پجار
اے نبشتانکءِ مول ءُ مُراد بلوچ نودربرانءَ سیاسی لیکہ ایجمنی ءُ ایجمنیءِ باوستءَ را سرپد کنگ انت۔ ایجمنیءِ لیکہءِ سرپد بوّگءَ مارا اینٹینو گرامشیءِ زند ءُ ایجمنیءِ لیکہ ھم پریسگی انت۔ اے لیکہ چہ اینٹینو گرامشیءِ مرگءَ پد آئیءِ جتائیں نبشتانکاں چہ گرامشیءِ پدیں نیومارکسی کواساں دیمءَ آورتگ۔ گرامشیءِ زندءَ اے لیکہ گیشّوار نہ بوّگءِ سوب گرامشیءِ زند ءُ اٹلیءِ نگّیگں جاورال بنت۔ پمیشکہ اے لیکہءَ جوانیں دروشمےءَ دربرگءِ ھاترءَ المّی اِنت کہ اٹلیءِ جاورال، بُندپتر ءُ گرامشیءِ زندءَ ھوار میان استمانی سوشلسٹ زرمبشت ءُ لہتیں آشوبی زرمبشت ھم اے دْرچءِ بہر اَنت کہ آھانی سرءَ گپ ءُ گال کنگی اِنت ۔چوشکہ پرانسءُ روسءِ آشوب المیءَ ترانءُ باوستءِ بہر بہ بنت دانکہ گیشینگءَ ارزانی بہ بیت۔
گرامشیءِ زند ءِ سرءَ چمشانکے
انٹینیو گرامشی اٹلیءِ ھند سیریڑینا (Saradina) ءَ ماں 1891ءَ ودی بیت۔ گرامشیءِ پِت یک سرکاری واکدارے بیت۔ گرامشیءِ امبر ھپت سال بیت وھدے گرامشیءِ کماش ماں کرپشنءِ کیسءَ گرگ بیت ءُ بندیگ کنگ بیت۔ گرامشیءِ کماشءِ بندیگ بوّگءِ سوبءَ گرامشی وتی وانگ ءُ زانگءَ دیما بُرت کرت نہ کنت ءُ پہ وتی کہولءَ روزگارءِ شوھازءَ پوریاگِری کنت۔ لہتیں سالاں پد وھدے گرامشیءِ پِت زندانءَ چہ یلہ دیگ بیت تہ گرامشی وتی وانگ ءُ زانگی دْرچءَ پدا برجاہ داریت۔
گرامشی وتی بُنکی وانگءَ ماں سیریڑیناءَ سرجم کنت ءُ پہ گیشیں وانگ ءُ زانگءِ ھاترءَ دیم پہ اٹلیءِ دمگ ٹیورنءَ روت اِنت۔ 1911ءَ وھدے گرامشیءَ چہ اٹلیءِ سرکار ءِ نیمگءَ اسکالرشپے دیگ بیت تہ ھمے اسکالرشپءِ سوبءَ گرامشی”ٹیورنءِ شھدربرجاہ “ءَ داخلہ زوریت۔ بلے اے اسکالرشپ گرامشیءِ مالی نزوریاں گہتر نہ کنت؛ چوشکہ گرامشی بیمار جانیں مردمے بیت ءُ ورد ءُ وراکءِ کمیءِ سوبءَ سک باز نزور ترّیت۔ پمیشکہ گرامشی 15-1913ءِ میانءَ سک باز بیمار بیت ءُ وانگجاہءَ یل کنت۔ وانگجاہءِ یل دیگءِ سوبءَ گرامشیءِ ھُب ءُ واھگ سیاستءَ گوں گیش بنت۔
ٹیورن اٹلیءِ مزن شہر بیت کہ اودءَ بازیں کارگس بنت ءُ سرجمیں یورپءَ ھمے شہرءَ چہ جوڑ بوتگیں مشینانی بیپار ءُ سوداگری کاینت۔ مزن شہرءِ بوّگءِ سْوبءَ ٹیورنءَ زھمت کشی ءُ کار گرانی ھلاپءَ بازیں زرمبشت چست بنت۔ گرامشی وتی ٹیورنءِ ساھتءَ گوں ھمے پوریاگرءَ باز نزیکی داریت۔ دومی نیمگءَ ٹیورن شھدربرجاہءِ چپ ءُ چاگردیں جاہے بیت کہ ھودءَ گرامشی وتی اھدءِ کواس ءُ زانتکاریں سوشلسٹاں گوں دُچار کپیت۔ ھمے رنگءَ دربرجاہءَ بازیں پروفیسر بنت کہ آ گوں سوشلسٹ زرمبشتءَ بندوک بنت ءُ سوشلسٹ لیکہءِ بابتءَ دربرجاہءَ نودربراں سرپدی دینت۔
گرامشیءِ سوشلسٹ لیکہءَ گوں سِتک ھمے زمانگءَ داریت وھدے کہ گرامشی ٹیورنءِ شہرءَ پوریاگر تبک ءِ تاگتءَ گندیت کہ آ اٹلیءِ زرداریں سرکارءِ دیمءَ اوشت اَنت ءُ گہگیری کن اَنت تہ گرامشیءِ ستک گیش مہکم بیت۔ گرامشی یک جوانیں سیاسی مردمےءَ ابید یک جونیں کواس ءُ اھوالکارے بیت۔ گرامشی بازیں سرھال ءُ جیڑھانی سرءَ نبشتہ کنت۔ اے سرھال اٹلیءِ بندپتر، راجمانءَ زانتکارانی کِرد ءُ سیاستءِ بارو ا اَنت۔ ھمے رنگءَ 1915ءَ گرامشی سوشلسٹ گلءِ نبشتہ کارانی ٹولیءَ گوں ھوار کپیت ءُ یک سرجمیں اھوالکارےءِ بستارءَ وتی سیاسی لیکہ ءُ آوانی کاراں دیمءَ بارت۔
انچوشکہ گرامشیءِ اَھدءَ اوّلی جھانی جنگ بوّگءَ بیت ءُ گرامشیءِ ھمے زمانگءَ سیاستءِ بابتءَ تران ءُ باوست دیمءَ کاریت۔ جنگءِ زمانگءَ گرامشی ٹیورنءِ زندءِ ھرچ پڑءِ بابتءَ نبشتہ کنت، انچوشکہ سیاست یا راجمانی زند بہ بیت یاکہ ھرچ رنگیں زہرشانی ءُ ھڑتال بہ بنت تہ گرامشی کلیں جاورانی بابتءَ نبشتہ کنت۔ ھمے نبشتانک گرامشیءِ نامداریءِ سوب بنت کہ آئیءَ را ھر کس ملکءَ پجّہ کاریت۔ 1916ءَ گرامشی اولی رندءَ گوں مہلوکءَ تران کنت، اے ترانءِ سرھال پرانسءِ آشوب ءُ زالبولانی آجوئی بیت۔ دیمترءَ وھدے 1917ءَ روسءَ بالشیوک آشوب آرگ بیت تہ اے آشوب گرامشیءِ سیاسی زندءَ مزنیں سانے دور دنت۔ دومی نیمگءَ روسءَ چہ چست بوتگیں آشوب ٹیورنءِ پوریاگر تبکءَ پاد کنت ءُ آھاں گہگیریءِ راہءَ ترینیت۔
