گُپتمان، نوک آباتکاری گُپتمان ءُ بلوچ
پجار
گُپتمان (discourse)چوناھا
نبشتگیں نکان یا کہ گپ (نبشتانکءُ گُشتانک)ھردوئیناں گوش اَنت ۔ بَلےگوستءِ
گُپتمان چہ انّوگءَ سرجمءَ جتا اَنت۔ چیاکہ گوست ءَ گُپتمان امپیریکل بنیاتءَ چیزانی
چارگءُ تپّاسگءِ راہ بوتگ ،بَلے وھدے کہ مشل فوکوؔکیت تہ آ وتی ھیالءُ لیکھاں گوں
گُپتمانءَ سرجمءَ جتائیں چمّےءَ چاراِیت ۔ راجدپترءَ گُپتمان گیشتر زبانزانتی(linguistics)
ءِ تہءَ چارگ بوتگ ءُ جتا جتائیں جاھاں گیشینگ بوتگ چوشکہ فارمل اپروچ ءُ امپیریکل
اپروچ ۔ فارمل اپروچ گُپتمانءَ تھنا نِبِشت(text)ءِ بنیاتءَ چار اِیت، اے راجمانی زبانزانتی(sociolinguistic)ءَ گوں بندوک اِنت کہ ایشیءِ تہءَانسانءُ
انسانءِ سیادی گوں زبان ءَ چارگءُ تپّاسگ بنت۔ اے نِبِشت زبانزانتی گوشگ بیت ءُ
امپیریکل بزانکہ ڈیٹاءِ کشّگ ءِ مانا کارمرز بوتگ۔ گْوست ءَ گُپتمان راجمان،تاکتءُ
راجمانی زانِشت ءَگوں اینکدر بندوک نہ بوتگ۔
اے نبشتانکءِ تہءَ گُپتمانءِ کسانیں پجّارے دیگ بوتگ کہ گُپتمانءِ راجدپترءَچے مانا بوتگ۔ مشل فوکوؔءِ ھیالءُ لیکہ ماں گُپتمانءِ بابتءَ چے بنتءُ آ گُپتمانءَ راجمانی چمّاں چوں چاریتءُپرچی ایشیءَ تاکت لیک ایت۔گیشتر ھما چیز کہ آئیءِ سرءَ ھیال گور کنگ بوتگ یکّے فوکوؔءِ گُپتمانءِ بابتءَ نبشتانک اَنت کہ گُپتمان چے یے ءُ چوں کارکنت ءُدومی نو آباتکاری گُپتمان اِنت کہ مئے ھمروچی ئیں زندءِ تہءَ اَست اَنت ءُ چے پیمءَ ما وتی گپّءُ نبشتانکانی تہءَ ھما نوک آباکارءِ تبءَ روگءَ اِیں۔ھمک وھدءَ ایشانی پجّارگءِ واستہ ھورت چمّیءُ سیاھگی وانشت (textual study)لوٹ اِیت کہ مردمءَ چہ نوک آباتکاری گُپتمان ءَ رکّینت کنت۔
فوکوؔءُ گُپتمان
فوکوؔءِ ترانءُ لیکہ گُپتمان ءِ باروءَ نوکءُ جِتا اِنت، چوشکہ پیسرءَ
گُپتمان گپءُ گالءُ تھنا نبشتانکی نکانءِ ماناءَ کار مرز بوتگ بَلےگُپتمان
"فوکوؔءِ واستہ الم گیشتر راجمانی،راجدپتریءُ سیاسی چستءُ ایراں چہ گوزگءِ نام اِنت کہ یک چیزے چے پیم شر ءُ ھرابءِ پیمانہ ءَ کیت۔''
فوکوؔ گُپتمانءَ چہ ربیتی نِزءَ دَر گیشین اِیت، چیاکہ ادءَ وھدے
باوست دیمءَ کیت تہ راستی چون جوڑ کنگ بیت ءُ مردمی سماءِ تہءَ ھمے راستی ءِجوڑ
کنگءِ واستہ کجام چیز اَنت کہ راستیءَ جوڑ کن اَنت؟ پمیشکہ آ گیشتر یک گُپتمانےءِ
زوت پیداک بوگءِ منّوگر نہ اِنت۔ بگندئے باز نگدانکی، راجدپتری ءُ پٹپولی چمّاں
چارگءِ پابند اِنت ۔ بنداتءَ فوکوؔءَ ھم
گُپتمان دگہ وڑےءَ چار اتگ۔ بَلے پدءَ ھمے گالبندءِ سرءَ جیڑگ بِنا کنتءُ اے آسرءَ
سربیت کہ " گُپتمان تھنا زبانءُ راجمانءِ ھمگرنچی ءِ نام نہ انت۔ بگندئے
راجمانی زانِشتءِ بندوکی ءِ نام اِنت"
۔بازیں جاگہءَ گُپتمان مردمءَ ایردست کنتءُ بازیں جاگہ ءَ پراہ ءُ شاھگانی
ءِ نیمگءَ ھم بارت ۔یکّے وَ وانوکءُگوشداروکءَ سک لُک داریت ،آئیءِ جیڑگی سنچءَ ھلاس کنت بَلے شیواریں
وانوکےءَ پہ گُپتمان راستی ءِ پدّر کنگءِ ھمراھے۔ چوشکہ گْوست ءَ لھتیں پِڑ کسانیں
مانایےءَ زورگ بوتگ اَنت، بَلے نوں آھانی
تہءَ پراہءُ شاھگانی اتکگ، وھدے کہ جوڑشت پسندی(structuralism) کیت تہ آ " انسانءِ مرگ"
(death of man) ءِ جارءَ جنت ءُ پدّر کنت کہ مردم راستی
یے نہ اِنت۔ اے لیکہءِ منّوکانی گوشگ اِنت کہ ھما چیز کہ مئے کشءُ کرءَ مارءَ
چاگرد کن اَنت آھانی ھم ھستانکی دگنیاءِ تہءَ کردے اَست اِنت، بَلے فوکوؔ گوشیت کہ
چیز ھمے رنگءَ پیداک کنگ بوتگ انت کہ ما آھانءَ راستی لیک اِیں۔ما دگنیاءَ ھما
