وتی کسان ءَ چہ کسانیں
ھالاں رسانکدرءَ یا ٹی وی ءَ جاگہ دنت، پہ درور، الطاف حُسین اگاں بہ شاکاریت،
سرجمیں پاکستانی رَسانکدر ءَ اے ھال شِنگ بیت، چیاکہ پاکستانی رَسانکدر ءِ بُنجل
کراچی اِنت ءُ کراچی ءَ ایم کیو ایم ءِ ھاکمی اِنت۔[11] الطاف حُسین ءُ آئی ءِپارٹی
رَسانکدر ءَ وتی ایجنڈاھاں ایر کنگ ءَ اِنت۔ واسٹلے (1976) نامیں نبشتہ کارے گوشیت،
لھتیں وھد ءَ فریشر گروپ یا ھاسیں پایدگ پسندیں مُچی وتی جیڑھاں رَسانکدر ءِ تہءَ
جاگہ دات کن اَنت۔ایشیءِ درور اِیش اِنت کہ نیشنل آرگنائزیشن فار ویمن (این او ڈیلیو)
1970 ءَ زالبولانی جیڑھاں مھلوک ءِ مستریں جیڑھانی تہ ءَ ھوار کنگ ءَ سوبمند بیت۔[12]ڈینیلائن
ءُ رِیس (1984) ءِرِدءَ، باز وھد ءَ "اِلیٹ رَسانکدر" (Elite media) آ دگہ رَسانکدرءِ موادانی سرءَ سان دَور دئیگ
ءَ سوبمند بنت۔ پہ درور، نیویارک ٹائمز دگہ رَسانکدرانی واستہ ایجنڈا ایر بہ کنت، یا
پاکستانی رَسانکدر پہ وش نیوز ءَ۔ دگہ ھم بازیں سوَب است اَنت کہ آ رَسانکدرءِ
موادانی سرءَسان دَوردینت۔ شُومیکرءُ ریس (1991) ءِ ھیال ءَ ادارھی، نفری، دری
رَسانکدر ،پایدگ پسندیں مُچی، لوبیئنگ ٹولی، زھرشانی ءُ روانک، ھکومت ءُ ھیال ءُ لیکہ
ھم رَسانکدرءِ نکانان یا موادانی سرءَ سان دَور دات کن اَنت۔ اِیشانی ردءَ، ھیال
ءُ لیکہ رَسانکدرءِ سرءَدُرستاں گیش سان دَور دنت۔ [13]لوئس التُوسر (1971)
رَسانکدر ءَ استان ءِ ادارھانی مشینری گوشیت۔[14]
انتونیو گرامچی (1937-1891)وتی کتاب “Selections from the
prison notebooks” (1971) ءِ تہءَ نویست؛ راجمانءِ فریشر گروپ ءَ
را اے تاگت است کہ راجمانءِ تہءَ وتی زورانسری ءَ کُت بہ کنت بزاں کہ فریشر گروپ
چوشکہ وانگجاہ، دین ءُ رَسانکدرءِ ادارھانی کارمزی ءَ وتی پایدگاں پیلو کُرت کنت۔
راجمانءِ فریشر گروپ رَسانکدرءِ ھالاں وتی پروپیگنڈ ءِ واستہ ٹھینیت کہ آئی ءِچیزانی
سرءَگرپت یک وڑ برجم بہ بیت۔ دیمترءَ، آ گوشیت، رَسانکدر ھکومت ءِ ڈائرکٹ کنٹرول
ءَ چہ دُور اِنت، ادءَتھنا رَسانکدر فریشر گروپ ءِ واستہ قانود سازءِکارءَ کنت۔
گرامچی ایشیءَ "رَسانکدر ءِھیجےمَنی" (Media
hegemony) ءِ نام دنت۔ [15]
بلوچ راجمانءِ سرءَاستان ءِ رَسانکدرءِسان
گوستانک ءَ چوشیں درور سک باز اِنت کہ رَسانکدر مھلوک ءِ جیڑھانی بدل
کنگ ءَ کارمرز بُوتگ۔ انچوش دومی جھانی جنگءِ نیام ءَ جرمنی ءِ تامُرسازی کہ اے
تامُر جرمنی ءِ کبزہ ءَ یورپی مھلوک ءِ سرءَ روا گُشت بکن اَنت۔ امریکہ ھم ھمے چیزءِ
پروش دیگ ءَ تامُرساز فرینک کپرا ءِ تامُرانی کمک ءَ تامُرانی بُنجل "ھولی
وڈ" ءَ کارمرز کنت۔ اے تامُرانی ساچگ
ءَ امریکہ دُنیا ءَ جرمنی ءِ زلم ءَ پیشدارگ لوٹیت۔ [16]
اولسرءَ مارا زانگ لوٹیت کہ بلوچستان ءِ تہ ءَ رَسانکدر استان ءِ مشینری
یے ءُ رَسانکدر ءِ ایجنڈاھاں ھم اِستان ایر کنگ ءَ اِنت۔ ھما وتگڈیں راہ کہ دُنیا
ءِ سرءَ کارمرز بوتگ اَنت، بلوچ راجمان ءِسرءَ ھم ھمے وڑیں ایجنڈا رَسانکدر ءِ