ھمے سالءَ ٹیورنءِ پوریاگر سرجمیں ھلک ءُ ملکءَ چپ ءُ چاگرد کن اَنت ءُ سئے روچاں داں سرجمیں شہرءَ بند کن انت۔ اے گہگیریءِ پروش دیگءَ زرداریں سرکار گوں وتی لشکرءَ ٹینک ءُ مشینگناں گوں شہرءَ کیت ءُ پوریاگریں مہلوکءِ کشت ءُ کوشءَ بنا کنت۔ اے زوراکیءَ چہ پنجاہ پوریاگر کُشگ بیت ءُ دگہ بازیں گرگ ءُ بندیگ کنگ بنت۔ اگستءِ اے ویلءَ چہ دو چیز دیمءَ کیت؛ یکیں وَ ٹیورنءِ پوریاگرانی آشوبی جوزگانی بندوکی ءُ دومی نیمگءَ سیاسی بے راھبندی گندگءَ کئیت انت۔ اگست ویلءَ پیسر گرامشیءَ ماں گلءَ مزنیں اگدہ گون نہ بیت بلے اے زرمبشتءَ پد وھدے بازیں سوشلسٹ رھشون کُشگ ءُ بندیگ کنگ بنت تہ گرامشی پہ گلءِ پروژنل کمیٹیءَ گچین کنگ بیت۔ ھمے زمانگءَ وھدے گلءِ سرجمیں کار اوشتءِ آماچ بنت تہ گرامشی گلءِ نیمگءَ چہ شنگ بوتگیں تاکءِ شونکار بیت۔
1918ءَ وھدے اولی جھانی جنگ ھلاس بیت تہ اٹلی ءُ کانٹینٹل یورپءَ پہ آشوب چست کنگءَ جہد ءُ کوشست کنگ بیت، بالشیوک آشوب ٹیورنءِ جہدکاراں باز سکینءُ سرپدی دنت۔ یک بُنکی سرپدی یے ھمیش بیت کہ آ سویتءِ وڑیں تاگتوریں راھبند ءِ ایرگیج کُت بہ کن انت ۔ نوکیں تاگتوریں ادارھانی ھیال ھمیش انت کہ آشوب چست کنگءِ جہدءَ یک جوانیں کردے پیلو کرت کن انت ءُ دومی نیمگءَ یک آوکیں استانےءَ پہ ادارھانی بنھشت ھم ایر کرت کن اَنت۔ انچوشکہ اٹلیءِ سرءَ روسءَ چہ چست بوتگیں آشوبءِ سان سرجمیں یورپءَ گیشتر بنت۔ آوکیں سئے سالاں گرامشی ھمے درورءَ ماں ٹیورنءَ کارمرز کنگءِ ڈبّہءَ زوریت۔
گرامشی ٹیورنءِ سوشلسٹ جہدءَ یک بنکی کردے پیلو کنگءَ بیت ءُ نوکیں گلے کہ آ کمیونسٹ پارٹی آف اٹلی ءِ نامءَ زانگ بیت کہ آئیءِ بنھشتءَ ایر کنگءَ بیت۔ گرامشیءِ اے دورءِ نبشتانک انگتءَ داں وتی لیکہی ارزشت ءُ ھَستیں وھدءَ داں مان اَنت۔
مئی 1918ءَ گرامشی گوں وتی ٹیورنءِ سنگتاں ھوار یک ھپتگی تاکے ماں”نوکیں رد ءُ بند “ (New Order)ءِ نامءَ شنگ کنگءِ پیسلہءَ کن اَنت۔ انچوشکہ ھمے زمانگءَ جہانی جنگءَ چہ مانشانتگیں سیاسی گپچلاں روچ پہ روچ جاک ءُ زھرشانی گیش بوان بنت۔ نوکیں رد ءُ بند یک تاکےءَ گیش گرامشی ءُ آئیءِ سنگتانی آؤکیں اٹلیءَ یک سرجمیں سیاسی ءُ روزیگی لیکہے بیت۔ نوکیں رد ءُ بندءَ گرامشی کارگسانی تہءَ ھستیں کمیٹیانی جیڑھاں نبشتہ کنت۔ نوکیں رد ءُ بندءَ گرامشی ھما جاھاں شون کنگءِ جہدءَ کنت کہ ھودءَ پوریاگر ءُ زانتکاریں مہلوک یکے دومیءَ گوں نند ءُ نیاد کن اَنت۔ ایشیءَ ابید نوکیں رد ءُ بندءِ بازیں دری نامداریں زانتکارانی نبشتانک ھم شنگ کنگ بنت۔
اورڑینو نوا چہ آ دگہ تاکاں گیش ارزشت پمیشکہ داریت کہ ھرچ ھیال ءُ لیکہے کہ ادءَ نبشتہ کنگ بیت تہ دومی نیمگءَ ھمے ھیال ٹیورنءِ پوریاگریں مہلوکءِ سرءَ کارمرز کنگ بیت۔ ایشیءَ چو سوویت یونینءِ وڑءَ یک آشوبی رھبندے گون بیت ءُ پہ ھمے رھبندءَ دیمونی ھم دیگءَ بنت۔ 1920ءَ داں ٹیورنءِ مزن مزنیں کارگسءَ کونسل اڈ دیگ بنت ءُ اے کونسلانی مول ءُ مراد مہلوکاں سرپدی دیگ اِنت۔ اے نوکیں ادارہ کوھنیں ادارھاں جتا ءُ وتواک بنت۔
ھمے کونسلانی برورد بیت کہ اپریل 1920ءَ ماں ٹیورنءَ کارگسانی پوریاگر دگّانی سرءَ کاینت ءُ پر تشددیں زھرشانی کن اَنت۔ اے زھرشانی سرجمیں ٹیورن شہرءَ ماہےءَ داں برجاہ دارگ بیت۔ بازیں پوریاگر سلاہبند کنگ بیت ءُ آیاں مہلوکاں چہ زرگریں سرکارءِ پئوج ءُ پولیسءَ رکینگءِ زمہ واری دیگ بیت۔ زورگریں سرکار ٹیورن شہرءَ سرجم ءَ انگیر کن انت؛ مزنیں کچےءَ پئوج ءُ پولیس گوں وتکاریں سلاہ ءُ ٹینکاں دگّانی سرءَ کاینت۔ بلے بژنءِ گپ ایش انت کہ گوستگیں زھرشانی بے سوب بنت ءُ ھمے رنگءَ اے زرمبشت ھم بے سوب بیت۔ لہتیں مدتءَ پد گرامشی وھدے اے وئیلءِ بابتءَ تران کنگءَ بیت تہ گرامشی وئیلءِ بے سوبیءِ مستریں زمہ وار اٹلیءِ سوشلسٹ سیاسی مہلوک ءُ زانتکارانی ناسرپدی لیک ایت کہ آ سرجمیں راجءَ اے جنزءَ ھوار کنگءَ بے سوب بنت ءُ ٹیورنءِ جہدکاراں پشتءَ یل دینت۔