ھسابءَ چارگءَ ایں کہ مارءَ پیشدارگ بُوتگ ۔ تھنا چارگ نہ بگندئے ایشانی جسدی ھالت(material
condition)ھم اَست اَنت ءُ مارا راجمانی سما ءِ
چارگءُ نہ چارگءِ تہءَ کمک کن اَنت ءُ زانِشت چوں
پیداک کنگ بیت ۔ پدءَ ھمے زانِشتءَ ما چوں
وتی کن اِیں ءُ ھمیشیءَ راستی لیک اِیں ءُ ھمیشی ءِ بھر جوڑ بیں۔ اگاں
بچارئے تہ گُپتمان راجمانی ادارہ پیداک کن اَنت ھماوانی گورءَ کہ ادارھی تاکت اَست
ءُ آ چیزءَ منّارینت کن اَنت ھما گُپتمان پیداک کُت کن اَنت ءُ باور ھم کنائینت کن
انت کہ راستی ھمیش اِنت-
باز رندءَ راستی ءِ
زانگءِ واستہ مئے گورءَ چیزانی
چارگءِ ھما چم نہ بیت یا چوش ھم گوشت کن اِیں کہ چیزانی اسیلیں دروشم چی اَنت ءُ چیز
گْوست ءَ چون بوتگ اَنت ءُھستیں وھد ءَ چون اَنت۔ گُپتمان گوں وھدءِ روانیءَ بدل
بوان بوتگ چوشکہ گوستءَ گُپتمانءِ دگہ مانایے بوتگ بزاں تھنا امپیریکل بنیاتءَ چیز
چارگ بوتگ اَنتءُ ربیتی گُپتمان چہ نوکیں گُپتمانءَ جتا اِنت ءُ ایشیءِ تہءَ مستریں
کِردءُ کارمشل فوکو ؔ ئیگ اَنت، فوکو ؔگُپتمانءَ دو بھرءَ کنت یکّے زانِندگی پِڑ(scholarly
discipline) اِنت۔ایشیءِ تہءَ سائنس،تِب
(medicine)، تَبزانتی (psychiatry)،راجمان زانتی(sociology) ءُ
ایندگہ چینکس کہ پِڑ اَست اَنت وانگی سرجم ءَ ھمیشی ءِ تہءَ کاینت ءُ دومی رَھگیری
ادارہ (disciplinary institutions)
اَنت بزانکہ وانگجاہ،زندان،اِسپتال یا
ھما ادارہ کہ گوں راجمانءَ بندوک اَنت ءُ ھمروچیگیں راجمانی کارانی تہءَمردم گوں
ھمے ادارھاں ھمدپ اَنت۔نوں راجمانءَ دارگ
ءِ ھاتر ءَ ھما زانِشت کہ پیداک بیت، ھمے دوئیں ادارھانی سیادی زانِشتءُ
تاکت پیداک کنت ءُراجمان دستءَ کنگ بیت۔
فوکوؔ وتی جتائیں کتابانی تہءَ
گُپتمان ءَ درشان کنت۔ آ ُ وتی
کتاب "دی آرکیولوجی آف نالج "ءِ تہءَ نبشتہ کنت کہ گُپتمان نہ بیانیہ یے
ءُ نئیکہ لیکہ یے، نہ یک زانِشتے ءُ نئیکہ زانتے بہ گندئے گُپتمان اے کُلّیں چیزانی ھواری ءَ گْوش
اَنت۔گُپتمان زانِشتءِ یک کالبےءُ ایشیءِ جوڑ کنوک گیشتر پروفیسر،ڈاکٹر،انجینئر ءُ
ھما مردم کہ پٹپول کنگءَ اَنت ءُ گوں ادارھاں بندوک اَنت آ ھم ایشیءَ برجاہ دارگءَ
اَنت۔
یک گُپتمانےءِ جوڑ کنگءَ اے درستیں چیز ھوار بنت ءُ گُپتمانے جوڑ بیت
پدءَ ھمے گُپتمانءِ سرءَ نبشتہ کنگ بیت،پٹپول کنگ بیت ءُ زانِشتءِ کالب(body
of knowledge)ءُ پٹءُ پولءِ جتائیں راہءُ راھبند
ھوار بنت گڑا یک گُپتمانے دیمءَ کیت ،اگاں بہ چارئے تہ گُپتمان گوں تاکتءِ ادارھاں
بندوک اِنت چیاکہ شھدربرجاھانی تہءَ پروفیسرءُ پولکار یک چیزےءِ سرءَ کار کن اَنت
ءُ آ چیزءَ انچیں رنگےءَ دیمءَ کار اَنت کہ وانوک ءُ گوشداروک ھما چیزءَ،گپءَ یا
نبشتانکءَ راستی لیک اَنت، گڑا یک گُپتمانے جوڑ بیت ءُ پدءَ شھدربرجاھانی تہءَ ھما
گُپتمان ءِ راہ ءُ در پچ کنگ بنت ءُ مردم ھمائیءِ وانگ ءَ بندات کن اَنت ءُ راستی یے
لیک اَنت۔ چوشکہ تو یک گُپتمانےءِ بھر بوگءَ ئے ءُ گُپتمانءَ دَر نہ ئے، اگاں کسّے
ڈاکٹرے گڑا ھمے گُپتمانءِ وانگءِ واستہءَ آئیءَ ڈگری گپتگ ءُ آئیءِ گورءَ ھما
گُپتمان ءِتاکت اَست چیاکہ ریاستءَ آئیءَ را اے تاکت داتگ۔ھما راجمانی راھبند کہ
بُنءُبُنچکءَ چہ پیداک اِنتءُ مھکم اِنت ءُ زانِشتءُ مانا ودی کنت ھما گُپتمان
گوشگ بیت۔ اے جسدی انت چیاکہ ھما چیز کہ جوڑ کنگ بنت ھما چیزاں آ مھکمیں رنگےءَ
جوڑ کن اَنت ءُ ھماھانی گپءَ کن اَنت۔اے ردءَ گُپتمان زانِشتءُ یکجاہ کنگءُ ردءُ
بند دیگءِ نام اِنت کہ راجمانیءُ دگنیائی
