Decolonizing Methodologies
ردِ قوضہ گیری وڑآک، پٹ و پول و خلقی آ مخلوق
پٹ و پول خلقی آ لوزمڈی ٹی شاید کل آن گندہ انگا لوز اے۔
دا سطر Linda Tuhiwai Smith کتاب نا درستی راستی آن ہلوک اے۔ ہرا خلقی آ مخلوق و قوضہ نا گواچی مروک او ماوری زالبول ئسینا حیثیت اٹ پٹ و پول نا مغربی نمونہ آتیا اسے پانادیو تنقید اسے نا موہاڑ اے کیک۔ Smith نا کتاب چائنداری و پٹ و پول نا مغرب نا روایتی وڑ آتے چیلنج کیک و ردِ قوضہ گیری کن اسے خلقی او پٹ و پولی ایجنڈا اسینا خواست اے کیک۔
دا جائزہ نا مقصد Smith نا کتاب امر ڈنی پولکار آتے سرپدی تیک ہرا خلقی آ مخلوق تون پٹ و پولی آ کاریم تیٹ اوڑدہ مننگ کیرہ، اسے ڈنی پولکار اسے انت گڑا تیان سرپد مروئی ءِ، امر تینا کاریم ءِ زیبائی بشخنگ کیک، و بنیادی آ ہیت دادے کہ اسے ڈنی پولکار ئسینا خلقی آ مخلوق نا پٹ و پول ٹی اوڑدہ مننگ جوانے ؟
اسے نظر اٹ دا جائزہ نا زور راج دوستی ءِ۔ کتاب نا جوانگا نشان خلقی آ زانت کار و پولکار ءِ ہرا کہ خلقی پٹ و پولی ایجنڈا و وڑ-و-ڈول تیار کننگ ٹی او۔خلقی آ بیرہ ہمو کاریم حقیقی علم پاننگو ہرا مغربی نظر اٹ قبول مرے و ڈنی کاریم تے آن بڑز مرے۔ اسے جائزہ اس ہرا خصوصاً ہندا ہیت آ زور خلیک کہ دا کتاب نا خواننگ اسے ڈنی پولکار اسے کن جوانے یا آخہ، ہرا مغربی نظر اٹ پٹ و پول کیک۔ ڈنی ئسینا نظر ئٹ دا جائزہ Smith نا کتاب نا اسے پین پلّو اس بیان کیک ہرا نا مقصد اسے خلقی ئسے نا ہیت اے رد کننگ اف۔
سمتھ نا کتاب ارا حصہ ٹی ءِ۔ اولیکو حصہ مغربی پٹ و پول نا تاریخ و قوضہ گیر ثقافت نا باروٹ ثقافتی مفروضہ آتیا تنقید۔ ارٹمیکو حصہ خلقی پٹ و پول کن اسے پوسکونو ایجنڈا اس موہاڑ کننگ۔
کتاب نا اولیکو سمتھ زالبولی حق آک و تنقیدی نظریہ نا سانچہ ءِ دوئی کیک۔ او مغربی پٹ و پولی وڑ، نظریہ و نوشت نا اسلوب تے اسے پوسکونو رنگ اس تیک ہرافک کہ روشن خیال و راست پسندی نا روایت نا وجہ آن سائنسی عمل نا پنا درست مریرہ۔
دا مغربی سانچہ اٹ قوضہ گیر، سیل و سواد کن بروکاک و مسافراک خلقی آ مخلوق نا باروٹ تینا مقصد یا غیر جانبدار پٹ و پول کریر۔ سمتھ ایڈورڈ سعید نا Orientalism نا کمک ہلیسہ پائک امر ڈنی بندغ آک خلقی آ مخلوق نا باروٹ نمائندہ ئسینا حیثیت ئٹ راۓ تسونو ہرافتیان خلقی آ مخلوق نا باروٹ بھلو کچ ئسیٹ Discourse تالان مسونے، و اوفتا پاروکاتے راست تکسہ ایلوفتا پاروکاک نزور کننگانو۔ سمتھ دادے اسے سامراجی نظر ئٹ پٹ و پول پائک۔ سمتھ نا ہیت آک پولکار و نمائندہ آتے کن اسے یاتگیری ئسے کہ او تینا راۓ ءِ تنقیدی نظر ئٹ چکاسیر، ایلوفتا پاروکاتے ام بنر تانکہ اوفتا راۓ راست نا سیخا ٹی اڈہ ہلے۔