ھمے دابءَ نوکیں رد ءُ بندءِ ٹولیءِ بگیری ھلاس بیت ءُ اے ٹولیءِ مردم وت وتی راھاں جتا کن اَنت۔ گرامشی ھستیں گارگسانی تہءَ کمیونسٹ ھیلکاری دیگءَ بنا کنت ۔نوکیں رد ءُ بندءِ پرشت ءُ پروشءَ پد اٹلیءِ پوریاگر ھمے ٹولیءِ گُشتگیں ھیال ءُ لیکہانی سرءَ کار کنگ بنا کن انت۔ سرجمیں اٹلیءَ ھمے رنگیں یونین اڑ دیگ بیت۔ پوریاگریں مہلوک کارگساں ایردست کن انت ءُ کبل اش کن انت۔ نوکیں رد ءُ بند پرشت ءُ پروشءِ آماچ بیت، لس گل وت ماں وت جاک ءُ جنگءِ دْرچے بندات کن انت۔ دومی نیمگءَ اٹلیءَ ھمے درگتءَ پاشسٹ (Fascist) وتءَ مہکم کنان بنت ءُ سوشلسٹ مہلوکءِ سرءَ بیڑ بر انت۔ ھمے پاشسٹانی سروکیءَ موسولینی (Mussoloni) کنگءَ بیت، اٹلیءِ کارگسانی واھند ھمے پاشسٹ گلاں جوانیں رنگےءَ مالی کُمک کن اَنت۔ زورگریں سرکارءِ واکدار ھم ھمے پاشسٹاں کمک کن اَنت۔ زورگریں سرکارءِ واکدار وتی مردماں موسولینیءِ گل Fascist ءِ بہر بوّگءِ سکینءَ دینت۔
سوشلسٹ پارٹی آف اٹلی ھم پرشت ءُ پروشءِ آماچ بیت، اے شکستءِ بُنکی سوب گلءِ لیکہی پرک ءُ درک بنت۔ سوشلسٹ پارٹیءِ بازیں باسک در کاینت ءُ یک نوکیں گلے جوڑ کن اَنت کہ ھمے درتکگیں باسکاں گرامشی ھم ھوار بیت۔ اے گل کمیونسٹ پارٹی آف اٹلی (PCI) نامءَ زانگ بیت۔ گرامشی پی سی آئیءِ بنجاہی کمیٹیءِ واستہ گچین کنگ بیت۔ پی سی آئیءِ جوڑ کنگءِ وھدءَ گرامشیءِ اُمر سی سالاں کمتر بیت۔ گرامشیءِ سیاسی چست ءُ ایرءَ چار سال ھم شریءِ سرءَ نہ بیت۔ ءُ آؤکیں سئے سالانی تہءَ گرامشی اٹلیءَ پاشسٹاں تاگتور بوّگ ءُ اٹلیءِ سرءَ ایردست بوگءَ گندیت، ایشیءَ ابید گرامشی کمیونسٹ انٹرنیشنلءَ پُشت کنزگ ءُ بالشیوک پارٹیءِ تہ ءَ وت ماں وت اڑ ءُ کُڈءَ ھم گندیت۔ اے رنگیں جیڑہ گرامشیءِ سیاسی کارزندءَ تکانسر کن انت۔ ھمے رنگیں بازیں دگہ سوب بنت کہ مارا گرامشیءِ سیاسی کارزندءِ سال 1922-26ءِ بابتءَ سرپدی دست نہ کپیت۔ ھمے میانءَ گرامشی ماسکو ءُ Viennaءَ ھم روت۔
1922 ءَپاشسٹانی زُلم ءُ زوراکیانی تہءَ ترندی کئیت، ھمیشانی ھلاپءَ گہگیری کنوکیں یکیں گل کمیونسٹ پارٹی بیت۔ ھمے رنگءَ پی سی آئی اسٹرئیکءِ جارءَ جنت بلے اے اسٹرئیکءَ پاشسٹ شنگ شانگ کن اَنت۔ وھدے موسولینی دیم پہ رومءَ مارچ کنت تہ پی سی آئی پدا ھڑتالءِ جارءَ جنت بلے مہلوکءِ نیمگءَ ھچ وڑیں پسّو نہ رسیت۔ وھدے پاشسٹ 1922 اکتوبرءَ تاگتءَ وتی دستءَ کن انت تہ مردماں جَنگ، گار ءُ بیگواہ کنگءَ بنا کن اَنت۔ 1923ءَ داں ایراد گروک سرجمیں گل ءُ آیانی شنگکار ڈالچار کنگ بنت۔ پاشٹ ٹولی یک ھپتگےءَ پی سی آئی ءِ پنچ ھزار سنگت دستگیر کنت۔ پی سی آئیءِ دْرستیں ٹریڈ یونینءِ کارمستر، کارگشاد ءُ لوکل کونسلر دستگیر کنگ بنت۔ پی سی آئیءِ سرجمیں زر ءُ مال گرگ بنت۔ دومی نیمگءَ ما گند ایں کہ پی سی آئی سرجمءَ اوشتءِ آماچ نہ بیت بلکیں نوکیں رد ءُ بند گلءِ نیمگءَ ھرچ روچ شنگ کنگءَ ھوار ھرچ روچ گوں مہلوکاں نند ءُ نیادءِ ھم دْرچے بندات بیت۔
1923 ءَگرامشی دیم پہ ماسکوءَ روت۔ ماسکوءِ بنداتی روچاں گرامشی باز نگیگ بیت ءُ بازیں مدتاں داں گرامشی نادراھجاہءَ گوازین ایت۔ ھمے درگتءَ اٹلیءَ گرامشیءِ دستگیر کنگءِ ھکم نامگ ھم جاری کنگ بیت۔ وھدے گرامشی پی سی آئیءِ نگیگیں جاوراں گندیت تہ ھمے پہم ایت کہ آ وتی رھبند ءُ سیاستءِ وڑ ءُ ڈولاں مٹ بہ کن انت۔ ھمے زمانگءَ گرامشی پہ پی سی آئیءَ نوکیں ھیال ءُ راھبندءِ شونءَ دنت کہ آوانی سان دیمترءَ گرامشیءِ سیاسی زندءَ 1924 ءَبگر داں 1926ءَ آئیءِ زندانءَ نبشتہ کرتگیں نکان دپترءَ گندگ کاینت۔ گرامشی پہ گلءَ یک نوکیں ھالتاکےءِ بندات کنگءِ سَلاہءَ دنت۔
1924ءَ پی سی آئی گچینکاریءَ بہر زورگءِ پیسلہءَ کنت، دمگءَ وھدے پاشسٹ سک باز تاگتور بنت ءُ اٹلیءَ ھمے وھدءَ سرجمیں چاگرد ترسءِ آماچ بیت۔ گلءِ نوکیں ھالتاک(Unita) کساس بیست ءُ پنچ ھزار دانگ شنگ کنگ بیت۔آؤکیں ماہءَ نوکیں آرڑینو نوا (Ordino Nuovo) ءِ شش ھزار دانگ بہر ءُ بانگ کنگ بیت۔ گیچنکاریءَ پی سی آئی پہ پارلیمنٹءَ 16 اگدہ گرگءَ سوب مند بیت۔ ھمے مردمانی تہءَ گرامشی ھم ھوار بیت۔ مئیءِ ماہءَ گرامشی اٹلیءَ کئیت۔ ھمے سال گرامشی پی سی آئیءِ کارگشاد (Secretary General) گچین کنگ بیت۔ گلءِ سروکیءِ وھدءَ گرامشیءِ مزنیں اِنان ماں زربارءِ بُنگپ بزاں (Southern Question) بیت۔ گرامشی زربارءِ بزگریں تبک (Peasant Class) ءُ اٹلیءِ آ دگہ ھندانی پوریاگریں تبک (Working Class) یکجاہ کنگ ءُ سوشلسٹ زرمبشتءَ ھوار کنگ بیت۔ گرامشیءِ سروکیءَ گل مزنیں دیمروی یے کنت ءُ گلءِ باسکانی کساس مزنیں کچےءَ گیش بوان بیت۔ ھمے ساھتءَ اٹلیءِ سوشلسٹ ڈیموکریٹک مینسٹر مٹیوٹی (Matteotti) چہ پاشسٹانی دستءَ کشگ بیت۔ مٹیوٹیءِ کوشءَ اٹلیءِ جاور نگیگ بنت ءُ زرداریں سرکار بہر ءُ بانگ بیت۔