راستی ءَ مچُّانکی(collective) رنگءَ
دیمءَ کاریتءُ آئیءَ یک راجمانی راستی یے جوڑ کنت ۔ اے زانِشت مزنیں تکءُ پھناتےءَ
کیت، آ پھناتءَ کہ اے گُپتمان پیداک کنگ بوتگ۔ پمیشکہ گُپتمان راجمانی تْرام(social
order) ءِ تہءَ ودی بیت ءُ ھمے تاکت ھاسیں
راہءُ راھبند گیشین اِیت ءُ ھمے ردءَ راستی ءُ زانِشتءَ یک گُپتمانی تْرامےتہءَ
کاریت ءُ ھمے دابءَ گُپتمان وتءَ مان کاریت ءُ زانِشتءُ مانا ودی کنت۔ھمک راجمانءِ
تہءَ گُپتمان یکبرے گِردار(control)،گچین
،ھوربند(organize)ءُ دوبر بھر(redistribute)کنگ بیت، گوں لھتیں راھبنداں کہ چوں
اِےگُپتمانءَ شیواریں رنگےءَ آرگ بہ بیت پمیشکہ ھمک راجمانءِ تہءَ راستی ءِ جتائیں
مانایے ءُ راستی پہ ھمک راجمانءَ دگرے ءُ جتا اِنت۔
فوکو ؔوھدے تاکتءِ سرءَ نبشتہءُ تران کنت آئیءِ مراد گوست ءِ تاکت نہ اِنت۔گوست ءَ تاکت ھرابیں مانایےءَ زورگ بوتگ ءُ مدام کہ گپ تاکتءِ اتکگ گڑا مردمانی مجگءِ تہءَ تُرسناکیں چیزے جوڑ بوتگ ءُ آھاں تاکتءَ را مُدام گوں سیاسیءُ راجمانی ادارھاں بندوک کُتگ۔ یا ھما مزنیں ادارہ کہ تاکت آھانی گورءَ اَست اِنتءُ کارمرز کُت ئےکن اَنت۔ آ گوشیت "تاکت ھر جاگہءَ اَست ،پہ اے واستہ اناں کہ ھمک چیزءِدارگءِ وس ئے اَست، بگندئے اے چہ درستیں جاگھاں کیت۔ "اے ردءَ آ گوشیت گُپتمان تالان اِنت، پمیشکہ تاکت ھم تالان اِنت ءُراجمانءِ مردماں گِردار کنگءَ انت۔بلے انوں وسیلہ زبان ئیگ اِنت ءُ زبان کارمرز بوگءَ اِنت ءُ جیڑہءُ اڑاند انچیں لھمیں رنگےءَ آرگءُ پیش کنگ بنت کہ راجمانءِ تہءَ مردمانی نگدی سما مٹ بیت ءُآ چیزءَ راستی لیک اَنت، پمیشکہ گُپتمان انچیں رنگےءَ پیداک کنگ بیت کہ آ مزنیں زانِشتی تکءُ پھناتےءَ گوزیت ءُ دیماکیت ءُ ھما زانِشت گوں ادارھانی ھواریءَ راجمانی زانِشت ءِ بھر جوڑ کنگ بیت ءُ راستی مانیت۔ گُپتمان راستی پیداک ھم کنتءُ راستیءَ چیر ھم دَنت۔گونڈگری ءَ گوں گُپتمانءِ بندوکی گوں زانِشتءُ تاکتءَ اِنت ۔فوکوؔءِ گورءَ زانِشت تاکت اِنت،راستی ھمدءَ چہ جوڑ کنگ بیت ءُ اے گُپتمان اِنت۔ھما چیز کہ وانگی راھبندءِ بھر اِنت ءُ مردم ھما ھسابءَ جیڑگءَ اَنت ءُ ھما چیزءِ سرءَ عمل کنگءَ اَنت آ گُپتمانےءِ منّوک اَنت۔ انچوشکہ بُرزءَ نبشتہ انت، گُپتمان راستی اِنت ھم ءُ راستیءِ چیر دیگ اِنت ھم ۔یک جاورے چون نارمل کنگ بیت ءُ یک گُپتمانےءِ جوڑ کنگءُ آئیءِ تالان کنگءَ پہ ادارھی تاکت لوٹیت،پولکار لوٹیت دانکہ آ زانِشتءِ کالبءِ سرءَ ھما پڑءِ گالءُ گالبند ءُ باوستءَ جوڑ بہ کن اَنت ءُ پدءَ ھمے چیز ادارھانی تہءَ آرگ بہ بیت، دانکہ مھلوک ھما چیزءِ سرءَ سِتک بیاریت۔ چیاکہ ادارھانی بوگ اَلمی اِنت ءُ گُپتمان ھما راھبندءِ تہءَ عمل کنگ بیت۔دنیاءِ تہءَ مرچی ما کجام ھم پڑءَ وانگءَ ایں ءُ ھمائی بھر اِیں اے سرجم ءَ گُپتمان اَنت ءُ ایش مزنیں پٹپولےءَ پد دیما اتکگ اَنتءُ تالان بوتگ اَنت۔
نوک آباتی گُپتمان
فوکوؔءِ گُپتمانءِ لیکہءِ سرءَ مستریں کار ایڈورڈ سعید ؔئیگ اِنت۔آ
پد نوک آباتی گُپتمانءِ لیکہءَدیماکار یت۔راستیں
دروشمءَ بچارئے تہ یک مزنیں تاکتے وتی راستیءَ منّارینگ بزانکہ وتی گُپتمانءَ
منّارینگءَ پہ پٹپول کنت ۔ءُ آتئی گُپتمانءَ گار کنگ لوٹ اِیت ءُ مدام وتی ھمک
پڑءِ زانِشتءِ تہءَ تراایردستءُبدیں دروشمےءَپیشداریت۔تئی باروءَ آ راستیءَ دروگیں
رنگےءَ جوڑ کنت، ھمیشیءَ وتی وانگی راھبندءِ تہءَ کاریت۔سعیدؔءِ ردءَ روکپت
(west) بزانکہ اوکسیڈینٹ (occident)ءُ اوریئنٹ (Orient)بزانکہ مڈل ایسٹ، ایشیاءءُ اپریکہءِ باروءَ راستی