مغربی ثقافت تینے جائز علم نا مرکز پنی کرینے۔ سمتھ علم آ مغربی زورآوری نا زیہا تنقید کرسہ پائک اسے ثقافت و سماج ئسے قوضہ آن آجو مننگ نا بکارے اوڑے مغربی علم نا زورآوری آن راستی آ حکومت نا قصہ آکو۔ مغربی پٹ و پول نا موہاڑ وخت، جاگہ، موضوع و صنف نا بنیاد آ مریک و ڈنی(imperial) نظر نا گواچی مرسہ مونا بریک و اسے پولکار ئسے متاثر کیک۔
سمتھ نا کتاب آن دا پاش مریک کہ ڈنی پولکار آتا کاریمک بیرہ تاریخ نا کتاب آتیکن اف۔ سمتھ پوسٹ کالونیلزم نا اصطلاح ءِ رد کیک ( نوآبادیات نا کاروبار ایسر مسونے) و دا پائک کہ نوآبادیات نا خلقی آ مخلوق آ بھلو اثر ئس مریک۔ سمتھ کارپوریشن و حکومت آتا تحقیق و ٹیکنالوجی نا کنڈا اشارہ کیک، خصوصاً ماحول ہرا خلقی آ مخلوق نا عقیدہ، نظام و علم ءِ تسلیم کننگ ٹی ناکام سلیرہ۔ دا کتاب یاتگیری ئسے کہ نوآبادیاتی تکنیک آک ترقی کرسہ کیرہ و خلقی آ مخلوق پین پسماندہ کیرہ و دا کہ ڈنی پولکار آتے دا سوچوئی مریک کہ اوفتا عالمی نظریہ ایلوفتا غالب گپ discourse ءِ دوارہ نوشت ٹی ہتیک۔
کتاب نا ارٹمیکو حصہ خلقی آ پولکار، مخلوق و اوفتون کاریم کروکاتے ٹِک کیک۔ دا حصہ خلقی آ پٹ و پول کن اسے ایجنڈا ئسینا موہاڑ آ توجہ تیک و دا وخت خلقی آ مخلوق نا نیام ٹی زیر بحث مسلئہ آتے حل کیک۔ سمتھ ڈی کالونائزیشن نا باروٹ تینا ہیت ءِ زالبولی Feminist و Positivism نا سیخا ٹی برجا تخک۔ او خلقی آ مخلوق کن پٹ و پول نا قدر و پدتمنگ نا نزوری تے ہلنگ نا کوشست ءِ کیک تانکہ خلقی آ پٹ و پولی ایجنڈا اس تیار کننگ مرے۔
سمتھ پٹ و پولی طریقہ تا سوج کیک ہرا مغربی طریقہ تا بدل مریرہ نسلی تعصب و استحصال آن بچر۔ اونا گیشتری نظریاتی کاریم خلقی آ مخلوق نا کیس اسٹڈیز و اونا تینا پٹ و پول نا بنیاد آ ٹے، تصدیق کیک کہ خلقی آ مخلوق نا پٹ و پولی ایجنڈا حقیقی ءِ و ترقی کرسٹ ءِ۔ و دا اسے بیرہ تجریدی یا نظریاتی خواہش اس افک۔ سمتھ نا تیار کروکا کاریم پین ہروئی مرو ہرا خلقی آ مخلوق تا پٹ و پولی منصوبہ نا فریم ورک و طریقہ نا خالی اس مونا ہتیک۔
دا کتاب ماوری پٹ و پول ٹی ترقی نا تفصیلی مطالعہ ءِ مونا ہتیک و ماوری آن بطور ماوری پولکار مٹ مننگ نا پام ءِ کیک۔ سمتھ ماوری علم نا صداقت و چاہنداری نا طریقہ تیا ہیت کیک و دلیل کن کیس اسٹڈیز تے دوارہ استعمال ٹی ہتیک۔ سمتھ Kaupapa Maori پٹ و پول نا اسے پانادیو جائزہ اس مونا ہتیک۔ ماوری اقدار و روایت آتا پٹ و پول کن مراعات و پٹ و پولی فریم ورک تیار کننگ ہرا ثقافتی وڑ ئٹ محفوظ مریر۔ سمتھ سوال کیک کہ اسے غیر ماوری ئسینا ماوری پٹ و پول ٹی بشخ ہلنگ جوان ءِ؟ وا ہم او دا پڑو ءِ کیک کہ ماوری پٹ و پول ٹی بشخ ہلوکا نا ماوری مننگ الّمی ءِ۔ دا ہم پائک کہ غیر ماوری تے ماوری تا باروٹ پٹ و پول ئٹ بشخ ہلنگ آن توننگ ہم مفک۔