جنوری 1925ءَ وھدے موسولینی گوشتانکءَ مٹیوٹیءِ کوشءِ زمہ واریءَ منّیت تہ پاشسٹ ٹولی یکبرے پدا کمیونسٹاں زلم ءُ زورکیانی دیمپان کن اَنت۔ ھمے سالءَ پاشسٹ ٹولی وتی سرکارءَ مہکم کنگءِ ھاترءَ زور ءُ تاگتءَ کارمرز کن اَنت۔ اے سرجمیں سالءَ کمیونسٹ پارٹی نیم کانودی (Semi -legal)بستارے داریت۔
سال 1926 پہ گرامشیءِ زندءَ مزنیں ارزشتے داریت چیاکہ ھمے سالءَ گرامشی بندیگ کنگ بیت۔ 31 اکتوبرءَ وھدے پانزدہ سالی ورناہے موسولینیءَ کشگءِ کوشست کنت تہ پاشسٹ ھمے وئیلءَ یک جوازے جوڑ کن اَنت ءُ گہگیری کنوکیں گلانی سرءَ کریک ڈاؤن جنگءَ بندات کن اَنت۔ کمیونسٹ پارٹی گرامشیءَ سیوزرلینڈءَ دیم دیگءِ تیاریءَ کن اَنت بلے گرامشی اٹلیءَ یل دیگءَ ھچ وڑءَ جاڑیگ نہ بیت۔ دیمترءَ گرامشی اٹلیءَ یل نہ دیگءِ دلیلءَ وتی رودپترءَ اے رنگءَ نبشتہ کنت کہ”اے دستور جوڑ کنگ بوتگ وھدے کہ زِرءَ پرشتگیں بوجیگءِ ناھدا داں ھما وھدءَ بوجیگءَ یل نہ کنت دانکہ آئیءِ درائیں جانشود سلامتی تیابدپءَ سر نہ بنت۔ “اے گرامشیءِ گوں وتی مہلوک ءُ جنزءَ بندوکی بیت کہ آ ھچ رنگءَ اٹلی ءَ یل نہ دنت ءُ دستگیر کنگ بیت۔
گرامشیءِ زندانی بوگءَ پد کمیونسٹ پارٹی گیشتر پرشت ءُ پروشءِ نیمگءَ روت۔ گرامشیءَ دستگیر کنگءَ پد گرامشی سِلسیلی(Silcily)ءَ ماں زروانے ءَ آرگ بیت۔ ادءَ گرامشیءَ شش ھپتگءَ داں دارگ بیت۔ اے ششیں ھپتگ گرامشی بندیجاہءِ زندءِ وشتریں ساھت بنت کہ ادءَ گرامشیءَ دری کامریڈاں گوں ھال اھوال کنگءِ موہ رسیت۔ ھمے وھدءَ گرامشی گوں وتی کامریڈاں ھوار سیاسی بندیگاں زانت ءُ سرپدی دنت۔ 20 جنوریءَ گرامشی میلن (Milan)ءِ زندانءَ برگ بیت۔ ادءَ گرامشی سرجمیں سال ماں زندانءِ ایوکیءَ دارگ بیت۔ ادءَ چہ پد گرامشی روم ءَ پہ شَر (Trial)ءِ واستہ آرگ بیت۔ بندیگانی سرءَ سلاہبندیں ارش کنگءِ بہتام جنگ بیت ءُ گرامشیءَ بیست سال زندانی کنگءِ پیسلہ کنگ بیت۔ ھمے پیسلہ دَیگءِ وھدءَ گرامشیءِ نیمگءَ اشارہ دیگ بیت ءُ گشگ بیت کہ”اے سسّا ءُ زانت مارا داں بیست سال ءَ دارگی اِنت۔“
سزا دَیگءَ پد گرامشی اٹلیءِ شہر توری (Turi)ءِ زندانءَ بندیگ کنگ بیت، آؤکیں پنچ ءُ نیم سالءَ گرامشی ھمداں بندیگ کنگ بیت۔ وھدے گرامشی سک ناجوڑ بیت تہ گرامشی زندانءِ نادراھجاہءَ برگ بیت۔ ھمے زمانگءَ گرامشی”زندانءِ سرگوست “ءَ نبشتہ کنگ ءَ بندات کنت۔ ادءَ گرامشیءَ کتاب وانگ ءُ نبشتہ کنگءِ موہ رسیت۔ گرامشی 11 سال زندانءَ گوازین اِیت اے یانزدہیں سال چہ مرگءَ گیش بیمناک بنت، یک انچیں وھدے کیت گرامشیءِ دنتان کپ اَنت، ورگ ایر بُرت نہ کنت، کرونک انسومنیاءِ سوب ءَ سرجمیں ھپتگءَ وپت کرت نہ کنت۔ ھون شانگ ءُ انچیں سر دردے گیپت ئِے کہ گرامشی سرءَ گوں دیوالءَ جنت۔ اے دپترءِ نبشتہ کنگءِ وھدءَ گرامشیءِ جاور اے رنگءَ نگیگ بنت، اے پیمیں نگیگیں جاوراں نبشتہ بوتگیں دپتر وت آئیءِ بستارءَ گیش کنت۔
1935ءَ گرامشی رومءَ یک جوانیں نادراھجاہےءَ برگ بیت، اے نادراھجاہءِ برگءِ مستریں سبب میان استمانی زور بیت، گرامشیءِ جاور سک نگیگ بنت ءُ گرامشی 28 اپریل ۱۹۳۷ ءَ اے کوڑہیں امروزءَ یل دنت۔ گرامشیءِ گڈی رسمانی تیاری کنگءِ وھدءَ گرامشیءِ کوٹیءَ چہ 33 کسانیں دپتر کشگ بنت ءُ ماسکوءَ روان دیگ بنت۔ اے نبشتانکءِ دومی بہر بزاں کہ ایجمنیءِ لیکہ چہ ھمے نبشتانکءَ جوڑ کنگ بوتگ۔ کوشِست ھمیش بیت کہ ایجمنیءِ لیکہءِ سرجمیں تک ءُ پہناتاں گوں تران کنگ بہ بیت۔
ایجمنی ءِ لیکہ
ایجمنی ءِ لیکہ ءِ رِد ءَ ھاکمی کنگ ءِ ھاتر ءَ ایوک ءَ تاگت کارمرز نہ بیت، بگندئے ھاکمی ءَ برجاہ دارگ ءِ ھاتر ءَ تاگت ءِ ھمرائی ءَ ھیال ءُ لیکہ ھم مزنیں ھدّے ءَ کارمرزگ بنت۔ ھمک ھاکم تبک ءِ بُنھشت ھما ھیال ءُ لیکہ اَنت کہ ھماھانی چماں آ وتءَ یا وتی کش ءُ گور ءِ دُگنیا ءَ چاریت۔ ھمے پیم ءَ "ایجمنی" ھاکمیت ءَ برجاہ دارگ ءِ یک وڑ ءُ ڑول یا رھبندے۔ چوشکہ ھاکمیت ءَ برجاہ دارگ ءِ ہاتر ءَ راجکاری زانشت ءِ تہ ءَ بازیں وڑ ءُ ڈول ھست انت، آوانی تہ ءَ یکے آمریت (Dictatorship) انت۔