جوڑ کُتگ۔ انچوشکہ من پیسرءَ نبشتہ کُتگ اَت یک گُپتمانے یکّیں دمانءَ جوڑ کنگ نہ
بیت۔ ھمے ھسابءَ نوک آباتکارتاکت ، نیزگارءُ نوک آباتیءِ باروءَ راستی جوڑ کنتءُ
دنیاءَ باور کنائینیت کہ راستی ایش اِنت ۔ ھمے گُپتمان کہ مردمانی گورءَ سر بوتگ
ھمے اوریئنٹلزم (شَگربزانتی)اِنت ۔چیا کہ روکپتءَ پیسرءَ ادءَ سپرنامگ،نبشتہ کار،جیوگرافر
ءُ ھمک پڑءِ مردم دیم داتگ ءُ ادءِجہہ منندانی ربیدگ،تَب،زبان ءُ سنچ ونتگ اَنت، ایشیءَ
پد آھاں ھمیشیءِ سرءَ نبشتہ کُتگ ءُ نوک آباتی ءِ باروءَ دنیاءِ دیمءَ راستی آؤرتگ
۔
اِدءَ جُست اِے پیداک بیت کہ اے راستی چوں آرگ بوتگ انت؟ چیاکہ آھانی
گورءَ ادارہ اَست اَنت، ھمے ادارھانی تہءَ ھما پڑ ءِ مردم اَست اَنت کہ وانین اَنت
ءُ آھاں ھَندیءُ جہہ منندانی باروءَ ھاسیں لیکہ ودی کُتگ ءُ وانگی راھبندءِ بھر
جوڑ کُتگ انت۔ھمے پیمءَ روکپت وتءَ شر ءُ ایندگہ راج،استانءُ مردمءُ راجماناں کمتر
یا ھراب پیش داریت، آئیءِ رسانکءَ بگِرداں
سرجمیں چیزاں درا درست ھمائیءِ ستاءَ گپ
ءُ نبشتہ کن اَنت۔اگاں راستیءَ بچارئے تہ دنیاءِراجدپترءِ تہءَ مستریں لُٹّءُ
پُل،کُشتءُ کوش ءُ زورگیریں تاکت ھم روکپت اِنت بَلے انگت دگنیاءِ تاکت ھمائی ءِدستءَ اِنت ءُ آ چیزاں ھما دابءَ پیش داریت
ءُ داشت کنت چیاکہ آ تاکت اِنت ءُ گُپتمان تھنا گوں تاکتءَ پیداک کنگ بیت ۔وھدے
اپریکہ ایردست کنگ بیت تہ سیاہءَ ھم ھرابیں رنگے پیش داراَنت ءُ ھمک ھرابیں چیزءَ
گوں سیاہءَ شبین دینت، چوشکہ بلیک میل،بلیک منی ءُ دگہ بازیں لبز ھوار اَنت ءُ
کسّہ،گدار ءُ نبشتانکانی تہءَ اپریکہ ءِ مردمانی سرءَ مسکرا ءُ توازہ کن اَنت۔
آھاں یورپ انچوش پیش داشتگ کہ اودءَ ھچ ھرابی نیست ءُ اودءَ ایمنی اِنت ،نیزگاری
نہ گواہ اِیت بَلے راستی چوش نہ اِنت اے جاور اودءَ ھم اَست اَنت۔ لبزانکءَ
بگرداں ھمک پڑءَ درا دنیاءِ ھمک چیزءِ
تہءَ نوک آباتی گُپتمان ھوار اِنت ءُ وانوک وھدے اے چیزاں وانیت تہ آئیءِ
تَب،سنچءُ زانت ھما دابءَ جوڑ بنت ءُ آ ایشیءَ چہ در آھگ نہ لوٹیت ءُ ایشیءَ در آئیءَ
درستیں چیز ھراب گندگءَ کاینت۔
دگنیاءِ تہءَ ھمک پڑ بہ بیت اودءَ نوک آباتی لبزانک ھوار اِنت آیا آ
کجام ھم پِڑ بہ بیت۔ءُ پدءَ وانوکءُ گوشداروک کہ اے پڑاں وانگءَ اَنت آھانی سماءِ
تہءَ ھما ھسابءَ راستی جوڑ بوگءَ اِنت ءُ
آھانءَ چہ ایشیءَ در درستیں چیز دروگ گندگءَ کاینت۔برے برے ھما نبشتہ کار کہ نوک
آباتی گُپتمانءِ ھلاپءَ نبشتہ کنگءَ اَنت آ ھم ایشیءَ چہ در اتک نہ کن اَنت ،چیا
کہ آئیءَ وتی گُپتمان انچیں مھریںءُ شیواریں رنگےءَ دیما آؤرتگ کہ نبشتہ کنوکءُ گپ
کنوک سرپد ھم نہ بیت کہ آ گُپتمانےءِ منّوگر اِنت ءُ زانگءَ نہ اِنت۔بازیں جاگہءَ
اے سمائی رنگءَ بیت ،چیاکہ تاکت استانءِ ھما مشینری اِنت کہ آئیءَ پہ زانت بازیں چیز
دیمءَ آرگ ءُ ٹھینگ ءَ اِنت کہ آبیانیہ
جوڑ بہ بنت ءُ مردم ھما ھسابءَ بہ جیڑ اَنت۔ءُ ھما مین اسٹریم (mainstream)رسانکءُ ایندگہ چیزاں راستی بہ لیک اَنت۔آ سمائی
رنگءَ اے کاراں کنگءَ اَنت۔بازیں جاگہءَ ھما کہ ایشیءِ ھلاسیءِ نیمگءَ روگءَ اَنت
آ بے سمائی رنگءَ نوک آباتی گُپتمانءِ منوگر اَنت۔
