'بلوچ ءُ بلوچانی ڈیھ'
بلوچ کئےاِنت؟ چَہ کُجا اَتکگ؟ آیا بلوچ اے زمین ءِ واجہ اِنت پیداک اِنت یا چو ایدگہ نوک آبات کاراں اتکگ ءُ ادءَآبات بوتگ؟ اے لھتیں اَنچیں جُست اَنت کہ ھر بلوچ ءِ تہ ءَ ساہ زورگ ءَ اَنت۔ بلوچ پہ وتی شوھاز ءُ اے جستانی پسُّواں راجدپتری کِتاباں چار ایت۔ بلئے بلوچ ھمے پٹ ءُ پول ءِ سپرءِ تہ ءَ گار بیت ءُ گیشتر گَڑ ءُ مَنج ءِ آماچ بیت۔ چوش اے واستہ بیت کہ مئے راجدپتر نویس یک لیکہے ءِمنّوگر نہ اَنت۔ کَسے بلوچ ءَ ایرانی ءُ ہندی لیک ایت گُڑا کَسے عرب ءُ شامی۔
فاروق بلوچ وتی کتاب ءِ پیش لبز ءِ تہ ءَ نبشتہ کَنت کہ"مئے راجدپتر نویساں بازیں جُھد ءُ کوشستے کُتگ ءُ بلوچ بُرتگ گوں عرب، ایرانی ،شامی، ترکمانی، ہندی ءُ کلدنیانی گوم ءَ سْیادی داتگ اَنت۔ بلئے یک راجدپتر نویسے ءَ بلوچ ءُ بلوچستان ءِ راستیں سْیادی ءِ شوھاز کنگءِ جُھد نَہ کُتگ۔"نبشتہ کار دیمتر ءَ نبشتہ کَنت کہ ھرراجدپتر نویسے ءِ ھمے جُھد بوتگ کہ بلوچ ءَ بہ بارت گوں یک مزن نامیں شاہی کھولے ءَ گوں سْیاد بکنت۔ چوشکہ کہ آ وھدءِ مزن نامیں کہول آرین، عرب ءُ وھدیگیں کلدانی کھول اَنت۔ پمیشکا راجدپترنویساں بلوچ گوں ہمیشاں بندوک کتگ اَنت۔
بلوچ راجدپترنویس وھدے بلوچ ءِ راجدپتر ءِ شوھازگ ءَ نِشتگ اَنت گڈءَ آھانی گور ءَ کُمکّی مَواد ھما بوتگ اَنت کہ انگریز ءَ نبشتگ ءُ ایر کُتگ اَنت۔ ءُ اے گپ اد ءَ الم زانگی اِنت کہ انگریز یک کبزہ گیرے بوتگ کہ بلوچ ڈیھ ءَ اتکگ۔ ءُ یک کبزہ گیرے پہ ایردست ءَ ھچبر مھروان نہ بیت۔ انگریز ءَ وتی زور ءِ مُھکم کنگ ءَ پہ وڑ وڑیں پندل سازاتگ ءُ چہ ھمے پَندلاں چہ یکّے بلوچ ءِراجدپترءِ لگتمالی بوتگ۔ دانکہ بلوچ وتی جِند ءِ شوھاز ءَ گار بہ بیت ءُ انگریز وتی واجھی ءَ مُھکم ءَ چہ مُھکمتر بکنت۔
اے وَ تچکیں ھبرے کہ اگاں ترءَ گوں یک ڈیھے ءَ سْیادی مہ بیت گُڑا تو پکّا آ ڈیھ ءَ پہ ھون نہ ریچ ئے۔ بلئے اگاں تو سرپد بِہ بئے کہ اے تئی پِت ءُ پیرکی زمین اِنت ءُ تئی گْوستگیں کَماشاں ھمد ءَ زِند گوازینتگ گُڈءَ تو پہ اے زمین ءَ مِرگ ءَ ھچّ چَک ءُ پَد نہ بئے۔ بلوچ ءِ سْیادی گوں وتئی زمین ءَ بگندئے ھمے واستہ سِندگ بوتگ دانکہ آ جَنگ کُت مہ کَنت۔ فاروق بلوچ لڑ ءُ بار ءِ لیکہ ءِ منوگراں منّانک دیان ءَ جُست کَنت کہ اگاں بلوچ چَہ درءَ اَتکگ ءُ اد ءَ پَس ءُ میش ئِے چارینتگ گُڑا اد ءَ جُست اے پاد کئیت کہ یک شِپانکے پہ یک کَھچرے ءَ چون ھون ریچ ایت؟ کَھچر وَ دگہ باز اِنت گُڑا آ اے کَھچر ءَ یل نہ کَنت ءُ پہ دگہ کھچرے ءَ چیا نہ رؤت؟