ہر یک استانے وھدے تہی یا دری جیڑھانی دیمپان بیت ءُ آئی ءِ ھاکمیت چکاسگ بیت تہ آ ہبکّہ بیت ءُ وت ءَ ءُ وتی ھاکمیت ءَ برجاہ دارگ ءِ ھاتر ءَ تاگت ءِ کارمرز کنگ ءِ نیمگ ءَ روت۔ ما گوشت کنیں کہ تاگت ءِ کارمرز کنگ یک استانے ءِ گڈی راہ اِنت۔ بلے اے پئیم نہ انت کہ آمریت تب ءِ ھاکمی کنگ بس ھمے یکّیں رھبند ءَ گوں بیت، ھاکمیت کنگ ءِ دومی رھبند "ایجمنی" انت۔ ایجمنی ءِ لیکہ ءَ ما چوش گیشینت کنیں کہ یک انچیں راجکاری سر مستری (Political Leadership) یے کہ وتی ایردستانی "رزا" بزاں (Consent) ءِ اوستیگ بیت۔ اے رزا ءِ گرگ ءِ واستہ ھاکم تبک وتی ھیال ءُ لیکہ ءَ ایردستیں تبک ءِ تہ ءَ شنگ کنان ءَ لیکہ ءَ آوانی زبان ءَ ریچیت ءُ ایردست ءَ ھم ھمے ھیال ءُ لیکہانی منوگر کنگ ءِ جہد ءَ کنت۔
گرامشی ایجمنی ءِ لیکہ ءِ بزانت ءَ ھما وھد ءَ پہمیت کہ آ اٹلی ءِ چاگرد ءِ تہ ءَ زانتکارانی (Intellectuals) کرد ءِ بابت ءَ پٹ ءُ پول کنگ ءَ بیت۔ چاگرد ءَ پھمگ ءِ ھاتر ءَ گرامشی چاگرد ءَ دو بھر ءَ گیشّین ایت۔ چاگرد ءِ اے دوہیں بھراں گرامشی سیول سوسائٹی ءُ پولیٹکل سوسائٹی ءِ نام ءَ پجارءَ کنت۔
سیول سوسائٹی
سیول سوسائٹی ءِ تہ ءَ سرجمیں پراہیوٹ ادارہ کاینت کہ آوانی توکءَ اسکول، کالج، چرچ ءُ مسیت، ھال تاک، سیاسی گل ءُ ایندگاں گل کاینت کہ آ چاگرد ءِ تہ ءَ سیاسی ءُ چاگردی زانت ءُ سرپدی دیگ ءِ کار ءَ کن انت۔ ما چوش گوشت کنیں کہ سیول سوسائٹی ھیال ءُ لیکہانی نھادی جاہ انت۔ چاگرد ءِ اے مراگاہ ءَ زانتکار جتاہیں ھیال ءُ لیکہانی سوداگری ءَ کن اَنت۔ گرامشی ءِ نز ءَ سیول سوسائٹی مزنیں ءُ پرارزشتیں گوستانکی کار کنگ ءِ توان ءَ داریت۔ سیول سوسائٹی کارگس ءُ کاروبار ءِ مراگہ نہ انت بلے اے لیکہ ( ideology) ءُ کلچرل آرگنائزیشنءِ جاہ اِنت۔
پولیٹکل سوسائٹی
دومی بھر کہ آئی ءَ گرامشی پولیٹکل سوسائٹی ءِ نام ءَ دنت، آئی ءِ تہ ءَ اُلسی گَل، ھکومت، آمیدگس، پولیس ءُ پوج ءُ ایندگہ گَل کاینت کہ آھاں تاگت کارمرز کنگ ءِ اھتیار ھَست۔ پولیٹکل سوسائٹی ءَ استان (State) ءِ نام ھم دیگ بیت۔
سیول سوسائٹی ءِ مراگہ ءَ کواس ( Intellectuals) ھاکم تبک ءِ ایجمنی ءَ برجاہ دارگ ءِ کار ءَ کن اَنت، یا ایردستیں تبک ءِ زانتکار استان ءِ ھلاپ ءَ کار کن انت ءُ ایردست ءِ ایجمنی ءَ جوڑ کنگ ءِ جہد کن انت۔ اے رد ءَ دوئیں مکالپ ءِ ایجمنیاں پہ جہد کنوکیں زانتکارانی مراگہ یکیں بوت کنت بلے ہر دوئیں زانتکارانی کرد یکّے دومی ءَ چہ جتا بیت۔
ھاکم تبک ءِ زانتکار ھاکم تبک ءِ دگنیا ءِ ھیال ءُ لیکہ ءَ ایردست ءِ مجگانی تہ ءَ نادینگ ءِ کوشست کنت۔ ھاکم تبک ءِ جوڑ کرتگیں اسٹیریوٹائپ (Stereotype) ءَ ایردست ءَ وانینیت ھمے رنگ ءَ ایردست ءِ تہ ءَ آ پہ ھاکم تبک ءَ "رزا" جوڑ کنگ ءَ سوب مند بیت ءُ لس مھلوک ءَ استان ءِ کانودانی پابند کنگ ءِ جھد ءَ کنت۔ گرامشی ءِ نز ءَ زانتکار ھمُک وھد ءَ گوں یک تبک ءَ بندوک انت، زانتکارانی وتی وتواکیں ٹولی یے ھست۔ ھمے پئیم ءَ بوت کنت کہ یک دیمروی کنوکیں تبک (Progressive Class) ءِ زانتکار ( Organic Intellectual) دگہ تبک ءِ زانتکارانی سرا سان دور دات کن اَنت۔
ھے پئیمیں جاورانی تہ ءَ دومی ایردستیں تبک ءِ زانتکار پروگریسو تبک ءِ زانتکار ءَ چہ سان زور اَنت ءُ پروگریسو تبک ءِ زانتکارانی وڑ ءَ کنگ لوٹ انت۔ چوش ھما وھد ءَ بوت کنت وھدے پروگریسو تبک راستیں بزانت ءَ دیمروی کنگ ءَ بہ بیت۔
اگاں ھاکم تبک ءِ زانتکار ایردست ءِ تہ ءَ "رزا" پیداک کنگ ءَ بے سوب بہ بنت تہ ھاکم تبک تاگت ءُ زور ءِ کارمز کنگ ءِ نیمگ ءَ روت۔ وھدے لس مھلوک ءِ ھاکم تبک ءِ سرءَ بیسہ بہ پروشیت ءُ لس مہلوک مہ لوٹیت کہ آ ایردست بہ بنت گڑا ھاکم تبک مہلوک ءَ لٹ ءُ کُٹ کنت ءُ بیھار دنت۔ ھاکم تبک تُرس ءِ انچیں ماھولے جوڑ کنت کہ مردم ھاکم تبک ءِ ھلاپ ءَ ھچ کُرت مہ کن انت۔