اگاں ما وتی گورءَ اے چیزاں گوں ھورتیءَ بچاراِیں، تہ مئے نبشتہ کارءُ ھمک پڑءِ مردم نوک آباتی گُپتمانءِ آماچ اَنت۔ نوک آباتکارءِ جوڑ کُتگیں زانِشت آھانءَ راستی گندگءَ کیت ءُ اتکگ پدءَ آھاں ھمائیءِ تَبءِ وڑءَ نبشتہ ھم کُتگ ءُوتی گُپتمان ءَ چہ بیھال بوتگ اَنت۔ اگاں ما وتی راجدپترءَ بچار ایں گڑا بلوچ نبشتہ کاراں مُدام انگریزءُ دری نبشتہ کارانی چمّءَ بلوچءِ راجی راجدپتر نبشتہ کُتگ ءُ آئیءِ سانءَ چہ در نہ اتکگ اَنت۔ اے ردءَ اگاں مابلوچ نبشتہ کاراں بچار ایں ءُ آوانی نبشتتگیں نکاناں بہ وانیں تہ پدریں رنگےءَ گندگءَ کئیت کہ وھدے آواں دری ءُ انگریزی نبشتہ کارانی پیم ءَ نبیستگ گُڑا پدءَ آ ھمے گُپتمانءِ منوّگر بُوتگ اَنت ۔ چوشکہ گُل خان نصیر،سردارخان گیشگوری ءُ ھمے ردءِ نبشتہ کاراں بچار ایں گڑا گندگءَ کئیت کہ ایشاں ھما گُپتمان پیسرءَ کہ بُوتگ ایشاں ھما دیمءَ بُرتگ ءُ ھچ وڑءَ گوں شیواریں چمّاں آ نکان تپاّسگءِ جہد نہ کُتگ، ھمدءَ دری گُپتمان ءِمئے سرءَ سان گندگءَ کاینت۔آ بلوچءِ گُپتمانءَ چہ شموشکار بوتگ اَنت کہ مارا وتی ھم یک راجی گُپتمانے ھست کہ وتی جندءِ راجمانءُ راستیں جاورانی چمّءَ چارگی اِنت۔ ھمے دابءَ اگاں لبزانکءَ بچارئے تہ مئے مردم انگت بازیں جاگہءَ لبزانکی گڑءُ منجانی آماچ اَنت۔ اگاں ایشیءِ درورءَ بُزورئے تہ گوگیءِ کتاب " ڈی کالونائزنگ دی مائنڈ "، ءُ "رائٹرز اِن پولیٹکس" ءِ تہ ءَ گوگی تچکءَ گوشیت کہ ھَندی جاور ،مئے راجمانی دود ءُ ربیدگءُ مئے ھما وتی زمینءِ گوما مھرءُ دوستی اِنت آ چون ھلاس کنگ بوتگ ءُ دری نبشتہ کاراں مئے راستی چون جوڑ کُتگ۔ مارا وتی گدارءُ نبشتانکانی تہءَ جناورءُ دلوت پیش داشتگ ۔ چنوا اچیبےءِ گدار " تھگنز فال افارٹ " کہ جازف کانریڈءِ گدار"ہارٹ آف ڈارکنِس"ءِ پسّوءَ نبشتہ کُتگ ئِے،ساپیں درورے۔ چیاکہ یک ھندی مردمے پدءَنبشتہ کارےءِ بستارءَ ھما زمینءِ اسلیں جاوراں زندگی کنگءَ اِنت ءُ چہ ھما سرگوستاں گوزگءَ اِنت، زاھراِنت لبزانک ھم راجمانءَ گوں بندوک اِنت ءُ یک مردمےکہ راجمانےءِ بھراِنت آ ھما راجمانءِ راستیءَ نبشتہ کنت کہ آ سرجمیں مھلوکءِ سرءَ گوزگءَ اَنت۔ لبزانک مُدام ھما زمینءُ ھمودءِ مردمانی لبزانک بیت کہ آ چہ ھما جاوراں گوزگءَ اَنت ءُ زُلمءُ زوراکیءَ گوں وتی چمّاں گندگءَ اَنت ۔ مئے گورءَ لبزانکار مُدام دری گُپتمانءُ دری لیکھاں چہ سان زورگءَ اَنت ءُ وتی راجی گُپتمانءَ چہ شموشکار اَنت ۔ اگاں سیاستءِ تہءَ بہ چارئے ھم راجمان،مھلوک ءُ زمینی جاوراں چہ شموشکار انچیں لیکہ ءُ ھیال آرگ بوگءَ اَنت کہ مئے گوما ھمدپ نہ بنت۔مئے زندگی،مئے گپ،دیوان،نبشتانک،ھیالءُ لیکہ اے درستانی تہءَ زوراکءِ گُپتمان ھوار اِنت۔ھورتیءَ گوں اگاں چارگ بہ بیت گڑا ما وتا چہ دریءُ زوراکءِ گُپتمانءَ کّش اِت کن اِیں، پہ ایشیءَ مارا مئے راستیءُ گُپتمان دیمءَ برگی انت، نبشتہ کنگی اِنت ءُ ادارہ جوڑ کنگی اِنت دانکہ مئے وتی گُپتمان دیمابروت ۔ءُ ایشیءِ واستہ وانگءُ زانگ،پٹپول ءُ ادارہ لوٹ ایت ءُ مارا اِے گُپتمان پروش دیگی اَنت ۔ ھمے دابءَ اگاں ما بلوچ ءِ جُتا جُتائیں پڑانی تہءَ ھورتی ءَ گوں بہ چار ایں تہ مارءَ ھمے زوراکیں گُپتمانءِ سان گندگءَ کاینت ۔
بلوچ ءُ تاکتوریں گُپتمانءِ
ولگوج
بلوچانی گورءَ اگاں مانگیشتگیں پِڑے ھَست گڑا آ بن دپتر، راجدپتر ءُ بلوچ ءِ جندءِ بابتءَ نبشتگیں نِکان اَنت کہ بلوچ چہ کُجا اتکگ ءُ اے زمین بلوچءِ جند ئیگ اِنت یا بلوچ ادءَ اتکگءُ جھمنْند بُوتگ یا پہ ادارکی ءُ نوں ھمدءَ نِشتگ ءُ زندگی کنگءَ اِنت؟ اے ردءَ فوکوؔ ھمینکدر تچک بُوتگ کہ آئیءِ ردءَ یک تاکتوریں گُپتمانےءِ تہءَ ھمینچو وَس ھَست کہ آ مَردُماں ھما پیم جیڑگ،باور کنگ ءُ ستک دارگءَ لاچار کنت پدءَ مردم ھما گپتمانءَ دیماھم بَر اَنت۔