نبشتہ کارءِ رِدءَ ھر کبزہ گیرے ءِ اولی ءُ مُھکمیں سِلاہ "بھر کن ءُ رَاج کن"بِزاں"Divide and rule" ءِ پَندل اِنت۔ ھمے پیم ءَ انگریز ءَ پہ بلوچ ءِ بھر ءُ شِنگ کنگ ءَ مزنیں جُھد ءُ کوشستے کُتگ۔ انگریز اَنچوش کہ وتی پاداں بلوچستان ءَ ایر کَنت گُڑا درستاں چہ پیش آ بلوچ راج ءَ دو راج ءِ تہ ءَ بھر کنگ ءِ جُھد ءَ کنت۔ چوشکہ آ بلوچ ءُ براہوئیاں دو جتائیں راج لیک ایت۔ "براہوئی" لبز ءِ کارمَرز 1810 ءَ چَہ پیش گِندگ ءَ نئیت۔ بلئے وھدے کہ انگریزانی جاسوس ھِنری پوٹنگر کئیت گُڑا اے لبز دیم ءَ کئیت۔ اے کار ایوک ءَ انگریز ءَ نہ بلکیں ایرانی ءُ عربی (تازی) کبزہ گیراں ھم کُتگ۔ چوشکہ آھاں بلوچ کوچ ءُ بلوچ ءِ تہ ءَ بھر ءُ شنگ کُتگ اَنت ءُ آ دگہ دگہ راج گوشتگ اَنت۔
فاروق بلوچ ءِ اے کِتاب چار بَھرانی تہ ءَ بَھر اِنت۔ اولی بھر ءِ تہ ءَ نبشتہ کار بلوچ ءِ بابت ءَ گپ کنت کہ بلوچ کئے اَنت ءُ چہ کجا اتکگ اَنت۔فاروق بلوچ لڑ ءُ بار ءِ لیکہ ءَ رَد کَنت۔ لڑ ءُ بار ءِ لیکہ ءِ رِد ءَ بلوچ چَہ درءَ اَتکگیں راجے کہ اے زمین ءِ سر ءَ اتکگ ءُ آبات بوتگ۔آ جاھمنندی ءِلیکہ ءَ گوں منانک ءَ دیم ءَ کار ایت۔ جاھمنندیءِ لیکہ ءِ رِد ءَ بلوچ چَہ کَرناں اے زمین ءِ واجہ اِنت ءُ پیداک اِنت۔ فاروق بلوچ، بلوچانی راجدپتر ءِ بابت ءَ نبشتہ کنت کہ بلوچانی گْوم ءَ یک مزنیں ناھکّی یے بوتگ کہ آ دری مردم لیکگ بوتگ اَنت بلئے چوش نَہ اِنت۔ بلوچ اے ڈیھ ءِ واجہ وت اِنت ءُ پیداک اِنت۔ 18 دہمیءُ 19 دہمی کَرناں وھدے گریٹ گیم بِندات بیت گُڈءَ بلوچستان چَہ ارزشتدار تریں دمگاں یکّے بیت۔ رُوس ءِ دار ءُ مَدار ءِ واستا بریٹش پندل سازی کَنت ءُ گوں ھمے پندلاں بلوچستان ءَ دؤر کَنت۔ 1839 ءَ کلات ءِ قبضہ ءَ پَد، بریٹش ءِ راجدپتر نویس گوں یک پندلے ءَ نِند اَنت ءُ بلوچ ءِ راجدپتر ءَ گوں وتی تب ءَ نبشتہ کن اَنت۔ اے کار اَنچو اَنچ نہ بَنت بلکیں اے کار یک سرجمیں پَندلےءِ بنیاد ءَ بنت۔ ءُ ھما پندل ءِ سان داں روچء مَروچی ءَ ھم گِندگ ءَ کاینت کہ بلوچ چَہ وتی راستیں پجّار ءَ آژنا نَہ اِنت۔