کارمزی ءَ ایر کنگ بوھگ ءَ اَنت۔ بلوچستان یک سیاسی جیڑہ یےءِ آماچ اِنت۔ لس مھلوک
اے سیاسی جیڑہ ءِ بدل ءَدگہ جیڑھانی سرءَ جیڑگ بندات بکنت، بلوچستان ءِ تہءَ
رَسانکدر ءَ ھم انچیں کارے کُتگ۔ اگاں ھُورتی ءَ بچارئے گڑا رَسانکدرءِ ایجنڈا سک
باز اَنت کہ آہانی بلوچ راجمان ءَ سان است اَنت۔ قاضی داد محمد ریجان ءِ ردءَ،
پاکستان ءِ تہ ءَ یوٹیوبرز، مین اسٹریم اھوالکار ءُ سیاسی گلانی باسک بلوچ ءُ بلوچ
راجمان ءِسرءَ وتگڈیں گپ ءُ ایجنڈاھانی ایر کنگءَ کارمرز بوھگ ءَ اَنت۔ ایشی ءَ ابید
بلوچستان ءِ تہ ءَ بازیں مُچی، چوشکہ بلوچستان عوامی پارٹی ءِ دست ءِ چیر ءِ این جی
اوز ھم اے عملءِ بھر اَنت۔[17] دیمترءَآ گوشیت،اے مردُماں جِتا جِتائیں بیانیہ (ایجنڈا)
دیگ بوتگ کہ آھاں آ وتی پوسٹ ءُ ٹوئٹانی تہ ءَ
کارمز کن اَنت کہ بلوچ راجمان ءَ یک ایجنڈا یےءَ چہ دومی ایجنڈا ءَ بدل
کُرت بکن اَنت۔ [18]
استانءِ رَسانکدرءِ مستریں ایجنڈاھانی تہءَ یکے "کشمیر ءِ جیڑہ"
اِنت۔ اے جیڑہ ءِرسانکدراں بگر داں کہ مزن مزنیں مراگشانی تہ ءَ سرھال ایر کنگ
بوتگ۔ بلوچ راجمان ءَ ھم اے ایجنڈا ءَ چہ سان زُرتگ۔ اگاں گوشگ بہ بیت کہ بلوچ ءِ
جیڑہءِجاہ ءَ کشمیر ءِ جیڑہ ایر کنگ بوتگ گڑارد نہ بیت۔ مھلوک ءِ تہ ءَ اے چیز
نندارینگ بُوتگ کہ کشمیر ءَ انسانانی ھقانی پامالی بوھگ ءَ اِنت، مردم جنگ ءُ گشگ
بوھگ ءَ اَنت۔ کشمیر ءِ تہ ءَ انڈیا ءِ فوج ءِ مھلوک ءِ ءَ زُلم ءُ ناھَکی ءَ وتی
سر چِست کُتگ۔ بلوچ راجمان ءَ را اے جیڑہ ءَ چہ وتی جندءِ جیڑہ ءَ دور دارگ بُوتگ،
بزاں کہ بلوچ ءَ را ھما جیڑہءِ نیمگءَ آرگ بُوتگ کہ آ آئیءِ جندءِ نہ اِنت۔
رَسانکدرءِ گورءَ سرھال سک بازیں، رَسانکدر جِتا جِتائیں سرھال دیمءَ
کاریت۔ اے سرھالانی سوب ءَ بلوچ راجمان نوکدوستی(Modernity) ءِ نیمگءَ شُتگ ءُ ھمیشانی تہءَ سان ھم زُرتگ
ئِے۔ اے سرھالانی تہءَ فیمینزم، ایمنی ءُ ایدگہ ھم بازیں سرھال ھوار اَنت کہ مھلوک
ءِ ھیالاں بدل کنگ ءَ اَنت۔ اے انچیں سرھال ءُ لیکہ اَنت کہ دُنیا ءِ آزاتیں
راجمانانی تہءَ منگ ءُ کارمرز کنگ بنت۔
بلوچ راجمان ءِ اے لیکہانی سرءَسان زُورگ تاوانے۔ اے لیکہ بلوچ مھلوک ءَ راجی ءُ
راجمانی جیڑھاں چہ گِستا کنگ ءَ اَنت۔
رَسانکدر سرجم ءَ سرھالانی سرءَ کار کنت۔ دری رَسانکدر لھتیں انچیں سرھال دیم ءَ کاریت کہ بلوچ راجمان ءِ پایدگ ءَ نہ اَنت۔ آھانی درور سک باز اَنت کہ بلوچ راجمان آھانی سرءَجیڑگ ءُ عمل کنگءَ اِنت۔
سرشون
عابد سُنگُھر بلوچ یک آزاتیں پولکارے ءُ ماں انٹرنیشنل اسلامک یونیورسٹی، اسلام آباد ءَ ایم فل میڈیا ءُ کمیونیکیشن ءِ نودربرے
Reference
Barović, V. (n.d.). Radio And Television in the Nazi Media System. University of Novi Sad, Faculty of Philosophy in Novi Sad, Department of Media Studies, 176-181