یک گُپتمانے وتی تہءَ چینکس مہکم ءُ توانا بیت آ دیم ءِ وانوکءَ ھما وڑءَ جیڑگ پرمائیت آئیءِ سساّءِ تہءِ سرجمیں راستی ھما گُپتمانءِوڑءَ جوڑ بنت ۔ ءُ ھمے گُپتمان کہ ایشی ءِ مردمے شکار اِنت یا چاگرد ءِ تہءَ ھما گُپتمان کہ تالان اِنت ءُ مردم آئیءِ سرءَ ستک دارگءَ اَنت آ کدی اوں نہ جیڑ اَنت ءُ گُپتمان پریسی (ڈسکورس اینالِسس)ءِ نیمگءَ نہ روَنت۔ یک گپُتمانے ھما وھدءَ پھمگءُ زانگ نہ بیت دانکہ ھما گُپتمانءِ پُژدرچارگ ءُ تپّاسگ مہ بیت ءُ ھاسیں گُپتمان ءِ پُژدرءَ راستی دیما کئیت ءُ پدّر بیت ۔آیا اے گپتمان کہ جوڑ کنگ بُوتگ مئے باروءَایشیءِ تہءَ راستی چیکندر ھَست ھما فریم ورکءِ تہءَ ھاسیں جاورانی دیمپانی ءَ گوں آئیءِ چارگ ءُ ھوُرتیں چماّنی کارمرزگ دانکہ زانگ بہ دَنت دگہ اوں راستی یے ھَست ءُ زندگ مانیت ھما راستی پرّیسگی اِنت دانکہ گْوَستگیں گُپتمان گوں نوکیں گُپتمانےءَ پروش دئیگ بہ بیت ۔ ھمے ردءَ دری دپتر زانت کہ ادءَ اتکگ اَنت آوانی وتی یک لینزے بُوتگ ءُ ھما لینز ءِ بنیاتءَ آواں ھما پیم ءَ کہ جوڑ کنگءُ پیشدارگ ءِ جُہد اِش کُتگ پیش اِش داشتگ ءُ ھما گُپتمانءِ تہءَ ھمینکسیں تاکتے ھَست کہ روچءمروچیءَ داں بلوچءِ جِندءِ نبشتہ کار ،زانتکار ،دپتر زانت ءُ گْوَستانک نویس ھما گُپتمانءِ منوگر ءُ دیمابروک اَنت ءُ ستک دار اَنت راستی ھمیش اِنت کہ دری نبشتہ کاراں نبشتہ کُتگ۔آواں ھمے چیز انچو مُھمکیءَ گوں پیشداشتگ کہ چراواں رَند پدءَ بلوچءِ نبشتہ کاراں ھما چیز دیما بُرتگ۔دری نبشتہ کاراں انچو کہ جیڑ اِتگ ما ھما پیمءَ بہ جیڑ ایں ھما دابءَ ما جیڑگءَ ایں ءُ ما وتاھماوانی چمّءَ چارگءَ ایں ءُ پرّیسگءِ جُہدءَ کنگءَ ایں ءُ پھر بَستگ بندیں ءُ بندگءَ ایں کہ ما پلان ءِ اولاد اَیں ۔ اے زلوری نہ اِنت کہ بلوچ وتادگہ یکّےءِ چماّں مزن بہ لیکیت، بلوچ کئے اِنت آ وتی جاوراں وت پھم اِت ءُ زانت کنت ءُ وتی گْوَستانکءَ وت نبشتہ کُت کنت ءُ دری لیکہ ءُ نبشتہ کارانی چمّءَ بلوچءِ چارگءُ تپّاسگ ناروائیں کارے ءُ زانشتی ردءَ یک زُلمے کہ بلوچءِ جندءِ نبشتہ کارئِے کنگءَ اَنت ۔ آیا درءَ چہ اتکگ ایں زُورگیر مئے بابتءَ نبشتہ کنت آ شر نبشتہ کنت ءُ برتانیہ ءِ ادءَ آیگ ءُ سرجمیں چیزانی پروشگ ءُ پدءَ دوبر چیزانی وتی پیمءَ جوڑ کنگ دانکہ دُگنیا بلوچ ءِ بابتءَ اے جوڑ کُتگیں راستی یے منوگر بہ بیت ۔ ھمے مُھمکیں گُپتمان کہ بلوچ راجدپتر دیم بَری کُرتگ ءُ دیما بُرتگ ایشیءِھلاسی ءُ بلوچ ءَ بلوچ ءِ جندءِ جاورءُ چمّءَ چارگ فاروق بلوچؔ ءَ کُتگ ۔ فاروقؔ ءِ رِدءَ " برتانیہ ءِدپتر زانتاں ھما لیکہ ءُ مفروضہ کہ بلوچ ءِ بابتءَ کُتگ ایشیءِ تہءَ آوانی زُورگیری ھم مان بُوتگ " ۔چرے راستیءَ کس چمّاں بند کُت نہ کنت برتانیہءِ زانتکار مئے بابتءَ نبشتہ کنگءَ اِنت چیا نبشتہ کنگءَ اِنت آئیءِ دردِسر چی اِنت کہ آ بلوچءِ بابتءَ نبشتہ بہ کنت ادءَ راستی پدّر بیت آئیءَ وتی زورگیری گیش مہکم ءُ توانا کُتگ ءُ سرجمیں چیزانی پروشگ زورگیری ءِ مستریں کار اِنت۔دیمترءَ فاروق بلوچؔ نبشتہ کنت کہ رندءَ بلوچاں ھم ھماوانی رندگیری کُرتگ ۔ " وھدے بلوچ دپتر زانتاں نبشتہ کنگ بندات کُرتگ گڑا آ اوں بازیں گڑءُ منج ءِ آماچ بُوتگ اَنت ءُ برتانیہءِ رندگیری اِش کُرتگ" ۔اے گپءِ تہءَ ہچ شک نیست کہ برتانیہ ءَ مئے گْوَستانک ءُ دپتر سرجمءَ پولنگ ءُ لیگار کُتگ۔ آ گوں راستیءَ اے گپّءَ دیما ایر کنت کہ پروفیسر ایچ ۔جارج راؤلنسن اولی دپتر زانت بُوتگ کہ بلوچءَ را "سامی النسل کلدانی کھول" کہ عراقءِ کوہنیں ھاکم بُوتگ اَنت ھماوانی پُشت پد پیش داشتگ۔