دیمتر ءَ فاروق بلوچ گوش ایت کہ وھدے بریٹِش بلوچستان ءَ کئیت گُڑا بلوچ آئی ءِ دیم ءَ چو کوہ ءَ مِکّ بَنت ءُ پہ وتی ڈیھ ءِ پاھازگ ءَ جَنگ کن اَنت۔ ءُ وھدے بریٹش سوبمَنْد بیت گُڑا آ بلوچان دُزّ ءُ ڈُنگ، وکشی، پس چار ءُ میش چار، ءُ جَٹّ نبشتہ کنت۔ فاروق بلوچ، بلوچ ءَ دُزّ ءُ ڈُنگ ءُ وکشی ءُ جَٹّ گوشگ ءَ رَد گوش ایت ءُ نبشتہ کَنت کہ ابولقاسم ءِ شیئراں چَہ اے گپّ زاھر بیت کہ بلوچ ایران ءِلشکرءِ مزنیں کمانانی سر ءَ بوتگ اَنت۔ ھر ھما راجاں کہ ایران ءِ سر ءَ اُرش کُتگ ءُ ایران وتی دست ءِ چیر ءَ کُتگ آیاں بلوچانی کُمَک الم گوں بوتگ۔ ءُ اگاں بلوچاں اے قبضہ گیر کُمک مہ کُتین اَنت گُڑا ہخامنشی، ساسانی ءُ آریناں اد ءَ ھچ پیم ءَ راج کُت نہ کُتگ اَت۔ نوں اے پیمیں مُھکمیں ءُ زوراوریں راجے ءَ آرگ ءُ جَٹّ ءُ وکشی ءُ پس چار نبشتہ کنگ، مزنیں ناھکّی یے۔
کتاب ءِ دومی بھر بلوچ ءِ ڈیھءِ سرءَ اِنت۔اے بھر ءِ تہ ءَ فاروق بلوچ نبشتہ کنت کہ بلوچ ءِ ڈیھ یک اَنچیں جاھے ءَ اِنت کہ آئی ءِ اَرزشت پہ سرجمیں جھان ءَ مزن اِنت۔ ءُ ھمے سبب اِنت کہ پہ دنیا ءِ واکداراں بلوچستان ءِ اَرزشت چو کوہ ءَ مزن بوتگ۔ بلوچ زمین چہ کُجا بندات بیت ءُ کُجا ھلاس؟ اے جُستءِ یک پسّو یے نہ اِنت۔ بلکیں ھر نبشتہ کار گوں یک دومی ءَ دگری داریت ۔ فاروق بلوچءِ رِدءَ اے دگریءِ سوَب بلوچ زمین ءِ واکدارنی دستاں بھر ءُ بانگ کنگ اِنت۔ ڈنّی تاگتاں مُدام بلوچ ءِبھر ءُ بانگ ءِ جُھد کُتگ۔ آھاں نہ ایوک ءَ بلوچ بلکیں بلوچ ءِ زمین ھم بھر ءُ بانگ کُتگ داں آ پہ وشّیں دلے اد ءَ راج کُت بکنت۔ ھردیں کہ بلوچ تمن پہ یکجاھی ءَ پاد اَتکگ اَنت گُڑا ھمساھگ ءُ ڈنّی تاگتاں مُدام اڑاند ودی کُتگ۔ فاروق بلوچ نبشتہ کنت کہ بلوچ ءِ زمین باز بَراں یکجاہ کنگ بوتگ بلئے پدءَ ڈنّی تاگتاں مُدام سِستگ ءُ بھر ءُ بانگ کُتگ۔