Severin, W. J., Tankard, J. W., & JR. (2014). Communication Theories: Origin, Methods, and Uses in Mass Media (Fifth ed.). Pearson New International Edition
See Ibid, 219-244 – See about Joseph Goebbels. See what is Media Text? See Evening Post – a New York based Magazine. Who is McCombs. Evening Sun newspaper also based in USA and see Harold Lasswell's Propaganda Model. See Edward S. Herman’s and Noam Chomsky’s Propaganda model also. See “War on Drug campaign” by Federal Government of USA. See Vietnam War of 1955 to 1975
See, Shaw, D. L., McComb, M., Weaver, D. H., & Hamm, B. J. (n.d.). Individuals, Groups, And Agenda Melding: A Theory of Social Dissonance. International Journal of Public Opinion Research, 954-2892. Kim, S.-H., Han, M., Choi, D.-H., & Kim, J.-N. (2012). Attribute Agenda Setting, Priming and the Media’s Influence on How to Think About a Controversial Issue. International Communication Gazette, 74(1), 43–59. doi:DOI: 10.1177/1748048511426991
Hussain, S. (2021, March 02). The Role of Media. Retrieved from balochistantimes.com: https://balochistantimes.com/mediaay-kerd-sajid-hussain/
Oakes, G. (1992). Image and Reality in "Media Worlds". International Journal of Politics, Culture, and Society, 5(3), 439-463
Abdul, M. (2015, November 1). Is media deaf or the Baloch mute? Balochistantimes.com.
ALJAZEERA (Director). (2012). Balochistan: Pakistan’s other war [Motion Picture]. Retrieved from https://www.aljazeera.com/program/al-jazeera-world/2012/1/9/balochistan-pakistans-other-war.
Weaver, D., & Elliott, S. N. (2012). Who Sets the Agenda for the Media? A Study of Local Agenda-Building. 87-94 OR Severin, W. J., Tankard, J. W., & JR. (2014). Communication Theories: Origin, Methods, and Uses in Mass Media (Fifth ed.). Pearson New International Edition. 231-232,
See Ibid, 232-233, see about Vsh News
Hussain, S. (2021, March 02). The Role of Media. Retrieved from balochistantimes.com: https://balochistantimes.com/mediaay-kerd-sajid-hussain/
Severin, W. J., Tankard, J. W., & JR. (2014). Communication Theories: Origin, Methods, and Uses in Mass Media (Fifth ed.). Pearson New International Edition
See Ibid, 231-233
See Ibid, 282-283
Sparks, G. G. (2006). Media Effects Research. Thomson Wadworth
Rehan, Q. D. (n.d.). Social Media: Danger and Productive usage (Urdu). Zrumbish Publicatison
See Ibid, 21-22
اے نبشتانکءِ تہءَ درشان کُتگیں ھیالءُ لیکہ نبشتہ کارءِ وتیگ اَنت ہژدری نہ اِنت کہ بی ایس سی اسلام آباد آئیءِ ھیالءُ لیکہاں گوں منوگر بہ بیت۔