گڑا ھمے گپ رندءَ برتانیہ دپتر زانتاں زُرتگ ءُ دیمءَ بُرتگ وڑ وڑءَ پیش داشتگ ۔ پدءَ بلوچءَاوں ھمے چیز دیمءَ بُرتگ ایشانی تہءَ گُل خان نصیر ، میر احمدیار خان ، میر خدابخش بجارانی ، سردار خان بلوچ ، ڈاکٹر میر عالم خان راقب ، مولانا نور احمد فریدی ،ایشاں "سامی النسل" والا بْیانیہ زرتگ ءُ ھما مھمکیں گُپتمانءِ منوگر بُوتگ اَنت ۔کسےءَ بلوچ تُرک گوشتگ ءُ نبشتہ کُتگ گڑا بلوچاں ھمائیءِ گپءِ سرءَ ستک آرگ بندات کُتگ انچوکہ آغا نصیر خان احمدزئی کمبرانی ھمے لیکہءِ منوگرے ۔ بازیں برتانیہ ءِ دپتر زانت بلوچءَ آرین پیشدارگ لوٹنت ۔ بلوچانی تہءَ شاہ محمد مری ءُ سید ظھور شاہ ہاشمی ھمے لیکہ ءِ منوگر اَنت ۔ گونڈگریءَ گوں اگاں تپاسگ بہ بیت تہ پدّریں ءُ ارزشت داریں چیز ایش انت کہ دری نبشتہ کار ءُ زورگیرءِ جوڑ کُتگیں نبشتہ کاراں ءُ دپتر زانتاں بلوچ چے چمءَ چار اِتگ ءُ چیز ھور ءُ تور کُرتگ ءُ پیش کُتگ اَنت ءُ گوں مھمکیءَ ھمے چیز آؤرتگ ءُ انچیں رنگےءَ جاہ دیگ بُوتگ کہ رندءَ بلوچءِ دپتر زانتاں ھما لیکہ دیمابُرتگ ءُ ھمائیءِ سرءَ سِتک داشتگ ۔ تچکیں رنگےءَ اگاں گوں شیواریءَ بہ چارئے تہ اے گُپتمان کہ بلوچانی بابتءَ سک ھورت ءُ مہکم اَنت ءُ جاگہ اِش گپتگ گڑا ادءَ گپ تچک اِنت کہ اے گُپتمان یکّیں روچءَ دیما نہ اتکگ اَنت ھمک گپتمان وتی پیرامیٹرانی تہءَ ءُ وتی جسدی جاورانی تہءَ آیاں بُوتگ اَنت ءُ ہزاراں سالاں چہ پیداک اَنت کہ روچءمروچیءَ داں اے مُہکم اَنت ءُ ایشانی ھلاسی ءُ کاؤنٹر کنگ مئے انٹلیجینشیا ءِ مستریں زمہ واری اِنت کہ ایشانی سرءَ ایراد بہ گر انت ءُ ایشاں چہ بُنءُبُنچکءَ ولگوج بہ کن اَنت ۔
بلوچ چاگردءُ گُپتمان
راستی ھمک وھدءَ مردمانی واستہ تہل بیت یا راستی یے زانگ انچیں کارے ایش بازیں چیزانی یل کنگءُ بازیں چیزانی زُورگءَ پرمائیت ۔ بہ گُپتء فینن " ھمک وھدءَ مردمانی تہءَ راستی راجی جیڑہ ءِ میراس اِنت" ۔اے گپ پرّیسگ بہ بیت داں بلوچ ءِ چاگردءِ تہءَ ھم بلوچ ءِ راستی ھَست اَنت ءُ بلوچءِ جند بلوچ وتی جاورانی تہءَ پھمگ بہ بیت ۔ چیاکہ بلوچ وت یک دودمان،زمین،تب،ربیت،رسم ءُ رواج ،ربیدگ،گیدی شائری ءُ راجی تبءُ سسائے ئے واھُند اِنت ۔ اگاں بلوچءَ دگہ چمّےءَ وان ئے گڑا چیز پولنگ بنت چوشکہ مروچی باندءَانچیں زالبول دیمءَ آیان اَنت کہ دری زالبولی لیکہ اِش وتی کُتگ ءُ ھمائیءِ بنیاتءَ گپ کن اَنت وتی راستی ءُ زمینی راستی ءَ ھمودءِ چمّءَ چار اَنت ۔ یورپءِ زالبولءِ جیڑہ چہ بلوچءِ ایردستیں زالبولءُ زمینءِ جیڑہءَ چہ سرجمءَ جِتا اَنت ۔ الّم ایش اِنت کہ بلوچ وتی گْوَستانک ءُ چاگردی راستیاں ھمے نگاہءَ گوں پھمگءِ جُہدءَ بہ کن اَنت ۔ اے دری گُپتمان ءِ پروشگءِ واستہ ھمے گُپتمان کہ ھماوانءَ اے وڑ جیڑگءَ لاچار ئِے کُتگ وتی ھمدءِ زمین گواچن ءِ بنیاتءَ بہ پھم اَنت ءُ وتاوتی جندءِ جاورانی تہءَ بہ چار اَنت ۔
لس لبز ءُ گُپتمان ءُ بلوچ
دری گُپتمان ھما کساس ءَ مُہکم اَنت کہ ما کسان کسانیں "لبزاں" گوں زانت نہ کن ایں کہ اے لبز چہ کُجا اتکگ ءُ ما پہ زانت یا نا زانتی ھما گُپتمان ءِ بھر جوڑ بہ ایں ۔ انچوکہ اگاں ما " Ethno nationalism " ءِلبزءَ بہ چار ایں،ھما مردم کہ ایشیءَ رسانکدرءِ تہءَ کارمرز کنگءَ اَنت کدی اے لبزءِ پژدرءَ شُتگ اَنت کہ اے لبزءَ مئے سماءِ تہءَ چوں جاگہ کُتگ ءُ ما چوں ایشیءِ بھر جوڑ بُوتگ ایں۔آیا بلوچ زاناں یک Ethnic group یے ءَ چہ اتکگ یا بلوچ تھنا یک نسلے ۔ راجانی اے وڑ بْیان کنگ ءُ پدءَ مئے وتی ھمے چیزانی تہءَ ھوار بُوگ مارءَ ھمے گُپتمان ءِ بھر جوڑ کنت۔ راج ہزاراں سالانی پیداوار اِنتءُ ھمک راج وتی جاورانی تہءَ ودی بِیت ۔ اے پیمیں دگہ اوں گُپتمان ھَست اَنت کہ ما لس رنگءَ کارمرز اِش کن ایں، پہ زانت یا نا بزانتی ما اے چیزءِ بھر ایں۔