ایجمنی ءِ لیکہ آشوبی شوربندی ءَ پہ کارمرز کنگ بیت۔ اے لیکہ ءَ کارمرز کنگ ءَ چہ آشوبی ردءُ بند پولگ ءُ اڑ دیگ بنت۔ ھستیں وھد ءِ زورآوریں ھاکم تبک ءِ ایجمنی ءَ ھلاس کنگ ءِ ھاترءَ المی انت کہ وتی زرمبشت ءِ تہ ءَ جیکوبن ازم (Jacobinism) کارمرز بہ کن انت۔ جیکوبن ازم یک انچیں سیاسی زرمبشتے کہ آ سیول سوسائٹی ءَ چہ چست بیت ءُ یک "گوستانکی بلاک (Historical Block)" جوڑ کرت کنت۔ اے گوستانکی بلاک دراھیں سبالٹرن تبک (Subaltern Classes) ھمکار ءُ یک مُشت بنت ءُ وتی الٹرنیٹیو (Alternative) ایجمنی یے جوڑ کن اَنت۔ جیکوبن پورس یک زرمبیشتے ءِ تہ ءَ ھما سکتیں ریڑیکل (Extremely Radical) پیسلہ کُن(Decisive)، پروگریسو(Progressive) ءُ لیڈ(Lead) کنگ ءِ جوزہ گوشگ بیت۔ اے لہتیں ھاسیں بودناکی (Qualities) اَنت کہ یک نوکیں ایجمنی ءِ جوڑ کنگ ءَ پہ ھژدری انت۔ ھمے بودناکی بہ بنت تہ یک زرمبیشتے ری ایکشنری (Reactionary)، رد آشوبی تاگت ءُ پری میچور کمپرومائز (Premature Compromise) ءَ چہ رکینگ بیت۔ اے رنگیں سیت جنز ءَ مھکم کن انت ءُ لس مہلوک ءَ جہد ءِ تہءَ گیشءَ گیش ھوار کن انت۔ پرانس ءِ آشوب دُگنیا ءِ تہ ءَ اولی جدید سیاسی زرمبشت گُوشگ بیت کہ آئی ءِ تہ ءَ اے رنگیں شوربندی بیت۔ پمیشکہ گرامشی آشوبِ پرانس ءُ آئی ءَ چہ پدئے زرمبشتانی تہ ءَ اے پیمیں شوربندیاں جیکوبن ازم ءِ نام ءَ دنت۔
گرامشی ایجمنی ءُ زورشاہی (Dictatorship) ءَ یکے دومی ءِ وازمندگ (Dependent) بوھگ ءِ ھیال ءَ ھم دیم ءَ کاریت۔ یک ھاسیں ھکومتے(Regime) ءِ تہ ءَ ایجمنی چہ "تاگت" ءُ "رزا" ءِ یکجاہ کارمرز کنگ ءَ چہ برجاہ دارگ بیت۔ ھمے رنگیں جاورانی تہ ءَ یک ھدّے ءَ تاگت کارمرز کنگ بیت ءُ وھدے تاگت کارمرز کنگ بیت تہ ھمے پیش دارگ بیت کہ تاگت چہ گیشتریں مردمانی رزا ءَ گوں کارمرز بوھگ ءَ اِنت۔
نوکیں ایجمنی ءِ بُنھشت ءَ ایر کنگ ءِ ھاتر ءَ المی انت کہ زور یا تاگت ءَ چہ استیں وھد ءِ ھاکمیت ھلاس کنگ بہ بیت ءُ زیردست ءِ زورشاہی نزام منڈگ (Install) بہ بیت۔ انچوش کہ اے آشوب ءِ بنداتی نوبت بنت بلے اے زورشاہیءِ بُنُکی مُراد ھمیش بہ بیت کہ وھد ءِ ھمبرائی ءَ انچیں شوربندی (policy) کارمرز بہ کنت کہ مہلوک ءَ وتی ھیال ءُ لیکہانی درشان کنگ ءِ موہ بہ رسیت۔ ھمے داب ءَ اے زورشاہی رھبند وھد ءِ ہمراہی ءَ ایجمونک رھبند ءِ تہ ءَ مٹ کنگ بہ بیت۔ اگاں یک راجمانے ءِ تہ ءَ تپاوت مہ بیت کہ چاگرد کجام پیم ءَ مھکم کنگ بہ بیت ءُ ھمزیلی ءِ (Harmonious) ھیال ءُ لیکہ مہ بیت کہ آ وتی چاگردی ءُ مالی راستیں جاورانی بابت ءَ سرپدی بہ دینت تہ اے رنگیں چاگردانی تہ ءَ سیاست تہنا تچکیں ءُ زگریں زورشاہی رھبند ءِ کارمرز کنگ ءَ گوش انت۔ سیاست ءِ مُول سیول سوسائٹی ءَ ایوک ءَ پہ مالی نپ ءُ سیتانی واستہ کارمرز کنگ بیت۔
اردیں یک چاگردے ءَ لس مہلوک آشوبی گلانی ارز ءَ گوش نہ داریت ءُ گوں آھاں ہمراداری کرت نہ کنت، گرامشی اے رنگیں تب ءِ بنکی وجہ لس مہلوک ءِ استان ءِ ایردست بزاں (Subordinate) بوہگ ءَ لیکیت۔ لس مہلوک ءَ چہ آشوبی چست ءُ ایراں چہ رکینوک ایوک ءَ استان ءِ تُرس ءُ بیہار نہ بنت بلے ھکمران تبک ءِ نیمگ ءَ چہ داتگیں ھما ھیال ءُ لیکہ بنت کہ آھاں مہلوک ءِ تہ ءَ جاہ کرتگ۔ پمیشکہ ایردست ءَ آشوب ءِ بہر کنگ ءَ پہ المی انت کہ یکبرے آ چہ ھمے پکری سانکلاں چہ آجو کنگ بہ بیت کہ آ زورآور ءِ کلچرل آرگنائزیشناں لس مردمانی مجگ ءِ تہءَ منڈینتگ اَنت۔
گرامشی ھمے سرپد بیت کہ یک مردمے ءَ کریٹیکل ھنڈرسٹینڈنگ(Critical Understanding) چہ دو دیم پہ دیمیں (Opposing) سیاسی ایجمنیانی پہمگ ءَ چہ رست کرت کنت۔ کریٹیکل سیلپ کانشیئسنس(Critical Self-Consciousness) سیاسی ءُ گوستانکی کواسانی جوڑ کنگ ءِ شون ءَ دنت۔ دوئیں دیم پہ دیم ئے ایجمونک زرمبشت ءَ چہ یک مردمے ءِ ایتکس (ethics) ءُ سیاست ءِ پڑ ءَ وتی راستی ءَ پہم اِت کنت۔ یک ھاسیں ایجمونک زرمبشتے ءِ بہر بوہگ ءِ سرپدی بُن اسل ءَ وتی جندءِ بابت ءَ سرپد بوہگ (Self-conscious) ءِ اولی گام اِنت کہ مردم ءَ لیکہ ءُ کرد (Theory & Practice) یکجاہ گندگ ءَ کاینت۔ ایجمونک جہد ءَ ہرچ وھد ءَ زانتکارانی رھشون بوہگءِ درکار انت۔ مہلوک پہ وت ءُ دیم وتی ءُ دومی ملک ءِ میان ءَ پجار کرت نہ کنت ءُ پہ وت ءُ دیم وت واک ھم بوت کرت نہ کنت دانکہ وتی جند ءَ مھکم مکن اَنت۔ ابید ادارہ ءَ مھکم ،رہشون ءُ زانتکار جوڑ کنگ نہ بیت۔