سیمی بھر ءِ تہ ءَ فاروق بلوچ، بلوچستان ءِ زمینی گواجنانی (resources)سر ءَ یک ترانے دیم ءَ کار ایت۔ بازیں ڈنّی مُلکان وتی چمّ بلوچستان ءِ سرزمین ءِ سر ءَ ایر کُتگ اَنت۔ ایشی ءِ سوَب اِیش اِنت کہ بلوچستان چہ زمینی گواجناں چہ سَرّیچیں زمینے۔ ھر ھما کہ پہ یک مُلکے ءَ زندگ ءُ ھست بوھگ ءَ درکار بَنت آ بلوچستان ءَ ھست اَنت۔ چوشکہ گیس، تیل،تانبا، سنگِ مَرمَر، سُھر، تلاھیں سِنگ ءُ دگہ بازیں گواجنے اے زمین ءَ کَلّ اِنت ۔ آ نبشتہ کنت کہ بلوچستان ءِ تہ ءَ 510 تھر ءِ گواجن دَرکَپتگ۔ ءُ ھمے سبب اِنت کہ بلوچستان ءِ زمین ءِ اَرزشت روچ پہ روچ گیشتر بوھان اِنت۔
گُڈی بھر ءِ تہ ءَ فاروق بلوچ بلوچستان ءِ سْیاسی دَورانی سر ءَ کسانیں چمشانکے دَنت۔ اے بھر ءِ تہ ءَ آ نبشتہ کنت کہ مھرگڑھ یک سائنسی راستی یے کہ چہ آئی ءَکَس چمّاں بَست نہ کَنت۔ مھرگَڑھ دنیا ءِ کُو ھنتریں دودماناں چہ یکے گوشگ بیت۔ دَمب زانت اے دودمان ءَ 11 ہزار سال کُوھن گوش اَنت۔ چہ مھرگڑھ ءِ دزکپتگیں سرامداں اے زَاھر بوتگ کہ بلوچ اے ڈگار ءِ 11 ہزار ءَ سالی واجہ بوتگ ءُ پیداک اِنت۔
بلوچ ءِ راجدپتر یدریں جَنگے۔ بلوچ ءَ ھمائیں کہ چمّ پچ کُتگ اَنت داں جَنگ ءَ اِنت۔ فاروق بلوچ نبشتہ کنت "آرین اُرش بِہ بَنت کہ ءُ نیم سئے ھَزار سال ءِ ایردستی ءُ لگتمالی، ھچّ زوراور ءَ بلوچ چَہ بلوچ ءِ زمین ءَ در کُت نَہ کُتگ۔" وھدے منگولانی ھکومت ھلاس کنگ بیت، گُڑا 1410 ءَ بلوچستان ءَ بلوچانی راج بِندات بیت۔ اے ھاکمی داں 1948 ءَ مان ایت۔ اے وھداں افغان، ایرانی ءُ پرتگیزی بازیں جُھد ءُ کوشستے کن اَنت کہ بلوچستان ءَ کبزہ بہ کن انت بلئے سوبمَنْد نہ بَنت۔ 1839 ءَ انگریز بلوچستان ءَ وتی دستانی چیر ءَ کن اَنت ءُ گوں بازیں اَھد ءُ کرارے ءَ بلوچستان ءِ سر ءَ واجھی کن اَنت۔
فاروق بلوچ کتاب ءِ اے بھر ءِ تہ ءَ، قمبرانیانی ھکومتی، نصیر خان نوری ءِ دَور ءُ آئی ءَ چَہ پد بلوچستان ءِ زوالی ءِ سر ءَ راہ رواجی چمشانکے اوں دَنت۔
بلوچ ءِ راجدپتر ءِ سر ءَ اِینچو سائنٹیفک کار کہ بوھگی بوتگ، آ انگت نہ بوتگ۔ اے پِڑ ءَ سک باز کار پشکپتگ کہ کنگی اَنت۔ اے رِد ءَ فاروق بلوچ ءِاے کتاب ارزشت دار یت۔
اے نبشتانکءِ تہءَ درشان کُتگیں ھیالءُ لیکہ نبشتہ کارءِ وتیگ اَنت ہژدری نہ اِنت کہ بی ایس سی اسلام آباد آئیءِ ھیالءُ لیکہاں گوں منوگر بہ بیت۔