لبزانک ءُ دری گُپتمان
لبزانک راجےءِ مستریں مڈّیاں
چہ یکے زانگ بیت ۔اگاں ما ھورتیءَ گوں
بچار ایں تہ مئے مردم دری لبزانک ءُ لبزانکی لیکہءُ نگدءَ چینکدر سانمند اَنت ۔اے
ردءَ ما عربی لبزانکءَ چہ درورے زُور ایں انچوکہ بُرز ءَ اپریکہءِ لبزانکءَ چہ
درورے زُرتگ اَت۔ نوزدہ سدءُ شستءِ دھکءِ نیامءَ عربی لبزانک ھما کساس ریڈیکل
بُوتگ کہ یورپءِ جوڑ کُتگیں گُپتمانانی دیما اوشتاتگ ءُ آوانی ھلاسی ءِ نیمگءَ
شُتگ ۔ اے جُنز " نعدہ" (دوبر سر ءِ مان کشّگ ) گوشگ بیت۔ اے سرجمءَ عرب
چاگردءَ چہ یورپءُدینءِ گڑءُ منجاں چہ
آزات کنگءِ کارءَ کن اَنت ءُ ھمے لوٹ اَنت کہ عرب وتءَ چرے چنگلاں آزات بہ کن اَنت
ءُ "وت ءُ دِگر" دوئیں پجاّرگ بہ بنت۔عرب راجدوستی ءُ نعدہءِ آیگ یورپءِ
آؤرتگیں ءُ ساچ اتگیں ھیالءُ لیکہانی دیمااوشتگءِ مستریں درور ے۔ دگنیاءِ لبزانکءِ
تہءَ اے وڑیں درور باز اَنت کہ باز برءَ بنُکی نبشتہ کار نہ زاننت کہ ما اے چیزءَ
آرگءَ ایں ایشیءِ روتگ داں کُجا سکّ اَنت۔ بلوچ ءِ لبزانکءِ تہءَ انچیں جیڑہ ھَست
کہ بازیں نبشتہ کاراں چہ درءَ سان زُرتگ ءُآ مزنیں ساچشتکاراں۔ چریشیءَ کس چمّاں
بَست نہ کنت بلئے مئے لبزانک گوں مئے لبزانکی راستی ءُ ساچشتءِ چمّءَ وانگ بہ بیت
ما ھما دابءُ ھسابءَ آ چیزاں ادءَ وتی لبزانکءِ تہءَ مہ چار ایں چیاکہ آوانی
لبزانکءَ ھمینکسیں سپرے جَتگ ءُ چرے پنداں گوْستگ ءُ نوں جاھےءَ سر اِنت ۔ ادءَ چہ
ڈنیّ لبزانکءِ مہکمی گندگءَ کئیت ۔ مئے گورءَ لیکہ نیست اَنت ءُ لیکہ مئے جوڑ کُتگیں
نہ اَنت ما سرجمءَ ھما چیزاں مہ زُوریں ءُ وتءَ کیلوءُ کالبءِ تہءَ میار ایں۔
آسر
فوکوءِ گُپتمان ءِ ردءَ راستی،راستیءِ جوڑشت ، راستی چوں ءُ چہ کُجا شنگ ءُ تالان بوان بیت کئیت ، تاکت ءُ تاکتءِ داروکیں ادارگ ءُ اِلم کہ گپُتمان اِنت ءُ گُپتمان کہ تاکت انت ءُ ما چوں ھمے گُپتمانءِ بھر جوڑ بوگءَ ایں ءُ ما وتی گُپتمانءَ چہ چوں بیھال بوگءَ ایں کہ مئے راستی اِنت۔ ءُ وانگءِ وھدءَ ،جیڑگءُ گپءِ وھدءَ ما شیواریءَ گوں بہ زانیں کہ ما چے گوشگءَ ایں ءُ کجام گُپتمانءَ گوں بندوک ءُگپ کنگءَ ایں۔ھورت ھورتی ءَ ما دری گُپتمان ءَ چہ سان زرتگ ءُ مئے جیڑگ ءُ سسا اوں ھما دابءَ جوڑ اَنت۔ دانکہ ما آواں پروشت مہ کن ایں وتی گُپتمانءَ جوڑ کُت نہ کن ایں۔
Reference
Alec McHoul and Wendy Grace, A Primer Foucault: Discourse,
Power and the Subject (London: Routledge, 2015), 26.
Ibid., 39.
Ibid., 34.
Ibid., 37.
Michael Foucault,
The Archaeology of knowledge (New York: Pantheon Books, 2009), 21.
Said, Edward,
Orientalism (London: Penguin Books, 2003), 5.
Ibid.
فاروق بلوچ، بلوچ و بلوچستان: قدم مؤرخین کی نظر میں (کراچی: علم و
ادب، (2023) ، 14۔
ھمیش، 15-14۔
Frantz Fanon, The
Wretched of the Earth (London: Penguin Books, 1963) ,39.
Tayeb Salih, Season
of Migration to the North (Heinemann, 1966), 6.
اے نبشتانکءِ تہءَ درشان کُتگیں ھیالءُ لیکہ نبشتہ کارءِ وتیگ اَنت ہژدری نہ اِنت کہ بی ایس سی اسلام آباد آئیءِ ھیالءُ لیکہاں گوں منوگر بہ بیت۔