ایجمنی ءِ لیکہ کوھنیں آشوبی زرمبشتانی ردیاں شون دنت۔ چوشکہ ربیتی مارکسٹ (traditional marxist) لیکہ اِنت۔ مارکسی زانتکارانیں اولی ردی ھمیش بیت کہ آ روزیگی ڈیٹرمین ازم (Economic Determinism) لیکہ ءِ رد ءَ آشوبی شور بندی جوڑ کن انت۔ اے رنگیں ھترناکیں ھیالاں (Assumption) چہ آ بازیں ردی کن انت ءُ بے سوب بنت۔ گرامشی ءِ ھیال ءَ ایکنومسٹ اے پھم ات کرت نہ کن انت کہ "مہلوک ءِ ھیال ءُ لیکہ(Ideology) آوانی روزیگی کارانی بنھشت انت ناں کہ مالی ھُب ءُ لوٹ"۔ روزیگی ھُب ءُ لوٹ ءَ چہ ودی بوتگیں جنز ءَ روایتی لیکہ سُست ترینت ءُ پروش دات کن انت۔ ایجمنی ءِ لیکہ دگہ انچیں ردیانی شون ءَ دنت کہ سیکنڈ انٹرنیشنل ءَ کرتگ اَنت۔ ھمے زمانگ ءَ سوشلسٹ زانتکار ھاکم تبک ءِ زانتکارانی شنگ کرتگیں دروگ(Myth) کہ چاگرد ءِ تہءَ ڈیموکریسی ءُ برابری چہ پارلیمنٹ ءُ یونیورسل سپریج (Universal Suffrage) ءَ چہ آرگ ءِ سرءَ باورءُ بیسہ کن انت ءُ ھمے رنگیں شوربندی جوڑ کن انت۔ گرامشی ھمے سرپد بیت کہ پارلیمنٹ ءُ پولنگ بوت (Polling Booth) ھُشکیں کالب انت، ایشانی ھکیں کار چہ سیول سوسائٹی ءِ تہ ءَ کلچر ءُ آرگنائزیشنانی کنٹرول کنگ انت۔ پارلیمانی گوازی پاپولر ساورینٹی (Popular Sovereignty) ءِ دْروگ (Illusion) ءِ جوڑ کنگ ءَ کمک دنت۔
ھما ٹولی کہ آھاں استان ءِ مھار دست ءَ بیت، ایجمنی ءِ جوڑ کنگ ءِ جہد ءَ گیش پائدگ چِست کُت کن اَنت چوشکہ اے مزن مزنیں ادارہ، پہ درور، رسانکدر ءُ پارلیمنٹ ءِ واکدار اَنت ءُ پبلک اوپینین (Public opinion) ھمیشانی دست ءَ اِنت۔ پبلک اوپینین گوں سیاسی ایجمنی ءَ بندوک انت۔ گرامشی پبلک اوپینین ءَ سیول ءُ پولیٹکل سوسائٹی ءِ پوائنٹ آپ کنٹیکٹ (Point of Contact) بزاں کہ تاگت ءُ رزا ءِ نیام ءِ پُل لیک ایت۔ یک استانے وھدے کہ نوکیں یا ناوشیں (Unpopular) کارے کنگ لوٹیت تہ ھمے کار ءِ بابت ءَ یک ھاسیں لس مھلوکی بیانیائے اڑ دنت ءُ سیول سوسائٹی ءِ لہتیں بہراں پہ ھمے کار ءِ کنگ ءَ مھکم کنت۔
ماڈرن نیشن استانانی (Modern Nation State) جوڑ کرتگیں سوپر اسٹرکچر (Super structure) استان ءَ مزن چہ مزنیں بہران ءَ رکینت کرت کن انت انچوش کہ مزنیں روزیگی بُہران ءِ وھد ءَ استان ءَ چہ پروش ورگ ءَ رکین انت۔ گرامشی اے رنگیں جوڑشتانی کرد ءِ درور ءَ گوں جدیدیں جنگانی تہءَ ٹرینچ سسٹم (Trench system) ءَ دیم پہ دیم کنت۔چوشکہ کہ کنڈ ءِ تہ ءَ سنگر گپتگیں سپاہیگ ئے مزنیں بمباری ءِ دیم ءَ جوانیں گہگیری کرت کنت۔
وھدے دو لشکر دیم پہ دیم بیت تہ اے پئیمیں جنگ ءِ مُراد ھمیش بیت کہ دژمن ءِ لشکر ءَ سرجم ءَ تباہ کنگ بہ بیت ءُ ھمے پئیم جنگ ھلاس ھم ھما وھد ءَ بیت وھدے یک لشکرے سرجم ءَ پروش دیگ بیت ءُ امن ءُ ایمنی کئیت۔ بلے سیاسی جہد چہ جنگ ءَ گیشتر مانگیشتگ انت ءُ سیاسی جہدانی درور مارا نوآبادیاتی جنگانی (Colonial Wars) تہ ءَ گندگ کئیت۔ اے پیمیں جنگانی تہءَ وھدے یک ٹولی یے باج بارت تہ دومی ٹولی ءِ زمین ءِ سرا کبزہ کنت ءُ آئی ءَ وتی یک کالونی یے جوڑ کنت۔ دومی نیمگ ءَ ھما لشکر کہ آئی ءَ پروش وارتگ آ لشکر ءِ سلاہ پچ گرگ بنت ءُ شنگءُ شانگ (Disperse) کنگ بیت بلے اے پیمیں جاوراں سیاسی ءُ جنگی جہد برجاہ دارگ بیت۔ اے پیمیں جہدانی یک درورے مارا ہندوستان ءِ سرا برطانیہ ءِ زورگیری ءُ چہ ہندوستان ءِ مہلوک ءِ نیمگ ءَ ھمے زورگیری ءِ ھلاپ ءَ گہگیری کنگ ءَ گندگ کئیت۔ برطانیہ ءِ زورگری ءِ ھلاپ ءَ ھندوستان ءَ مارا جد ءُ جھد ءِ سئے دروشم گندگ ءَ کاینت۔
اولی کہ گرامشی آئی ءَ وار آف مومنٹ(War Of Movement) ءِ نام دنت۔ اے رنگیں جہد ءَ دژمن ءِ ھلاپ ءَ ترندیں زہرشانی کنگ ءُ دگ ءُ بازار بند کنگ بنت۔
دومی دروشم کہ آ وار آف پوزیشن (War Of Position) گُشگ بیت۔ اِے جہد ءِ تہءَ دژمن ءُ آئی ءِ ادارہ سرجم ءَ باہیکاٹ کنگ بنت ءُ مہلوک ءَ اے ادارھانی ھلاپ ءَ سرپدی دیگ بیت۔
سیمی دروشم کہ آ دُز جنگی (Underground Warfare) لیکگ بیت کہ اے پڑ ءَ دژمن ءِ ھلاپ ءَ چیریں جنگی تیاری کنگ بیت۔
زورگریں تاگتانی ھلاپ ءَ جہد ءَ باز براں وار آف پوزیشن وتی تہءَ وت سلاہبند (War Of Manoeuvre) پہمگ بیت۔ انچوش کہ جدیدیں بیوروکریٹک سوپر اسٹرکچر ھما کنڈ (Trench) کہ اِشانی کمک ءَ زورگریں تاگت ایردست ءِ ھلاپ ءَ دیمپان بنت۔ اے رنگیں جاوارنی تہءَ وار آف پوزیشن ءِ کمک ءَ زورگر ءِ کنڈ پروشگ بنت۔