سمتھ ڈنی پولکار تا مسلئہ ءِ جوان وڑ ئٹ پاش کننگ کپک، ای ہم اونا ہیت آتے پہو مننگ کپرہ۔ پدا ہم او دا پڑو ءِ کیک کہ دا کتاب نا مقصد خلقی آ مخلوق ءِ جوڑ کننگ اوفتا مسلئہ تے حل کننگ ءِ۔ دا مقصد کن ڈنی پولکار آتا سبک او کڑدار ئسے۔ سمتھ پائک کہ دا موضوع آ تینا ہیت آتے کیوہ و کنے ڈنی و خلقی پولکار و خلقی آ مخلوق نا نیام ٹی سیالی نا باروٹ پین خوانوئی ءِ۔
سمتھ مونا پائک نوشت آتے خواننگ ٹی او گیشتری توجہ تننگ کپک۔ او مثال تیک کہ کنے ہندونو نوشت اس خوانوئی مریک ہرا برطانیہ و امریکہ نا باروٹ مرے۔ او دا ہم پائک کہ خلقی آ مخلوق نوشتہ آ تیٹی گیشتر تینا نمائندگی ءِ خنپسہ و بھاز وخت نمائندگی مرے ہم اودے تسلیم کپسہ۔ اونا کتاب خصوصاً خلقی آ مخلوق نا تجربہ تے قصہ نا مرکز ٹی تخک او دا خاطر آن قیمتی ءِ کہ دا نیوزی لینڈ نا خن ئٹ ماوری نا تجربہ تے اونا قصہ نا مرکز ٹی تخک۔
ہراتم کہ سمتھ نا کتاب نیوزی لینڈ آن مونا تدیک کنے گڑتی اس پلویڑ کیک کہ کتاب خلقی آ مخلوق نا تجربہ تے بھلو کچ ئسیٹ عالمگیر جوڑیک۔ سمتھ تینے اسے ماوری نیاڑی اس ساریک ولے اونا کتاب کل خلقی آ مخلوق نا تجربہ تے بیان کیک۔ای منوہ کہ بھاز آ خلقی آ مخلوق تینا علم نا پسماندگی و نوآبادیات نا تجربہ کرینو۔
ای بے جارات مریوہ کہ دا کتاب کل خلقی آ مخلوق کن آفاقی تجربہ تھا دعوٰی کیک۔
سمتھ درستی راستی ٹی خلقی نا اصطلاح نا استعمال ءِ مسلئہ اس جوڑیک و منیک کہ دا اصطلاح بھاز آ تجربہ تے یک جاہ کیک ولے کنے خلیس ءِ کہ مُچ کتاب ٹی اونا بھلو کچ ئسیٹ استعمال خلقی آ مخلوق نا بھاز آ تجربہ تے عالمگیر جوڑیک و حد ئسیکان ایلوفتون اسے رنگ مننگ آ مغربی Discourse ءِ اوڑدہ کننگ کیک۔ اگہ خلقی و نوآبادیاتی مخلوق نا نیام ئٹ مشترکہ تجربہ تے سرپند مننگ الّمی ءِ ولے فرق ءِ چاننگ ہم الّمی ءِ۔ دا جوان الو بیرہ تعارف ئٹ دا پڑو ءِ کننگ آن مُچ نوشت ئٹ کروسوس۔
دا جائزہ نا مقصد خلقی آ مخلوق تون پٹ و پول ٹی اسے ڈنی پولکار ئسیکن دا کتاب نا بکار آ ہیت کروئی اس۔ خیر دا کتاب نا بنیادی توجہ خلقی مخلوق ٹی تینا پٹ و پول کن ایجنڈا تیار کروئی ءِ۔ ڈنی پولکار نا دا وخت و مستقبل نا ایجنڈا ( ڈی کالونائزنگ نا طریقہ کار) نا ایجنڈا نا حد آ سبک ءِ۔ کنا کل سوال آ تا ورندی ملتو ولے کتاب تینا بود و بیرشت، ثقافت و عقائد آ غور کننگ اوفتیا تنقید نا بکار کن اسے یاتگیری اس تیک۔ نیوزی لینڈ نا تاریخ نا باروٹ تفصیلی ہیت، تاریخ نا مطالعہ نا بدل و عالمی نظریہ و چاننگ نا طریقہ تیان بلد مننگ کن جوانو سبخ اس تیک و پولکار آتے یاتگیری اس تیک کہ دیر نا قصہ آتیکن مراعات ملیک و دیر نا قصہ آک نمائندگی کننگ ٹی پسماندہ او۔
__________________________
دا نبشتانک ئٹی درشان مروکا غٹ خیال و لیکہ آک نبشتہ کار نا جند ئنا ءُ۔ المی اف کہ بی ایس سی اسلام آباد اونا خیال و لیکہ نا منوک مرے۔