پریس ریلیز
بلوچ اسٹوڈنٹس کونسل اسلام آباد ءِ جارکش ءَ وتی دانکانی تہءَ راجی شائر ءُ بلوچی شائری ءِمُہکمیں کَلات مبارک قاضی ءِ بِیرانی ءَ پہ دلپدردی درشان کُتءُ گْوشت کہ مبارک قاضی راجی سْرپ ءَ اُوشتوکیں مُجّتی تب ءِ راجی واھُندیں کارستانی لڑّ ءَ مُدام گِیر آرگ بیت۔ آئی ءِ سرجمیں زند لبزانک بہ بیت یا سیاست بلوچ راجدوستی ءِ ستاہ ءَ گْوستگ۔ مبارک قاضیءَ وتی شائری ءُ ساچشت آنی تہءَ بلوچ دودمان، راجمان، گْوستانک، بندپتر ءُ راجدپتر ءِ بارو ءَ انچیں دَرشانی یے کُرتگ کہ آ بلوچ ءِ راجی مارشتانی جھگیری ءَ کن اَنت ۔ بلوچانی زندگیں کارستانی تہ ءَ مبارک ھم کِرد ئے واھُند بُوتگ ءُ مَرگ ءَ پد ھم راج آئی ءَ را پُر مڑاھیں ءُ نہ تُرسیں بلوچے ءِ دروشم ءَ مُدام یات کنت ءُ گیر کاریت۔
دیمترا بی ایس سی،اسلام آباد ءِ جارکشءَ گُشت کہ مبارک قاضی، بلوچ ءُ بلوچ سرڈگار ءِ ھاترا ہر وڈیں سکّی ءُ سوری ءُ کُربانی دئیگءَ چک ءُ پد نہ بُوتگ۔ اے کارست چہ واری ءُ بزّگیءَ بگر داں زندان ءِ آزار دیستگ اَنت بلے راجی راہ ءُ لیکہ ءَ چہ کمے ھم پد نہ کنِز اِتگ۔ دگنیا ءِ آ دگہ راجانی تہءَ پہ راجی گہبودی ءُ تپاکی ءَ لبزانک ءِ ھما کرد کہ آیاں راجانی تپاکی ءُ ایردستی ءَ چہ درآیگ ئے راہ بزانکہ گہگیری ءِ راہ پیشداشتگ ءُ زمین ءِ پھازگ ءِ سکین اِش داتگ ھمے پئیم مبارک قاضی ءِ ھم سرجمیں زند ءُ ازم بلوچ راج ءِ سکین دئیگ ءَ گوستگ۔ مبارک قاضی ءِ شائری یے وانگ ءَ پد وانوک پہم اِت کنت کہ آئی ءِ شائری بلوچ ءِ تب، زمین ءُ راجی راستی ءَ چہ گِستا نہ بُوتگ بلکیں ڈیھ ءِ نندوکیں ھمک تبک ءِ مردم آئی ءَ وتی ساچشتانی بھر کُرتگ انت۔ آئی ءِ لبزانکی لیکہ ءِ جند تچک بُوتگ ءُ بلوچستان ءِ مید، شوانگ، شپانگ، پوریاگر ءُ بزگر آں ہوار ہمک پڑ ءِ مردم آئی ءِ گوشداروک اَنت ۔
اے اھدءَ کہ ما زندگیں اے “مُبارک قاضی”ءِ اَھد اِنت۔ آئی ءِ شئیری کتاب " منی اھد ءِ گم ءِ کسّہ" وت اے گپ ءِ گواہی ءَ دَنت کہ اھد ساز ھما مردم گوْشگ بنت کہ آ سرجمءَ وتی راجمان، دودمان، ربیدگ، رسم ءُ رواجاں مہکمیں رنگے ءَ درشان بکن اَنت ءُ پدا راج آئی ءِ منّگ ءَ ساڈی بہ بیت ءُ مردمانی دلّاں آئی ءِ ساچشت جاگہ کُت بِکن اَنت۔ دومی گپّ بندپتر لاچار بہ بیت کہ آئی ءَ را اھد ساز ءِ نام بہ دنت، گڑا ھمے پئیم ءَ قاضی ءَ سرجمیں چار پنچ دھکانی رھشونی کرتگ ءُ داں گُڈّی وھد ءَ راجی درد ءُ مارشت آئی ءِ زرد ءَ منت اِتنت ءُ نمیران بُوت۔
قاضی، راجی ہمک مچی٘ ءُ زہرشانی آں بگر داں لبزانکی پتّراں یکشل ءَ گون بُوتگ ءُ پہکیں بلوچے ءِ داب ءَ وتی راجی زمہ واریاں پیلو کنگ ءَ بُوتگ۔ ھمے پئیم مبارک قاضی ءِ مزن شانیں بالاد ءِ ستاہ ءُ ساڈاھگ گوں چندے گال آں بُوت نہ کنت ءُ نئیکہ کسانیں کارے ءَ قاضی ءِ زند ءُ ازم ءِ جتائیں تک ءُ پہنات در جنَگ بنت۔ اے ردا بی ایس سی، اسلام آباد مُبارک قاضی ءِ یات ءَ لبزانکی دیوانے برجم داریت ءُ مبارک قاضی بلوچ ءَ راج ءِ تہءَ یک گہگیریں ءُ اھد سازیں کارستےءِ رنگءَ مُدام گیر کاریت۔
بلوچ سٹوڈنٹ کونسل - اسلام آباد