گرامشی ءِ رد ءَ ھما آشوبی باسک کہ استان ءَ گوں اے پڑ ءَ جنگ کنگ ءَاَنت آ باسکاں اورگینک کرائسز (Organic Crisis) ءُآدگہ راجمانی کرائسزءُ جیڑھانی بارو ءَ سرپدی دارگ المی اِنت۔ گرامشی گُوشیت کہ اورگینک کرائسز سرجمیں چا گرد ءُ آئی ءِ درستیں مزنیں جوڑشتاں پیڑاہیت۔ اورگینک کرائسز ایجمونک کرائسز ئے ءُ اے وھد ءَ زورگر تبک ءِ مردمانی وتی رہشونانی گُشتنانی سرءَ بیسہ ھلاس بیت ءُ مہلوک ھستیں وھد ءِ سیاسی گل ءَ یل دیگ بندات کن انت۔ اے بہران ٹوھیں وھدے ءَ وت ءَ داریت۔ گرامشی گوشیت، "ھچ چاگرد اے ھیال منگ ءَ تیار نہ بیت کہ آئی ءَ دگہ یکے سرگوز کُرت کنت۔" ھاس ھاکم تبک ءِ زانتکار وھدے اے رنگیں بہران ءِ تہءَ گوزگ ءَ بنت تہ آ ہرچ وڑیں دروگ بُر انت، استان ءِ بے سوب بوہگ ءِ زمہ وار آ وتی مکالپ ءِ گل ءَ یا چاگرد ءِ تہے کستریں تبکاں لیک انت۔ اے پہ ھاکم تبک ءَ سکیں نگیگیں جاور بنت ءُ اگاں آشوبی گل اے پیمیں جاورانی تہءَ مہلوک ءِ تہءَ وتی بیسہ ءُ ھیال ءُ لیکہ ءَ ایر مکن انت تہ بوت کنت کہ ھاکم تبک اے بُہرانءُ وئیل ءَ چہ دراہ ءُ سلامتی مہ بیت۔ اے وھد ءَ ھاکم تبک وتی مکالپ ءِ گل ءُ لس مہلوک ءَ لٹ ءُ کُٹ کنگ ءُ آوار جنگ ءَ بندات کنت ءُ مردم ءَ تُرس ءِ آماچ کنت۔ گرامشی اے پیمیں اورگینک کرائسز ءَ چہ نپ چست کنگ ءِ زمہ وار آشوبی باسک ءَ لیکیت۔ گرامشی کوریں چم ءَ پِٹے ارس بازیں (The Worse the Better) ءِ سیاسی تب ءَ تچک ءَ تچک رد کنت۔
گڈسر ءَ اگاں ایجمنی ءِ لیکہ ءَ چہ ھستیں وھد ءِ ھاتر ءَ اگاں سرپدی ءِ رست کرت کنت تہ آ چو اے پیم ءَ بیت کہ، "یک کوہنیں چاگردے ءِ سوشل آرڈر ایوک ءَ آئی ءِ ھرابیانی پدر کنگ ءَ چہ ھلاس کنگ نہ بیت ءُ ھمے پئیم ءَ یک نوکیں چاگردے تہنا آئی ءِ شری ءَ زاہر کنگ ءَ چہ آرگ نہ بیت۔ یک چاگردے ستر زُلم ءُ زوراکیانی آماچ بہ بیت، آ چاگرد ءَ ایوکءَ بدیں ھاکمانی پندلے گوشت کُرت نہ کن اِت۔ ھما ھاکم کہ یک چاگردے جنزینگ ءَ انت، مزنیں کچ ءِ مہلوک ءَ چہ ابید ءِ لٹ ءُ کُٹ ءَ کار گِرگ ءَ انت، الّم بودناکیں ھاکم بنت۔ جان دُزیں مردم کدی ھم اے سرپد مہ بیت کہ اگاں آئی ءِ ھستیں چاگرد ھراب انت ءُ آئی ءِ آؤکیں وھد پہ وت ءُ دیم وش ھال بوت کنت۔ اگاں زمین ءِ سرے نیزگاریں مہلوک (The Wretched Of The Earth) ھرچ وھد ءَ لٹانی چیرءَانت، ایشی سوب ایش اِنت کہ زورآور زانت کہ لٹ ءِ سر کجام انت۔ ایردست ءِ ایوک ءَ پہ زور آور ءِ ایرجنگ ءَ ھچ نہ بیت۔ ایردست وت ءَ چہ زورآور ءَ گہتر کنگ ءِ جہد ءَ بہ کنت۔ ایردست ایوک ءَ وت ءَ اکلاکی (Morally) ھساب ءَ ءَ گہتر مہ کنت بلے وت ءَ ٹیکنیکلی (Technically) ھم گہتر کنگ ءِ جہد ءَ بہ کنت۔ گرامشی ھما چپّیں دست ءِ سوشلسٹانی سرءَمزنیں نگدے کنت کہ وھدے آ ایردستیں تبک ءَ گوں بوتگیں ناشرکاری ءُ بے مئیاری ءَ جواز دینت۔ ھما زانتکار کہ اے رنگیں تب ءَ ھمے دلیل ءِ پُشت ءَ جواز دینت کہ "انسان چاگرد ءِ برورد انت" گرامشی ھما زانتکار ءَ ھمے پسو دنت کہ چاگرد بنیادم ءِ کرد ءُ آئی ءِ تب ءَ درشان(Explain) کرت کنت ناکہ آئی ءَ جواز (Justify) دات کنت ءُ ھاس کر ھما مردمانی کہ آ راجدپترانی تہ سک باز پُشت ءَ انت۔
آشوبی باسک ءَ آشوبی تب ءُ ردکاریں تب (Criminal Behaviour) ءِ میان ءَ پرک ءُ پیر الم ءَ کنگی انت۔ بُندپتر (Human History) ھستیں وھد ءِ جاورانی مٹ کنگ ءِ مھکمیں ءُ یکشلیں جھد را گوشگ بیت۔ اگاں کسے چاگرد ءَ مٹ کنگ ءِ واھگ ءَ داریت آئی ءَ پہ ھژدری انت کہ آ وتءَ ھستیں جاوراں چہ بُرزتر بہ لیکیت ءُ چاگرد ءَ سر ءُ سوج کنگ ءِ بود وتی تہءَ بیاریت۔ جان دُزّیں ، ناسرپدیں ءُ ھمُک بے کردیں مردم ستر آوانی جاور نگیگ بہ بنت آ کدی ھم یک نوکیں چاگردے آورت کرت نہ کن انت۔ ھما کہ آ بودناک انت ، مھکم ءُ وتی سرءَ پہر بند انت، آ یک نوکیں چاگردے، نوکیں ربیدگے ءِ آرگ ءَ پد وت ءَ راج دپتر ءِ تہءَ نمیران کن اَنت۔
اے نبشتانکءِ تہءَ درشان کُتگیں ھیالءُ لیکہ نبشتہ کارءِ وتیگ اَنت ہژدری نہ اِنت کہ بی ایس سی اسلام آباد آئیءِ ھیالءُ لیکہاں گوں منوگر بہ بیت۔